ਸੱਤ ਗੇੜਾਂ ਚ ਮੁਕੰਮਲ ਹੋਈਆਂ ਲੋਕ ਸਭਾ ਚੋਣਾਂ ਦੇ ਨਤੀਜੇ ਮੰਗਲਵਾਰ ਨੂੰ ਐਲਾਨੇ ਗਏ। ਇਹ ਨਤੀਜੇ ਜਿੱਥੇ ਚੋਣ ਲੜ ਰਹੇ ਕਈ ਉਮੀਦਵਾਰਾਂ ਲਈ ਖੁਸ਼ੀ ਲੈ ਕੇ ਆਏ, ਉੱਥੇ ਹੀ ਕਈ ਉਮੀਦਵਾਰਾਂ ਨੂੰ ਹਾਰ ਦਾ ਮੂੰਹ ਵੀ ਦੇਖਣਾ ਪਿਆ। ਕਈਆਂ ਨੇ ਬਹੁਤ ਥੋੜ੍ਹੇ ਫਰਕ ਨਾਲ ਜਿੱਤ ਹਾਸਲ ਕੀਤੀ ਅਤੇ ਕਈਆਂ ਨੇ ਵੱਡੇ ਰਿਕਾਰਡ ਵੀ ਆਪਣੇ ਨਾਂ ਕਰ ਲਏ।
ਦੱਸ ਦਈਏ ਕਿ ਕੇਂਦਰੀ ਗ੍ਰਹਿ ਮੰਤਰੀ ਅਤੇ ਭਾਜਪਾ ਨੇਤਾ ਅਮਿਤ ਸ਼ਾਹ ਨੇ ਗਾਂਧੀਨਗਰ ਲੋਕ ਸਭਾ ਸੀਟ ਤੋਂ ਕਾਂਗਰਸ ਦੇ ਰਮਨਭਾਈ ਪਟੇਲ ਨੂੰ ਰਿਕਾਰਡ 744716 ਵੋਟਾਂ ਨਾਲ ਹਰਾਇਆ। ਸ਼ਾਹ ਨੂੰ 1010972 ਵੋਟਾਂ ਮਿਲੀਆਂ। ਮੱਧ ਪ੍ਰਦੇਸ਼ ਦੇ ਸਾਬਕਾ ਮੁੱਖ ਮੰਤਰੀ ਸ਼ਿਵਰਾਜ ਸਿੰਘ ਚੌਹਾਨ 8.21 ਲੱਖ ਵੋਟਾਂ ਨਾਲ ਜਿੱਤੇ। ਪਰ ਇੱਕ ਅਜਿਹਾ ਆਗੂ ਹੈ ਜੋ ਕੱਲ੍ਹ ਇਨ੍ਹਾਂ ਦੋਵਾਂ ਦਿੱਗਜਾਂ ਨੂੰ ਪਿੱਛੇ ਛੱਡ ਗਿਆ ਹੈ। ਉਸ ਦਾ ਨਾਂ ਰਕੀਬੁਲ ਹੁਸੈਨ ਹੈ, ਜੋ ਅਸਾਮ ਦੇ ਧੁਬਰੀ ਤੋਂ ਕਾਂਗਰਸ ਦਾ ਉਮੀਦਵਾਰ ਸੀ।
ਦੱਸ ਦਈਏ ਕਿ ਇਸ ਵਾਰ ਲੋਕ ਸਭਾ ਚੋਣਾਂ ਵਿੱਚ ਕਾਂਗਰਸ ਦੇ ਮੁਸਲਿਮ ਉਮੀਦਵਾਰ ਰਕੀਬੁਲ ਹੁਸੈਨ ਨੇ ਸਭ ਤੋਂ ਵੱਡੀ ਜਿੱਤ ਦਰਜ ਕੀਤੀ ਹੈ। ਰਕੀਬੁਲ ਨੇ AIUDF ਨੇਤਾ ਬਦਰੂਦੀਨ ਅਜਮਲ ਨੂੰ 1012476 ਵੋਟਾਂ ਨਾਲ ਹਰਾਇਆ। ਰਕੀਬੁਲ ਹੁਸੈਨ ਨੂੰ 1471885 ਅਤੇ ਬਦਰੂਦੀਨ ਅਜਮਲ ਨੂੰ 459409 ਵੋਟਾਂ ਮਿਲੀਆਂ। ਇਸ ਤਰ੍ਹਾਂ ਧੂਬਰੀ ਸੀਟ ਨੇ ਆਪਣੇ ਸਾਂਸਦ ਨੂੰ ਭਾਰਤ ਦੀ ਸਭ ਤੋਂ ਵੱਡੀ ਜਿੱਤ ਦਿਵਾ ਕੇ ਪਾਰਲੀਮੈਂਟ ਵਿੱਚ ਭੇਜਿਆ ਹੈ।