ਲੁਟੇਰਿਆਂ ਨੇ ਇੱਕ ਅਮਰੀਕੀ ਜਿਊਲਰੀ ਸਟੋਰ ਵਿੱਚ ਲੁੱਟ ਦੀ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਇਨ੍ਹਾਂ ਬਦਮਾਸ਼ਾਂ ਨੇ ਕੋਈ ਛੋਟੀ ਲੁੱਟ ਨਹੀਂ ਕੀਤੀ, ਸਗੋਂ ਪੰਜ ਲੱਖ ਡਾਲਰ ਭਾਵ ਕਰੀਬ 4 ਕਰੋੜ ਰੁਪਏ ਦੇ ਗਹਿਣੇ ਲੈ ਕੇ ਫ਼ਰਾਰ ਹੋ ਗਏ ਤੇ ਇਨ੍ਹਾਂ ਨੇ ਸਟੋਰ ਮਾਲਕ ਦੀ ਕੁੱਟਮਾਰ ਵੀ ਕੀਤੀ ਹੈ।
ਦੱਸ ਦਈਏ ਕਿ ਅਮਰੀਕਾ ਦੇ ਕੈਲੀਫੋਰਨੀਆ ਦੇ ਪਾਸਾਡੇਨਾ ‘ਚ ‘ਜਵੇਲਜ਼ ਔਨ ਲੇਕ’ ਨਾਮੀ ਜਿਊਲਰੀ ਸਟੋਰ ਦੇ ਮਾਲਕ ਸੈਮ ਬਾਬਿਕਿਅਨ ਨੇ ਇਸ ਘਟਨਾ ਦੀ ਜਾਣਕਾਰੀ ਦਿੱਤੀ। ਉਸ ਨੇ ਦੱਸਿਆ ਕਿ ਦਸਤਾਨੇ ਪਹਿਨੇ ਤਿੰਨ ਨਕਾਬਪੋਸ਼ ਦੁਪਹਿਰ ਕਰੀਬ ਪੌਣੇ ਦੋ ਵਜੇ ਸਟੋਰ ਵਿੱਚ ਦਾਖਲ ਹੋਏ ਅਤੇ ਲੁੱਟਮਾਰ ਸ਼ੁਰੂ ਕਰ ਦਿੱਤੀ।
ਜਾਣਕਾਰੀ ਦਿੰਦਿਆ ਸਟੋਰ ਦੇ ਮਾਲਿਕ ਨੇ ਦੁਕਾਨ ਦਾ ਦਰਵਾਜ਼ਾ ਖੋਲ੍ਹਿਆ ਤਾਂ ਸਾਹਮਣੇ ਤੋਂ ਸ਼ਰਾਰਤੀ ਅਨਸਰਾਂ ਨੇ ਆ ਕੇ ਉਸ ਦੀਆਂ ਅੱਖਾਂ, ਗਲੇ ਅਤੇ ਮੂੰਹ ‘ਤੇ ਮਿਰਚ ਦਾ ਸਪਰੇਅ ਪਾ ਦਿੱਤਾ। ਉਸ ਨੇ ਦੱਸਿਆ ਕਿ ਉਸ ਦੀਆਂ ਅੱਖਾਂ ‘ਚ ਸਪਰੇਅ ਹੋਣ ਕਰਕੇ ਉਹ ਕੁਝ ਵੀ ਨਹੀਂ ਦੇਖ ਸਕਿਆ ਪਰ ਕਿਸੇ ਤਰ੍ਹਾਂ ਸਟੋਰ ਦੇ ਅੰਦਰ ਲੁਕੇ ਪੈਨਿਕ ਬਟਨ ਤੱਕ ਪਹੁੰਚ ਗਿਆ ਅਤੇ ਉਸ ਨੂੰ ਦਬਾ ਕੇ ਪੁਲਿਸ ਨੂੰ ਮਦਦ ਲਈ ਬੁਲਾਇਆ।
ਘਟਨਾ ਵਾਲੀ ਥਾਂ ਦੀਆਂ ਤਸਵੀਰਾਂ ਸਾਹਮਣੇ ਆਈਆਂ ਹਨ। ਇਸ ਵਿੱਚ, ਪੂਰੇ ਸਟੋਰ ਵਿੱਚ ਟੁੱਟੇ ਡਿਸਪਲੇ ਦੇ ਕੇਸ ਦਿਖਾਈ ਦੇ ਰਹੇ ਸਨ। ਇਸ ਤੋਂ ਇਲਾਵਾ, ਖਾਲੀ ਗਹਿਣਿਆਂ ਦੀਆਂ ਟਰੇਆਂ ਅਤੇ ਹੋਲਡਰਾਂ ਨੂੰ ਜ਼ਮੀਨ ‘ਤੇ ਵਿਛਿਆ ਦੇਖਿਆ ਗਿਆ।
