ਛੱਤੀਸਗੜ੍ਹ ਦੇ ਜਗਦਲਪੁਰ ਦੇ ਕਈ ਇਲਾਕਿਆਂ ‘ਚ ਬੁੱਧਵਾਰ ਰਾਤ 7 ਮਿੰਟ ਦੇ ਅੰਤਰਾਲ ‘ਚ ਭੂਚਾਲ ਦੇ ਦੋ ਝਟਕੇ ਮਹਿਸੂਸ ਕੀਤੇ ਗਏ। ਸ਼ਹਿਰ ਦੇ ਅਮਾਗੁਡਾ, ਕੁਮਹਾਰਪਾੜਾ, ਪਥਰਾਗੁਡਾ ਤੋਂ ਇਲਾਵਾ ਪੇਂਡੂ ਖੇਤਰਾਂ ਅਡਵਾਲ, ਸੇਮਰਾ, ਕਰਕਪਾਲ ਵਿੱਚ ਵੀ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ।
ਦੱਸਿਆ ਜਾ ਰਿਹਾ ਹੈ ਕਿ ਇਹ ਭੂਚਾਲ ਸ਼ਾਮ 7.53 ਅਤੇ 8.05 ਵਜੇ ਆਇਆ। ਨੈਸ਼ਨਲ ਸੈਂਟਰ ਫਾਰ ਸਿਸਮੋਲੋਜੀ ਅਨੁਸਾਰ ਜਗਦਲਪੁਰ ਤੋਂ 2 ਕਿਲੋਮੀਟਰ ਉੱਤਰ-ਪੂਰਬ ਵਿਚ 5 ਕਿਲੋਮੀਟਰ ਦੀ ਡੂੰਘਾਈ ਵਿਚ 2.6 ਤੀਬਰਤਾ ਦਾ ਭੂਚਾਲ ਆਇਆ। ਇਸ ਤੋਂ ਬਾਅਦ ਇਲਾਕੇ ਦੇ ਲੋਕ ਡਰ ਦੇ ਮਾਰੇ ਘਰਾਂ ਤੋਂ ਬਾਹਰ ਆ ਗਏ।
ਲੋਕਾਂ ਨੇ ਦੱਸਿਆ ਕਿ ਭੂਚਾਲ ਦੇ ਝਟਕੇ ਮਹਿਸੂਸ ਹੁੰਦੇ ਹੀ ਉਹ ਆਪਣੇ ਘਰਾਂ ਅਤੇ ਦੁਕਾਨਾਂ ਤੋਂ ਬਾਹਰ ਆ ਗਏ। ਅਚਾਨਕ ਉਨ੍ਹਾਂ ਨੂੰ 2 ਤੋਂ 3 ਵਾਰ ਤੇਜ਼ ਝਟਕੇ ਮਹਿਸੂਸ ਹੋਏ। ਜਿਸ ਕਾਰਨ ਉਹ ਡਰ ਗਏ। ਲੋਕ ਆਪਣੀਆਂ ਦੁਕਾਨਾਂ-ਘਰ ਛੱਡ ਕੇ ਬਾਹਰ ਆ ਗਏ, ਇਸ ਡਰੋਂ ਕਿ ਕਿਤੇ ਉਨ੍ਹਾਂ ਦੀ ਦੁਕਾਨ ਜਾਂ ਘਰ ਢਹਿ ਨਾ ਜਾਵੇ।