ਕਸ਼ਮੀਰ ਵਿੱਚ 22 ਮਈ ਨੂੰ ਸ਼ੁਰੂ ਹੋਈ ਜੀ-20 ਟੂਰਿਜ਼ਮ ਵਰਕਿੰਗ ਗਰੁੱਪ ਦੀ ਮੀਟਿੰਗ ਦਾ ਅੱਜ ਦੂਜਾ ਦਿਨ ਹੈ। ਇਹ ਮੀਟਿੰਗ ਸ਼ੇਰ-ਏ-ਕਸ਼ਮੀਰ ਇੰਟਰਨੈਸ਼ਨਲ ਕਾਨਫਰੰਸ ਸੈਂਟਰ ਵਿੱਚ ਹੋ ਰਹੀ ਹੈ। ਮੀਟਿੰਗ ਵਿੱਚ ਸ਼ਾਮਲ ਹੋਣ ਲਈ ਆਏ ਡੈਲੀਗੇਟ ਅੱਜ ਕਸ਼ਮੀਰ ਦੀਆਂ ਕਈ ਖੂਬਸੂਰਤ ਥਾਵਾਂ ਜਿਵੇਂ ਪਰੀ ਮਹਿਲ, ਚਸ਼ਮਾ ਸ਼ਾਹੀ, ਨਿਸ਼ਾਤ ਗਾਰਡਨ, ਪੋਲੋ ਵਿਊ ਮਾਰਕੀਟ ਦਾ ਦੌਰਾ ਕਰਨਗੇ। ਇਸ ਤੋਂ ਬਾਅਦ ਡੈਲੀਗੇਟਾਂ ਲਈ ਵਿਸ਼ੇਸ਼ ਡਿਨਰ ਦਾ ਵੀ ਆਯੋਜਨ ਕੀਤਾ ਜਾਵੇਗਾ।
ਦੱਸ ਦਈਏ ਕਿ ਇਸ ਬੈਠਕ ‘ਚ ਚੀਨ, ਸਾਊਦੀ ਅਰਬ, ਤੁਰਕੀ, ਇੰਡੋਨੇਸ਼ੀਆ ਅਤੇ ਮਿਸਰ ਹਿੱਸਾ ਨਹੀਂ ਲੈ ਰਹੇ ਹਨ। ਦੂਜੇ ਪਾਸੇ 22 ਮਈ ਨੂੰ ਸ੍ਰੀਨਗਰ ਪਹੁੰਚੇ ਹੋਰ ਵਿਦੇਸ਼ੀ ਡੈਲੀਗੇਟਾਂ ਦਾ ਹਵਾਈ ਅੱਡੇ ‘ਤੇ ਰਵਾਇਤੀ ਪੁਸ਼ਾਕਾਂ ‘ਚ ਕਸ਼ਮੀਰੀ ਕੁੜੀਆਂ ਵੱਲੋਂ ਸਵਾਗਤ ਕੀਤਾ ਗਿਆ। ਮੀਟਿੰਗ ਵਿੱਚ ਮਹਿਮਾਨ ਵਜੋਂ ਪੁੱਜੇ ਫ਼ਿਲਮ ਅਦਾਕਾਰ ਰਾਮਚਰਨ ਤੇਜਾ ਨੇ ਆਪਣੀ ਫ਼ਿਲਮ ‘ਆਰ.ਆਰ.ਆਰ.’ ਦੇ ਮਸ਼ਹੂਰ ਗੀਤ ‘ਨਟੂ-ਨਾਟੂ’ ‘ਤੇ ਡੈਲੀਗੇਟਾਂ ਨਾਲ ਡਾਂਸ ਕੀਤਾ। ਉਨ੍ਹਾਂ ਨੇ ਕਿਹਾ-ਕਸ਼ਮੀਰ ਵਿੱਚ ਕੁਝ ਜਾਦੂ ਹੈ। ਮੈਂ 1986 ਤੋਂ ਬਾਅਦ ਕਈ ਵਾਰ ਇੱਥੇ ਆਇਆ ਹਾਂ। ਮੇਰੇ ਪਿਤਾ ਜੀ ਫਿਲਮਾਂ ਦੀ ਸ਼ੂਟਿੰਗ ਲਈ ਗੁਲਮਰਗ ਅਤੇ ਸੋਨਮਰਗ ਆਉਂਦੇ ਸਨ। ਮੈਂ ਖੁਦ 2016 ਵਿੱਚ ਇੱਥੇ ਇੱਕ ਸ਼ੂਟ ਲਈ ਆਇਆ ਸੀ। ਜੀ-20 ਇੰਡੀਅਨ ਪ੍ਰੈਜ਼ੀਡੈਂਸੀ ਦੇ ਚੀਫ ਕੋਆਰਡੀਨੇਟਰ ਹਰਸ਼ਵਰਧਨ ਸ਼੍ਰਿੰਗਲਾ ਨੇ ਕਿਹਾ ਕਿ ਇਸ ਬੈਠਕ ‘ਚ ਸ਼ਾਮਲ ਹੋਣ ਵਾਲੇ ਡੈਲੀਗੇਟ ਇੱਥੇ ਆ ਕੇ ਦੇਖ ਸਕਣਗੇ ਕਿ ਧਰਤੀ ‘ਤੇ ਸਵਰਗ ਕਿਹੋ ਜਿਹਾ ਹੁੰਦਾ ਹੈ। ਟੂਰਿਜ਼ਮ ਵਰਕਿੰਗ ਗਰੁੱਪ ਦੀ ਇਹ ਮੀਟਿੰਗ 22 ਤੋਂ 24 ਮਈ ਤੱਕ ਹੋਵੇਗੀ।