14 ਅਪ੍ਰੈਲ ਨੂੰ ਡਾ: ਬਾਬਾ ਸਾਹਿਬ ਅੰਬੇਡਕਰ ਦੇ ਜਨਮ ਦਿਨ ‘ਤੇ ਕ੍ਰਾਂਤੀ ਚੌਕ ‘ਚ ਹਰ ਕੋਈ ਗੀਤਾਂ ਦੀ ਧੁਨ ‘ਚ ਮਗਨ ਸੀ। ਸ਼ਹਿਰ ਦੇ ਸਮਾਗਮ ਲਈ ਪੁਣੇ ਤੋਂ 15 ਡੀਜੇ ਬੁਲਾਏ ਗਏ ਸਨ। ਕੰਨ ਪਾੜਨ ਵਾਲੇ ਡੀਜੇ ਅੱਗੇ ਨੌਜਵਾਨ ਜ਼ੋਰਦਾਰ ਡਾਂਸ ਕਰ ਰਹੇ ਸੀ। ਇਨ੍ਹਾਂ ਡੀਜੇ ਦੀ ਆਵਾਜ਼ ਲਗਭਗ 150 ਡੈਸੀਬਲ ਸੀ।
ਦੱਸ ਦਈਏ ਕਿ ਅਚਾਨਕ ਡੀਜੇ ਦੀ ਆਵਾਜ਼ ਇੰਨੀ ਉੱਚੀ ਹੋ ਗਈ ਕਿ ਹਰ ਕੋਈ ਸੁੰਨ ਮਹਿਸੂਸ ਕਰਨ ਲੱਗਾ। ਡੀਜੇ ਦੀ ਉੱਚੀ ਆਵਾਜ਼ ਸੁਣ ਕੇ 250 ਲੋਕਾਂ ਦੀ ਸਿਹਤ ਅਚਾਨਕ ਵਿਗੜ ਗਈ। ਕਿਸੇ ਨੂੰ ਕੁਝ ਵੀ ਨਹੀਂ ਸੁਣਾਈ ਦੇ ਰਿਹਾ ਸੀ। ਫਿਰ ਹਫੜਾ ਦਫੜੀ ਮੱਚ ਗਈ। ਇਨ੍ਹਾਂ ਸਾਰੇ ਮਰੀਜ਼ਾਂ ਨੂੰ 70 ਹਸਪਤਾਲਾਂ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ। ਇਸ ਘਟਨਾ ਦੀ ਸੂਚਨਾ ਮਿਲਣ ਤੋਂ ਬਾਅਦ ਪੁਲਿਸ ਨੇ ਮਾਮਲਾ ਦਰਜ ਕਰ ਲਿਆ ਹੈ।
ਦੱਸਣਯੋਗ ਹੈ ਕਿ ਨਿਰਧਾਰਿਤ ਸੀਮਾ ਤੋਂ ਵੱਧ ਮਾਤਰਾ ਵਿੱਚ ਡੀਜੇ ਵਜਾਉਣ ਲਈ ਤਿੰਨ ਸਰਕਲਾਂ ਨੂੰ ਬੁੱਕ ਕੀਤਾ ਗਿਆ ਸੀ। ਕ੍ਰਾਂਤੀ ਚੌਕ ਪੁਲਿਸ ਨੇ ਸ਼ੋਰ ਪ੍ਰਦੂਸ਼ਣ ਐਕਟ ਦੀ ਉਲੰਘਣਾ ਕਰਨ ਦੇ ਦੋਸ਼ ‘ਚ ਭਾਰਤੀ ਦੰਡਾਵਲੀ ਦੇ ਨਾਲ-ਨਾਲ ਵਾਤਾਵਰਣ ਸੁਰੱਖਿਆ ਐਕਟ ਅਤੇ ਸ਼ੋਰ ਪ੍ਰਦੂਸ਼ਣ ਰੈਗੂਲੇਸ਼ਨ ਐਂਡ ਕੰਟਰੋਲ ਐਕਟ ਤਹਿਤ ਤਿੰਨ ਸਰਕਲਾਂ ਖਿਲਾਫ ਮਾਮਲਾ ਦਰਜ ਕੀਤਾ ਹੈ।
