ਓਡੀਸ਼ਾ ਦੇ ਪੁਰੀ ‘ਚ ਜਗਨਨਾਥ ਮੰਦਰ ਦੇ ਦਰਸ਼ਨਾਂ ਲਈ ਜਾਣ ਵਾਲੇ ਸ਼ਰਧਾਲੂਆਂ ਨੂੰ ਹੁਣ ਡਰੈਸ ਕੋਡ ਦੀ ਪਾਲਣਾ ਕਰਨੀ ਹੋਵੇਗੀ। ਮੰਦਰ ਪ੍ਰਬੰਧਨ ਨੇ ਦੱਸਿਆ ਕਿ ਡਰੈੱਸ ਕੋਡ ਅਗਲੇ ਸਾਲ 1 ਜਨਵਰੀ ਤੋਂ ਲਾਗੂ ਹੋ ਜਾਵੇਗਾ। ਭਗਤਾਂ ਨੂੰ ਅੱਜ ਤੋਂ ਹੀ ਡਰੈੱਸ ਕੋਡ ਬਾਰੇ ਜਾਗਰੂਕ ਕੀਤਾ ਜਾਵੇਗਾ। ਦੱਸ ਦਈਏ ਕਿ ਡਰੈੱਸ ਕੋਡ ਲਾਗੂ ਹੋਣ ਤੋਂ ਬਾਅਦ ਲੋਕ ਹਾਫ ਪੈਂਟ, ਕਟੀ-ਫਟੀ ਜੀਨਸ, ਸਕਰਟ ਅਤੇ ਸਲੀਵਲੇਸ ਕੱਪੜੇ ਪਾ ਕੇ ਜਗਨਨਾਥ ਮੰਦਰ ਨਹੀਂ ਜਾ ਸਕਣਗੇ। ਇਹ ਫੈਸਲਾ ਮੰਦਰ ਦੀ ਨੀਤੀ ਸਬ-ਕਮੇਟੀ ਦੀ ਮੀਟਿੰਗ ਵਿੱਚ ਲਿਆ ਗਿਆ ਹੈ।
ਹਾਲਾਂਕਿ ਮੰਦਰ ‘ਚ ਕਿਸ ਤਰ੍ਹਾਂ ਦੇ ਕੱਪੜੇ ਪਹਿਨਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ, ਇਸ ਬਾਰੇ ਅਜੇ ਫੈਸਲਾ ਨਹੀਂ ਹੋਇਆ ਹੈ। ਜਗਨਨਾਥ ਮੰਦਰ ਦੇ ਪ੍ਰਬੰਧਕੀ ਮੁਖੀ ਰੰਜਨ ਕੁਮਾਰ ਦਾਸ ਨੇ ਦੱਸਿਆ ਕਿ ਕੁਝ ਲੋਕ ਅਸੱਭਿਅਕ ਕੱਪੜੇ ਪਾ ਕੇ ਮੰਦਰ ਦੇ ਅੰਦਰ ਆਉਂਦੇ ਹਨ। ਕੁਝ ਲੋਕ ਹਾਫ ਪੈਂਟ ਅਤੇ ਸਲੀਵਲੇਸ ਕੱਪੜਿਆਂ ਵਿਚ ਇਸ ਤਰ੍ਹਾਂ ਆਉਂਦੇ ਹਨ, ਜਿਵੇਂ ਉਹ ਬੀਚ ਜਾਂ ਪਾਰਕ ਵਿਚ ਸੈਰ ਕਰਨ ਆਏ ਹੋਣ। ਮੰਦਰ ਮਨੋਰੰਜਨ ਦੀ ਜਗ੍ਹਾ ਨਹੀਂ ਹੈ। ਇਸ ਨਾਲ ਹੋਰਨਾਂ ਲੋਕਾਂ ਦੀਆਂ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਦੀ ਹੈ।
ਜਗਨਨਾਥ ਮੰਦਿਰ ਪ੍ਰਬੰਧਕਾਂ ਦੇ ਮੁਖੀ ਨੇ ਕਿਹਾ ਕਿ ਮੰਦਰ ਦੀ ਮਰਿਆਦਾ ਅਤੇ ਪਵਿੱਤਰਤਾ ਨੂੰ ਕਾਇਮ ਰੱਖਣਾ ਸਾਡੀ ਜ਼ਿੰਮੇਵਾਰੀ ਹੈ। ਇਸ ਲਈ 1 ਜਨਵਰੀ 2024 ਤੋਂ ਡਰੈੱਸ ਕੋਡ ਦੀ ਸਖ਼ਤੀ ਨਾਲ ਪਾਲਣਾ ਕੀਤੀ ਜਾਵੇਗੀ। ਮੰਦਰ ਦੇ ਸਿੰਘ ਦਵਾਰ ‘ਤੇ ਤਾਇਨਾਤ ਸੁਰੱਖਿਆ ਬਲ ਅਤੇ ਮੰਦਰ ਦੇ ਅੰਦਰ ਮੌਜੂਦ ਪ੍ਰਤੀਹਾਰੀ ਸੇਵਕ ਇਸ ‘ਤੇ ਨਜ਼ਰ ਰੱਖਣਗੇ।