ਕੇਰਲ ਵਿੱਚ ਇੱਕ ਮੱਛੀ ਵੇਚਣ ਵਾਲੇ ਦੀ ਮਿੰਟਾ ‘ਚ ਕਿਸਮਤ ਖੁੱਲ ਗਈ। ਉਸ ਨੇ 70 ਲੱਖ ਰੁਪਏ ਦੀ ਲਾਟਰੀ ਜਿੱਤੀ ਹੈ। ਉਸ ਦਾ ਨਾਂ ਪੁਕੰਜੂ ਦੱਸਿਆ ਜਾ ਰਿਹਾ ਹੈ। ਉਸ ਨੇ ਉਸ ਸਮੇਂ ਲਾਟਰੀ ਜਿੱਤੀ ਜਦੋਂ ਉਸ ਨੂੰ ਬੈਂਕ ਤੋਂ ਕੁਰਕੀ ਦਾ ਨੋਟਿਸ ਮਿਲਿਆ ਸੀ। ਦੀਵਾਲੀ ਤੋਂ ਪਹਿਲਾਂ ਲਕਸ਼ਮੀ ਦੀ ਅਜਿਹੀ ਕਿਰਪਾ ਨਾਲ ਇਨਸਾਨ ਦੀ ਕਿਸਮਤ ਖੁੱਲ੍ਹ ਜਾਂਦੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਹਰ ਰੋਜ਼ ਲਾਟਰੀ ਦੀਆਂ ਟਿਕਟਾਂ ਖਰੀਦਦਾ ਸੀ। 12 ਅਕਤੂਬਰ ਨੂੰ ਵੀ ਉਸ ਨੇ ਆਪਣੇ ਦਿਨ ਦੀ ਸ਼ੁਰੂਆਤ ਆਮ ਵਾਂਗ ਲਾਟਰੀ ਟਿਕਟ ਖਰੀਦ ਕੇ ਕੀਤੀ, ਇਸ ਵਾਰ ਉਸ ਨੂੰ 70 ਲੱਖ ਰੁਪਏ ਦਾ ਪਹਿਲਾ ਇਨਾਮ ਮਿਲਿਆ।
ਪੁਕੰਜੂ ਨੇ ਦੱਸਿਆ ਕਿ ਜਦੋਂ ਉਹ ਦੁਪਹਿਰ ਬਾਅਦ ਘਰ ਪਰਤਿਆ ਤਾਂ ਉਸ ਨੂੰ ਪਤਾ ਲੱਗਾ ਕਿ ਬੈਂਕ ਨੇ ਉਸ ਦੇ ਘਰ ਦੇ ਸਬੰਧ ਵਿੱਚ ਕੁਰਕੀ ਦਾ ਨੋਟਿਸ ਭੇਜਿਆ ਹੈ। ਉਸ ਨੇ ਬੈਂਕ ਤੋਂ ਕਰੀਬ ਨੌਂ ਲੱਖ ਰੁਪਏ ਦਾ ਕਰਜ਼ਾ ਲਿਆ ਸੀ। ਉਹ ਇਸ ਦਾ ਭੁਗਤਾਨ ਕਰਨ ਤੋਂ ਅਸਮਰੱਥ ਸੀ। ਪੁਕੰਜੂ ਦੀ ਪਤਨੀ ਨੇ ਦੱਸਿਆ ਕਿ ਬੈਂਕ ਤੋਂ ਨੋਟਿਸ ਮਿਲਣ ਤੋਂ ਬਾਅਦ ਅਸੀਂ ਨਿਰਾਸ਼ ਹੋ ਗਏ।ਪੁਕੰਜੂ ਦੇ ਦੋ ਬੱਚੇ ਹਨ, ਇੱਕ ਲੜਕਾ ਅਤੇ ਇੱਕ ਲੜਕੀ। ਦੋਵੇਂ ਪੜ੍ਹਦੇ ਹਨ। ਪੁਕੰਜੂ ਨੇ ਕਿਹਾ ਕਿ ਇਸ ਰਕਮ ਨਾਲ ਉਹ ਆਪਣਾ ਕਰਜ਼ਾ ਚੁਕਾਉਣਗੇ ਅਤੇ ਬੱਚਿਆਂ ਦੀ ਚੰਗੀ ਦੇਖਭਾਲ ਕਰਨਗੇ।