ਪਟਨਾ ਦੇ ਸੀਨੀਅਰ ਸੁਪਰਡੈਂਟ ਆਫ ਪੁਲਿਸ (ਐਸਐਸਪੀ) ਮਾਨਵਜੀਤ ਸਿੰਘ ਢਿੱਲੋਂ ਇੱਕ ਵਿਵਾਦ ਵਿੱਚ ਘਿਰ ਗਏ ਹਨ। ਉਨ੍ਹਾਂ ਵੱਲੋ ਦਿੱਤੇ ਵਿਵਾਇਤ ਬਿਆਨ ਨੂੰ ਲੈ ਕੇ ਸਿਆਸੀ ਹੰਗਾਮਾ ਮਚਿਆ ਹੋਇਆ ਹੈ। ਦੱਸ ਦਈਏ ਕਿ ਉਨ੍ਹਾਂ ਨੇ ਕੱਟੜਪੰਥੀ ਸੰਗਠਨ ਪਾਪੂਲਰ ਫਰੰਟ ਆਫ ਇੰਡੀਆ (ਪੀਐਫਆਈ) ਦੀ ਤੁਲਨਾ ਆਰਐਸਐਸ ਨਾਲ ਕੀਤੀ ਹੈ । ਉਨ੍ਹਾਂ ਦੀਆਂ ਟਿੱਪਣੀਆਂ ‘ਤੇ ਸੱਤਾਧਾਰੀ ਭਾਜਪਾ ਨੇਤਾਵਾਂ ਨੇ ਕਾਰਵਾਈ ਦੀ ਮੰਗ ਕੀਤੀ ਹੈ।
ਦੱਸ ਦਈਏ ਕਿ ਮਾਨਵਜੀਤ ਸਿੰਘ ਢਿੱਲੋਂ ਪਟਨਾ ਦੇ ਸੀਨੀਅਰ ਸੁਪਰਡੈਂਟ ਆਫ ਪੁਲਿਸ ਹਨ। ਇਸ ਤੋਂ ਪਹਿਲਾਂ ਮਾਨਵਜੀਤ ਸਿੰਘ ਢਿੱਲੋਂ ਉਦੋਂ ਚਰਚਾ ਵਿੱਚ ਰਹੇ ਸਨ ਜਦੋਂ ਉਨ੍ਹਾਂ ਨੇ ਵੈਸ਼ਾਲੀ ਵਿੱਚ ਐਸਪੀ ਹੁੰਦਿਆਂ ਲਾਪਰਵਾਹੀ ਵਰਤਣ ਵਾਲੇ 3 ਡੀਐਸਪੀ ਸਮੇਤ 66 ਪੁਲੀਸ ਮੁਲਾਜ਼ਮਾਂ ਖ਼ਿਲਾਫ਼ ਐਫਆਈਆਰ ਦਰਜ ਕਰਵਾਈ ਸੀ। ਜ਼ਿਕਰਯੋਗ ਹੈ ਕਿ ਪੰਜਾਬ ਦੇ ਰਹਿਣ ਵਾਲੇ ਮਾਨਵਜੀਤ ਸਿੰਘ ਢਿੱਲੋਂ 2009 ਵਿੱਚ ਬਿਹਾਰ ਕੇਡਰ ਦੇ ਆਈ.ਪੀ.ਐਸ ਹਨ। ਪਟਨਾ ਦੇ ਐਸਐਸਪੀ ਬਣਨ ਤੋਂ ਪਹਿਲਾਂ ਉਹ ਸਮਸਤੀਪੁਰ ਦੇ ਐਸਪੀ ਸਨ।
ਉਨ੍ਹਾਂ ਦੀ ਪਤਨੀ ਹਰਪ੍ਰੀਤ ਕੌਰ ਵੀ ਬਿਹਾਰ ਕੇਡਰ ਦੀ ਆਈਪੀਐਸ ਅਧਿਕਾਰੀ ਹੈ। ਦੋਵੇਂ ਬਹੁਤ ਸਖਤ ਮਿਜ਼ਾਜ਼ ਵਾਲੇ ਅਫਸਰ ਮੰਨੇ ਜਾਂਦੇ ਹਨ। ਮੁਜ਼ੱਫਰਪੁਰ ਦੀ ਐਸਐਸਪੀ ਹੁੰਦਿਆਂ ਹਰਪ੍ਰੀਤ ਕੌਰ ਲੜਕੀ ਗ੍ਰਹਿ ਘੁਟਾਲੇ ਨੂੰ ਲੈ ਕੇ ਚਰਚਾ ਵਿੱਚ ਆਈ ਸੀ। ਇਹ ਮਾਮਲਾ ਕਾਫੀ ਸੁਰਖੀਆਂ ਵਿੱਚ ਰਿਹਾ ਸੀ ਅਤੇ ਕਈ ਵੱਡੇ ਖੁਲਾਸੇ ਹੋਏ ਸਨ।
ਦੱਸ ਦਈਏ ਕਿ ਏਡੀਜੀ ਪੁਲਿਸ ਹੈੱਡਕੁਆਰਟਰ ਜਤਿੰਦਰ ਸਿੰਘ ਗੰਗਵਾਰ ਨੇ ਪਟਨਾ ਦੇ ਐਸਐਸਪੀ ਮਾਨਵਜੀਤ ਸਿੰਘ ਢਿੱਲੋਂ ਨੂੰ ਉਨ੍ਹਾਂ ਦੇ ਵਿਵਾਦਿਤ ਬਿਆਨ ਲਈ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਹੈ। ਨੋਟਿਸ ਰਾਹੀਂ ਏਡੀਜੀ ਪੁਲਿਸ ਹੈੱਡਕੁਆਰਟਰ ਜਤਿੰਦਰ ਸਿੰਘ ਗੰਗਵਾਰ ਨੇ ਐਸਐਸਪੀ ਨੂੰ ਪੁੱਛਿਆ ਕਿ ਉਨ੍ਹਾਂ ਨੇ ਅਜਿਹਾ ਬਿਆਨ ਕਿਉਂ ਦਿੱਤਾ, 48 ਘੰਟਿਆਂ ਦੇ ਅੰਦਰ ਜਵਾਬ ਦੇਣ ਲਈ ਵੀ ਕਿਹਾ ਗਿਆ ਹੈ।