ਮਲੇਸ਼ੀਆ ਦੀ ਰਾਜਧਾਨੀ ਕੁਆਲਾਲੰਪੁਰ ਦੇ ਸੇਲਾਂਗਰ ਸ਼ਹਿਰ ਵਿੱਚ ਜ਼ਮੀਨ ਖਿਸਕਣ ਦੀ ਘਟਨਾ ਵਾਪਰੀ ਹੈ। ਇਸ ‘ਚ ਹੁਣ ਤੱਕ 16 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। 17 ਲੋਕ ਲਾਪਤਾ ਦੱਸੇ ਜਾ ਰਹੇ ਹਨ। ਫਾਇਰ ਐਂਡ ਰੈਸਕਿਊ ਵਿਭਾਗ ਮੁਤਾਬਕ ਮਲਬੇ ‘ਚੋਂ 23 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ। ਖੋਜ ਅਤੇ ਬਚਾਅ ਕਾਰਜ ਜਾਰੀ ਹੈ। ਕਈ ਲੋਕ ਅਜੇ ਵੀ ਮਲਬੇ ਹੇਠ ਦੱਬੇ ਹੋਏ ਹਨ। ਇਨ੍ਹਾਂ ਨੂੰ ਲੱਭਣ ਲਈ 400 ਦੇ ਕਰੀਬ ਪੁਲਿਸ ਮੁਲਾਜ਼ਮ ਤਾਇਨਾਤ ਕੀਤੇ ਗਏ ਹਨ।
ਜਾਣਕਾਰੀ ਮੁਤਾਬਿਕ ਇਹ ਘਟਨਾ ਸੇਲਾਂਗਰ ਸ਼ਹਿਰ ਦੇ ਬਤੰਗ ਕਾਲੀ ਇਲਾਕੇ ਦੀ ਹੈ। ਇਹ ਜਗ੍ਹਾ ਪਿਕਨਿਕ ਸਪਾਟ ਹੈ। ਇੱਥੇ ਕੈਂਪਾਂ ਵਿੱਚ 90 ਤੋਂ ਵੱਧ ਲੋਕ ਮੌਜੂਦ ਸਨ। ਪੁਲਿਸ ਮੁਖੀ ਸੂਫ਼ੀਆਨ ਅਬਦੁੱਲਾ ਨੇ ਕਿਹਾ ਕਿ ਚੱਟਾਨਾਂ 30 ਮੀਟਰ ਯਾਨੀ ਕਿ ਲਗਭਗ 98 ਫੁੱਟ ਦੀ ਉੱਚਾਈ ਤੋਂ ਸੜਕ ‘ਤੇ ਡਿੱਗੀਆਂ ਅਤੇ 1.2 ਹੈਕਟੇਅਰ ਖੇਤਰ ਵਿੱਚ ਫੈਲ ਗਈਆਂ। ਆਲੇ-ਦੁਆਲੇ ਦਾ ਮੰਜਰ ਬਹੁਤ ਖ਼ਤਰਨਾਕ ਸੀ।