ਭਾਰਤੀ ਜਲ ਸੈਨਾ ਨੇ ਹਿੰਦ ਮਹਾਸਾਗਰ ਵਿੱਚ ਸੋਮਾਲੀਅਨ ਸਮੁੰਦਰੀ ਡਾਕੂਆਂ ਤੋਂ ਇੱਕ ਬੰਗਲਾਦੇਸ਼ੀ ਜਹਾਜ਼ ਨੂੰ ਬਚਾਇਆ ਹੈ। ਦਰਅਸਲ 12 ਮਾਰਚ ਨੂੰ ਮੋਜ਼ਾਮਬੀਕ ਤੋਂ ਸੰਯੁਕਤ ਅਰਬ ਅਮੀਰਾਤ (ਯੂਏਈ) ਜਾ ਰਹੇ ਬੰਗਲਾਦੇਸ਼ੀ ਵਪਾਰੀ ਜਹਾਜ਼ ਅਬੁੱਲਾ ‘ਤੇ 15-20 ਹਥਿਆਰਬੰਦ ਲੁਟੇਰਿਆਂ ਨੇ ਹਮਲਾ ਕਰ ਦਿੱਤਾ ਸੀ।ਇਹ ਜਹਾਜ਼ ਸੋਮਾਲੀਆ ਦੀ ਰਾਜਧਾਨੀ ਮੋਗਾਦਿਸ਼ੂ ਤੋਂ ਕਰੀਬ 1100 ਕਿਲੋਮੀਟਰ ਦੂਰ ਸੀ। ਜਹਾਜ਼ ਵਿੱਚ ਬੰਗਲਾਦੇਸ਼ ਦੇ 23 ਕਰੂ ਮੈਂਬਰ ਸਵਾਰ ਸਨ।
ਹਾਈਜੈਕ ਦੀ ਸੂਚਨਾ ਮਿਲਦੇ ਹੀ ਭਾਰਤੀ ਜਲ ਸੈਨਾ ਨੇ ਚਾਲਕ ਦਲ ਦੇ ਮੈਂਬਰਾਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ। ਇਸ ਤੋਂ ਬਾਅਦ ਜਦੋਂ ਕੋਈ ਜਵਾਬ ਨਹੀਂ ਮਿਲਿਆ ਤਾਂ ਜਲ ਸੈਨਾ ਨੇ ਆਪਣੇ ਗਸ਼ਤੀ ਜਹਾਜ਼ ਨੂੰ ਜਹਾਜ਼ ਦੀ ਨਿਗਰਾਨੀ ਲਈ ਭੇਜਿਆ। ਦੱਸ ਦਈਏ ਕਿ 14 ਮਾਰਚ ਦੀ ਸਵੇਰ ਨੂੰ ਭਾਰਤੀ ਜੰਗੀ ਬੇੜੇ ਨੇ ਐਮਵੀ ਅਬਦੁੱਲਾ ਨੂੰ ਬਚਾਇਆ ਸੀ।
ਭਾਰਤੀ ਜਲ ਸੈਨਾ ਮੁਤਾਬਕ ਜਹਾਜ਼ ‘ਚ ਮੌਜੂਦ ਸਾਰੇ ਚਾਲਕ ਦਲ ਦੇ ਮੈਂਬਰ ਸੁਰੱਖਿਅਤ ਹਨ। ਇਹ ਜਹਾਜ਼ ਬੰਗਲਾਦੇਸ਼ ਦੀ ਕਬੀਰ ਸਟੀਲ ਰੀ-ਰੋਲਿੰਗ ਮਿੱਲਜ਼ ਨਾਂ ਦੀ ਕੰਪਨੀ ਦਾ ਹੈ। ਇਸ ‘ਤੇ ਕਰੀਬ 55 ਹਜ਼ਾਰ ਟਨ ਕੋਲਾ ਮੌਜੂਦ ਸੀ। ਅਗਵਾ ਕਰਨ ਤੋਂ ਬਾਅਦ, 13 ਮਾਰਚ ਨੂੰ, ਬੰਗਲਾਦੇਸ਼ੀ ਮੀਡੀਆ ਢਾਕਾ ਟ੍ਰਿਬਿਊਨ ਨੇ ਜਹਾਜ਼ ‘ਤੇ ਚਾਲਕ ਦਲ ਦੇ ਇਕ ਮੈਂਬਰ ਦੇ ਹਵਾਲੇ ਨਾਲ ਕਿਹਾ ਕਿ ਉਨ੍ਹਾਂ ‘ਤੇ ਲਗਭਗ 50 ਸਮੁੰਦਰੀ ਡਾਕੂਆਂ ਨੇ ਹਮਲਾ ਕੀਤਾ ਸੀ।
ਅਫਰੀਕਾ ਦੇ ਸਮੁੰਦਰੀ ਸੁਰੱਖਿਆ ਕੇਂਦਰ ਮੁਤਾਬਕ ਪਿਛਲੇ ਸਾਲ ਨਵੰਬਰ ਤੋਂ ਲੈ ਕੇ ਹੁਣ ਤੱਕ ਅਦਨ ਦੀ ਖਾੜੀ ‘ਚ ਜਹਾਜ਼ਾਂ ਨੂੰ ਹਾਈਜੈਕ ਕਰਨ ਦੀਆਂ 20 ਕੋਸ਼ਿਸ਼ਾਂ ਹੋ ਚੁੱਕੀਆਂ ਹਨ। ਪਿਛਲੇ ਸਾਲ ਇਜ਼ਰਾਈਲ-ਹਮਾਸ ਯੁੱਧ ਦੀ ਸ਼ੁਰੂਆਤ ਤੋਂ ਬਾਅਦ ਅਰਬ ਅਤੇ ਲਾਲ ਸਾਗਰ ਵਿੱਚ ਵਪਾਰੀ ਜਹਾਜ਼ਾਂ ‘ਤੇ ਹਮਲਿਆਂ ਦੀਆਂ ਘਟਨਾਵਾਂ ਲਗਾਤਾਰ ਵਧ ਰਹੀਆਂ ਹਨ। ਅਲ ਜਜ਼ੀਰਾ ਦੇ ਅਨੁਸਾਰ, ਆਖਰੀ ਵਾਰ ਸੋਮਾਲੀ ਸਮੁੰਦਰੀ ਡਾਕੂਆਂ ਨੇ 2008 ਤੋਂ 2018 ਤੱਕ ਜਹਾਜ਼ ‘ਤੇ ਹਮਲਾ ਕੀਤਾ ਸੀ। ਹਾਲਾਂਕਿ 2018 ਤੋਂ ਬਾਅਦ ਅਜਿਹੀਆਂ ਘਟਨਾਵਾਂ ਵਿੱਚ ਕਾਫੀ ਕਮੀ ਆਈ ਹੈ।
