ਅੱਜ ਪੂਰਾ ਦੇਸ਼ ਸੁਤੰਤਰਤਾ ਦਿਵਸ ਮਨਾ ਰਿਹਾ ਹੈ। ਇਸ ਮੌਕੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਐਲਾਨ ਕੀਤਾ ਕਿ ਉਹ ਸੁਨਿਆਰੇ, ਤਰਖਾਣ, ਮਿਸਤਰੀ, ਵਾਲ ਕੱਟਣ ਵਾਲੇ (ਨਾਈ), ਔਜ਼ਾਰ ਅਤੇ ਹੱਥੀ ਕੰਮ ਕਰਨ ਵਾਲੇ ਵਰਗ ਨੂੰ ਨਵੀਂ ਤਾਕਤ ਦੇਣ ਜਾ ਰਹੇ ਹਨ। ਇਸ ਦੇ ਲਈ ਉਹ ਵਿਸ਼ਵਕਰਮਾ ਜਯੰਤੀ ‘ਤੇ ਵਿਸ਼ਵਕਰਮਾ ਯੋਜਨਾ ਸ਼ੁਰੂ ਕਰਨਗੇ।
ਪੀਐਮ ਮੋਦੀ ਨੇ ਲਾਲ ਕਿਲੇ ਤੋਂ ਲੋਕਾਂ ਨੂੰ ਸੰਬੋਧਨ ਕੀਤਾ। ਉਨ੍ਹਾਂ ਕਿਹਾ ਕਿ ਅਸੀਂ ਸੁਨਿਆਰੇ, ਤਰਖਾਣ, ਮਿਸਤਰੀ, ਵਾਲ ਕੱਟਣ ਵਾਲਿਆਂ ਅਤੇ ਸੰਦਾਂ ਅਤੇ ਹੱਥਾਂ ਨਾਲ ਕੰਮ ਕਰਨ ਵਾਲਿਆਂ ਨੂੰ ਨਵੀਂ ਤਾਕਤ ਦੇਣ ਜਾ ਰਹੇ ਹਾਂ। ਉਨ੍ਹਾਂ ਕਿਹਾ ਅਸੀਂ ਇਸ ਵਾਰ ਵਿਸ਼ਵਕਰਮਾ ਜਯੰਤੀ ‘ਤੇ ‘ਵਿਸ਼ਵਕਰਮਾ ਯੋਜਨਾ’ ਸ਼ੁਰੂ ਕਰਾਂਗੇ। ਇਸ ਦੀ ਸ਼ੁਰੂਆਤ 13 ਤੋਂ 15 ਹਜ਼ਾਰ ਕਰੋੜ ਰੁਪਏ ਨਾਲ ਕੀਤੀ ਜਾਵੇਗੀ।
ਉਨ੍ਹਾਂ ਕਿਹਾ ਕਿ ਮੋਦੀ ਦੀ ਇਹ ਗਰੰਟੀ ਹੈ ਕਿ ਆਉਣ ਵਾਲੇ ਪੰਜ ਸਾਲਾਂ ਵਿੱਚ ਦੇਸ਼ ਚੋਟੀ ਦੀਆਂ ਤਿੰਨ ਅਰਥਵਿਵਸਥਾਵਾਂ ਵਿੱਚ ਥਾਂ ਬਣਾ ਲਵੇਗਾ। ਗਰੀਬੀ ਤੋਂ ਬਾਹਰ ਆਏ 13.5 ਕਰੋੜ ਲੋਕ ਮੱਧ ਵਰਗ ਦੀ ਤਾਕਤ ਬਣ ਰਹੇ ਹਨ। ਜਦੋਂ ਪਿੰਡ ਦੀ ਤਾਕਤ ਵਧਦੀ ਹੈ ਤਾਂ ਸ਼ਹਿਰਾਂ ਦੀ ਆਰਥਿਕਤਾ ਤੇਜ਼ੀ ਨਾਲ ਵਧਦੀ ਹੈ। ਅਸੀਂ ਇਸ ਤਾਕਤ ਨਾਲ ਅੱਗੇ ਵਧਣਾ ਚਾਹੁੰਦੇ ਹਾਂ।