ਗੁਜਰਾਤ ‘ਚ ਵਿਧਾਨ ਸਭਾ ਚੋਣਾਂ ਦੇ ਐਲਾਨ ਤੋਂ ਬਾਅਦ ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਅੱਜ ਪਹਿਲੀ ਵਾਰ ਗੁਜਰਾਤ ਪਹੁੰਚੇ। ਉਨ੍ਹਾਂ ਦੀ ਪਹਿਲੀ ਜਨ ਸਭਾ ਸੂਰਤ ਜ਼ਿਲ੍ਹੇ ਦੀ ਮਹੂਆ ਤਹਿਸੀਲ ਦੇ ਪੰਚ ਕੱਕੜਾ ਪਿੰਡ ਵਿੱਚ ਹੋਈ। ਇਸ ਤੋਂ ਬਾਅਦ ਉਹ ਭਾਜਪਾ ਦੇ ਗੜ੍ਹ ਰਾਜਕੋਟ ਪਹੁੰਚੇ। ਇੱਥੇ ਸ਼ਾਸਤਰੀ ਮੈਦਾਨ ਵਿੱਚ ਜਨ ਸਭਾ ਨੂੰ ਸੰਬੋਧਨ ਕਰਨ ਤੋਂ ਪਹਿਲਾਂ ਉਨ੍ਹਾਂ ਨੇ ਮੋਰਬੀ ਪੁਲ ਹਾਦਸੇ ਵਿੱਚ ਮਾਰੇ ਗਏ ਲੋਕਾਂ ਨੂੰ ਸ਼ਰਧਾਂਜਲੀ ਵਜੋਂ ਦੋ ਮਿੰਟ ਦਾ ਮੌਨ ਰੱਖਿਆ।
ਪੰਜ ਕੱਕੜ ਪਿੰਡ ‘ਚ ਆਪਣੇ ਸੰਬੋਧਨ ਦੌਰਾਨ ਉਨ੍ਹਾਂ ਨੇ ਭਾਜਪਾ ‘ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ- ਭਾਜਪਾ ਆਦਿਵਾਸੀਆਂ ਨਾਲ ਬੇਇਨਸਾਫੀ ਕਰਦੀ ਹੈ। ਇਹ ਦੇਸ਼ ਤੁਹਾਡਾ ਹੈ, ਜੋ ਭਾਜਪਾ ਨੇ ਤੁਹਾਡੇ ਤੋਂ ਖੋਹ ਲਿਆ ਹੈ। ਭਾਜਪਾ ਵਾਲੇ ਤੁਹਾਨੂੰ ਆਦਿਵਾਸੀ ਨਹੀਂ ਕਹਿੰਦੇ, ਉਹ ਤੁਹਾਨੂੰ ਜੰਗਲ ਵਾਸੀ ਕਹਿੰਦੇ ਹਨ। ਭਾਵ ਤੁਸੀਂ ਜੰਗਲ ਵਿੱਚ ਰਹਿ ਰਹੇ ਹੋ। ਰਾਹੁਲ ਗਾਂਧੀ ਨੇ ਅੱਗੇ ਕਿਹਾ ਕਿ ਤੁਹਾਡੇ ਕੋਲ ਦੋ ਵਿਕਲਪ ਹਨ ਕਾਂਗਰਸ ਆਦਿਵਾਸੀ ਜਾਂ ਭਾਜਪਾ ਵਨਵਾਸੀ। ਇੱਕ ਪਾਸੇ ਖੁਸ਼ੀ ਹੈ ਅਤੇ ਦੂਜੇ ਪਾਸੇ ਦੁੱਖ ਹੈ। ਅਸੀਂ ਤੁਹਾਡੇ ਸੁਪਨਿਆਂ ਨੂੰ ਸਾਕਾਰ ਕਰਾਂਗੇ। ਸਿੱਖਿਆ, ਰੁਜ਼ਗਾਰ, ਸਿਹਤ ਦੇਵਾਂਗੇ।