ਰਾਜਸਥਾਨ ਦੇ ਰਾਜਸਮੰਦ ‘ਚ ਤੜਕਸਾਰ ਹੀ ਰੂਹ ਕੰਬਾਊ ਹਾਦਸਾ ਵਾਪਰਿਆ। ਇਸ ਭਿਆਨਕ ਸੜਕ ਹਾਦਸੇ ‘ਚ ਇੱਕੋ ਪਰਿਵਾਰ ਦੇ ਚਾਰ ਜੀਆਂ ਦੀ ਮੌਤ ਹੋ ਗਈ। ਪਹਿਲਾਂ ਟਰਾਲੇ ਅਤੇ ਟੈਂਕਰ ਦੀ ਟੱਕਰ ਹੋ ਗਈ। ਇਸ ਤੋਂ ਬਾਅਦ ਪੈਟਰੋਲ ਨਾਲ ਭਰਿਆ ਟੈਂਕਰ ਕ੍ਰੇਟਾ ਕਾਰ ‘ਤੇ ਪਲਟ ਗਿਆ। ਕਾਰ ਵਿੱਚ ਸਵਾਰ ਸਾਰੇ ਵਿਅਕਤੀ ਟੈਂਕਰ ਦੇ ਹੇਠਾਂ ਦੱਬ ਗਏ। ਇਹ ਹਾਦਸਾ ਚਾਰਭੁਜਾ ਥਾਣਾ ਸਰਕਲ ‘ਚ ਰਾਜਸਮੰਦ-ਗੋਮਤੀ ਫੋਰਲੇਨ (ਉਦੈਪੁਰ-ਬਿਆਵਰ ਹਾਈਵੇਅ) ‘ਤੇ ਮਾਨਸਿੰਘ ਕਾ ਗੁਢਾ ‘ਤੇ ਵਾਪਰਿਆ। ਮਰਨ ਵਾਲੇ ਸਾਰੇ ਕੇਲਵਾੜਾ (ਰਾਜਸਮੰਦ) ਦੇ ਰਹਿਣ ਵਾਲੇ ਸਨ।
ਐਸਪੀ ਮਨੀਸ਼ ਤ੍ਰਿਪਾਠੀ ਨੇ ਜਾਣਕਾਰੀ ਦਿੱਤੀ ਕਿ ਇਹ ਹਾਦਸਾ ਅੱਜ (ਵੀਰਵਾਰ) ਸਵੇਰੇ ਕਰੀਬ 8.15 ਵਜੇ ਵਾਪਰਿਆ। ਕ੍ਰੇਟਾ ਕਾਰ ‘ਚ ਸਵਾਰ ਇੱਕੋ ਪਰਿਵਾਰ ਦੇ ਚਾਰ ਜੀਅ ਸਵੇਰੇ ਉਦੈਪੁਰ ਤੋਂ ਬੇਵਰ ਜਾ ਰਹੇ ਸਨ। ਜਿਸ ਦੌਰਾਨ ਇਹ ਹਾਦਸਾ ਵਾਪਰ ਗਿਆ।
ਕਾਰ ਵਿੱਚ ਦੀਨਬੰਧੂ (32) ਪੁੱਤਰ ਜਗਦੀਸ਼ ਉਪਾਧਿਆਏ, ਪੁਰਸ਼ੋਤਮ ਉਰਫ਼ ਪਵਨ ਉਪਾਧਿਆਏ (40) ਪੁੱਤਰ ਜਗਦੀਸ਼ ਉਪਾਧਿਆਏ, ਰੇਣੂਕਾ ਉਪਾਧਿਆਏ (34) ਪਤਨੀ ਪੁਰਸ਼ੋਤਮ ਉਪਾਧਿਆਏ, ਮਨਸੁਖ ਦੇਵੀ (68) ਪਤਨੀ ਜਗਦੀਸ਼ ਉਪਾਧਿਆਏ ਕਾਰ ਵਿੱਚ ਸਵਾਰ ਸਨ। ਦੀਨਬੰਧੂ ਅਤੇ ਪੁਰਸ਼ੋਤਮ ਸਕੇ ਭਰਾ ਸਨ। ਰੇਣੁਕਾ ਪੁਰਸ਼ੋਤਮ ਦੀ ਪਤਨੀ ਸੀ। ਮਨਸੁਖ ਦੇਵੀ ਦੀਨਬੰਧੂ ਅਤੇ ਪੁਰਸ਼ੋਤਮ ਦੀ ਮਾਂ ਸੀ।
ਹਾਦਸੇ ਤੋਂ ਬਾਅਦ ਕਰੇਨ ਬੁਲਾ ਕੇ ਟੈਂਕਰ ਨੂੰ ਸਿੱਧਾ ਕੀਤਾ ਗਿਆ।ਟੈਂਕਰ ਹੇਠ ਦੱਬੀ ਕਾਰ ਨੂੰ ਕੱਢਣ ਲਈ ਸਿਵਲ ਡਿਫੈਂਸ ਟੀਮ ਨੂੰ ਵੀ ਬੁਲਾਇਆ ਗਿਆ। ਨੁਕਸਾਨੇ ਵਾਹਨਾਂ ਕਾਰਨ ਹਾਈਵੇਅ ’ਤੇ ਜਾਮ ਲੱਗ ਗਿਆ। ਉਨ੍ਹਾਂ ਵਾਹਨਾਂ ਨੂੰ ਹਟਾ ਕੇ ਆਵਾਜਾਈ ਨੂੰ ਸੁਚਾਰੂ ਰੂਪ ਨਾਲ ਚਲਾਇਆ ਗਿਆ।