ਚੀਨ ਨੇ ਅਰੁਣਾਚਲ ਪ੍ਰਦੇਸ਼ ਦੀਆਂ ਕੁਝ ਹੋਰ ਥਾਵਾਂ ਦੇ ਨਾਮ ਬਦਲ ਦਿੱਤੇ ਹਨ। ਅਰੁਣਾਚਲ ਪ੍ਰਦੇਸ਼ ‘ਤੇ ਆਪਣਾ ਦਾਅਵਾ ਮਜ਼ਬੂਤ ​​ਕਰਨ ਲਈ ਚੀਨ ਇੱਥੋਂ ਦੀਆਂ ਥਾਵਾਂ ਦੇ ਨਵੇਂ-ਨਵੇਂ ਨਾਂ ਜਾਰੀ ਕਰ ਰਿਹਾ ਹੈ। ਹਾਲਾਂਕਿ ਭਾਰਤ ਉਨ੍ਹਾਂ ਨੂੰ ਨਕਾਰਦਾ ਰਿਹਾ ਹੈ। ਭਾਰਤ ਦਾ ਕਹਿਣਾ ਹੈ ਕਿ ਚੀਨ ਦੇ ਨਵੇਂ ਨਾਂ ਸੱਚਾਈ ਨੂੰ ਨਹੀਂ ਬਦਲ ਸਕਦੇ ਅਤੇ ਅਰੁਣਾਚਲ ਪ੍ਰਦੇਸ਼ ਭਾਰਤ ਦਾ ਅਨਿੱਖੜਵਾਂ ਅੰਗ ਹੈ।
ਅਰੁਣਾਚਲ ਪ੍ਰਦੇਸ਼ ਨੂੰ ਆਪਣਾ ਹੋਣ ਦਾ ਦਾਅਵਾ ਕਰਨ ਦੇ ਚੀਨ ਦੇ ਦਾਅਵੇ ‘ਤੇ ਵਿਦੇਸ਼ ਮੰਤਰੀ ਐੱਸ ਜੈਸ਼ੰਕਰ ਨੇ ਕਿਹਾ ਕਿ “ਜੇ ਮੈਂ ਅੱਜ ਕਿਸੇ ਘਰ ਦਾ ਨਾਮ ਬਦਲ ਦੇਵਾਂ, ਤਾਂ ਕੀ ਉਹ ਮੇਰਾ ਬਣ ਜਾਵੇਗਾ? ਅਰੁਣਾਚਲ ਪ੍ਰਦੇਸ਼ ਹਮੇਸ਼ਾ ਭਾਰਤ ਦਾ ਸੂਬਾ ਸੀ, ਹੈ ਅਤੇ ਹਮੇਸ਼ਾ ਰਹੇਗਾ। ਨਾਮ ਬਦਲਣ ਨਾਲ ਕੋਈ ਫਰਕ ਨਹੀਂ ਪਵੇਗਾ।”
ਇਸ ਤੋਂ ਇਲਾਵਾ ਗੁਜਰਾਤ ਦੇ ਸੂਰਤ ਸ਼ਹਿਰ ‘ਚ ਕਾਰਪੋਰੇਟ ਸੰਮੇਲਨ 2024 ਦੌਰਾਨ ਵਿਦੇਸ਼ ਮੰਤਰੀ ਤੋਂ ਲੱਦਾਖ ‘ਚ ਕਬਜ਼ੇ ਦੇ ਚੀਨ ਦੇ ਦਾਅਵੇ ‘ਤੇ ਵੀ ਸਵਾਲ ਚੁੱਕੇ ਗਏ ਸਨ। ਇਸ ਦੇ ਜਵਾਬ ਵਿੱਚ ਉਨ੍ਹਾਂ ਨੇ ਕਿਹਾ, “ਸਾਡੀ ਫੌਜ LAC ‘ਤੇ ਤਾਇਨਾਤ ਹੈ। ਉਹ ਜਾਣਦੇ ਹਨ ਕਿ ਕਦੋਂ ਕੀ ਕਰਨਾ ਹੈ।”
ਦੱਸ ਦਈਏ ਕਿ ਸੋਮਵਾਰ ਨੂੰ ਚੀਨ ਨੇ ਅਰੁਣਾਚਲ ਪ੍ਰਦੇਸ਼ ਦੇ 30 ਸਥਾਨਾਂ ਦੇ ਨਾਂ ਬਦਲ ਕੇ ਇਸ ਨੂੰ ਆਪਣਾ ਹਿੱਸਾ ਦੱਸਿਆ। ਇਨ੍ਹਾਂ ਵਿੱਚ 11 ਰਿਹਾਇਸ਼ੀ ਖੇਤਰ, 12 ਪਹਾੜ, 4 ਨਦੀਆਂ, ਇੱਕ ਤਾਲਾਬ ਅਤੇ ਪਹਾੜਾਂ ਵਿੱਚੋਂ ਨਿਕਲਣ ਵਾਲਾ ਇੱਕ ਰਸਤਾ ਸ਼ਾਮਲ ਹੈ।