ਵਾਰਾਣਸੀ ਦੇ ਕਾਸ਼ੀ ਵਿਸ਼ਵਨਾਥ ਮੰਦਰ ਨੇੜੇ ਮੰਗਲਵਾਰ ਤੜਕੇ ਕਰੀਬ 3 ਵਜੇ ਦੋ ਘਰ ਢਹਿ ਗਏ। ਇਸ ‘ਚ ਡਿਊਟੀ ‘ਤੇ ਮੌਜੂਦ ਮਹਿਲਾ ਪੁਲਸ ਕਰਮਚਾਰੀ ਸਮੇਤ 9 ਲੋਕ ਮਲਬੇ ਹੇਠਾਂ ਦੱਬ ਗਏ। 8 ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ। ਇੱਕ 43 ਸਾਲਾ ਔਰਤ ਦੀ ਮੌਤ ਹੋ ਗਈ। ਹਾਦਸੇ ਦੇ ਸਮੇਂ ਲੋਕ ਸੌਂ ਰਹੇ ਸਨ।
ਸੂਚਨਾ ਮਿਲਦੇ ਹੀ ਕਈ ਥਾਣਿਆਂ ਦੀ ਪੁਲਿਸ ਫੋਰਸ ਪਹੁੰਚ ਗਈ। NDRF ਨੂੰ ਬੁਲਾਇਆ ਗਿਆ। ਬਚਾਅ ਕਾਰਜ 6 ਘੰਟੇ ਤੱਕ ਚੱਲਿਆ। ਜਿਸ ਗਲੀ ‘ਚ ਹਾਦਸਾ ਵਾਪਰਿਆ ਉਸ ਦੀ ਚੌੜਾਈ ਸਿਰਫ 8 ਫੁੱਟ ਹੋਣ ਕਾਰਨ ਬਚਾਅ ਦਾ ਸਾਰਾ ਕੰਮ ਹੱਥੀਂ ਕੀਤਾ ਗਿਆ। NDRF ਨੇ ਹੱਥਾਂ ਨਾਲ ਮਲਬਾ ਹਟਾਇਆ। ਇਸ ਕਾਰਨ ਬਚਾਅ ਵਿੱਚ ਸਮਾਂ ਲੱਗਾ। ਦੋਵੇਂ ਘਰ ਮੰਦਰ ਦੇ ਗਲਿਆਰੇ ਤੋਂ ਸਿਰਫ਼ 10 ਮੀਟਰ ਦੀ ਦੂਰੀ ‘ਤੇ ਹਨ।
ਦੱਸ ਦਈਏ ਕਿ ਦੋਵੇਂ ਘਰ ਕਾਸ਼ੀ ਵਿਸ਼ਵਨਾਥ ਕੋਰੀਡੋਰ ਨੇੜੇ ਖੋਵਾ ਗਲੀ ਵਿੱਚ ਨਾਲ-ਨਾਲ ਬਣੇ ਹੋਏ ਸਨ। ਇਨ੍ਹਾਂ ਦੇ ਮਾਲਕ ਰਾਜੇਸ਼ ਅਤੇ ਮਨੀਸ਼ ਗੁਪਤਾ ਸਕੇ ਭਰਾ ਹਨ। ਘਰ 70-75 ਸਾਲ ਪੁਰਾਣੇ ਸਨ। ਮਨੀਸ਼ ਗੁਪਤਾ ਦਾ ਘਰ 4 ਮੰਜ਼ਿਲਾ ਸੀ, ਜਦਕਿ ਰਾਜੇਸ਼ ਗੁਪਤਾ ਦਾ ਘਰ 3 ਮੰਜ਼ਿਲਾ ਸੀ।
ਮੰਗਲਵਾਰ ਤੜਕੇ 3 ਵਜੇ ਮਨੀਸ਼ ਗੁਪਤਾ ਦਾ ਘਰ ਢਹਿ ਗਿਆ। ਕੁਝ ਸਮੇਂ ਬਾਅਦ ਹੀ ਨਾਲ ਵਾਲਾ ਮਕਾਨ ਵੀ ਢਹਿ ਗਿਆ। ਘਰ ਦੇ ਬਾਹਰ ਮੰਦਰ ਹੈ, ਉਹ ਵੀ ਨੁਕਸਾਨਿਆ ਗਿਆ। ਦੀਵਾਰ ਦੇ ਨੇੜੇ ਪੁਲਿਸ ਚੌਕੀ ਬਣੀ ਹੋਈ ਹੈ। ਇੱਥੇ ਤਾਇਨਾਤ ਮਹਿਲਾ ਪੁਲੀਸ ਮੁਲਾਜ਼ਮ ਵੀ ਮਲਬੇ ਹੇਠ ਦੱਬ ਕੇ ਜ਼ਖ਼ਮੀ ਹੋ ਗਈ।
ਪੀਐਮ ਮੋਦੀ ਨੇ ਮਾਮਲੇ ਸੰਬੰਧੀ ਕਮਿਸ਼ਨਰ ਕੌਸ਼ਲ ਰਾਜ ਸ਼ਰਮਾ ਨਾਲ ਫੋਨ ‘ਤੇ ਗੱਲਬਾਤ ਕੀਤੀ। ਉਨ੍ਹਾਂ ਮੌਜੂਦਾ ਸਥਿਤੀ ਬਾਰੇ ਜਾਣਕਾਰੀ ਲਈ। ਕਮਿਸ਼ਨਰ ਨੇ ਉਨ੍ਹਾਂ ਨੂੰ ਕਿਹਾ ਕਿ ਮ੍ਰਿਤਕ ਔਰਤ ਅਤੇ ਜ਼ਖਮੀਆਂ ਨੂੰ ਮੁਆਵਜ਼ਾ ਦਿੱਤਾ ਜਾਵੇਗਾ। ਜ਼ਖਮੀਆਂ ਦਾ ਬਿਹਤਰ ਇਲਾਜ ਕੀਤਾ ਜਾ ਰਿਹਾ ਹੈ।