ਹੋਲੀ ਦੇ ਤਿਉਹਾਰ ‘ਤੇ ਹਿਮਾਚਲ ਪ੍ਰਦੇਸ਼ ਦੇ ਊਨਾ ਜ਼ਿਲੇ ‘ਚ ਵੱਡਾ ਹਾਦਸਾ ਵਾਪਰ ਗਿਆ। ਸ਼ੁੱਕਰਵਾਰ ਨੂੰ ਬਾਬਾ ਬਡਭਾਗ ਸਿੰਘ ਮੈਂੜੀ ‘ਚ ਗੁਬਾਰਿਆਂ ‘ਚ ਹਵਾ ਭਰਨ ਵਾਲਾ ਸਿਲੰਡਰ ਫੱਟ ਗਿਆ ਜਿਸ ਨਾਲ ਪੰਜ ਸਾਲਾਂ ਬੱਚੇ ਸਮੇਤ 4 ਲੋਕ ਜ਼ਖ਼ਮੀ ਹੋ ਗਏ ਸਨ ਇਹਨਾਂ ਵਿੱਚੋ ਇਕ ਵਿਅਕਤੀ ਦੀ ਮੌਤ ਹੋ ਗਈ ਹੈ। ਬਾਕੀ ਜ਼ਖ਼ਮੀ ਹਸਪਤਾਲ ‘ਚ ਜ਼ੇਰੇ ਇਲਾਜ ਹਨ।
ਜਾਣਕਾਰੀ ਅਨੁਸਾਰ ਇਹ ਘਟਨਾ ਊਨਾ ਜ਼ਿਲ੍ਹੇ ਦੇ ਮੈਂੜੀ ਦੇ ਸੈਕਟਰ-4 ਦੀ ਹੈ ਜਿਥੇ ਕਿ ਹੋਲੇ- ਮੁਹੱਲੇ ਦੇ ਸਮਾਗਮ ਦਾ ਅੱਜ ਨੌਵਾਂ ਦਿਨ ਸੀ ਅਤੇ ਵੱਡੀ ਗਿਣਤੀ ਵਿੱਚ ਸੰਗਤਾਂ ਪੁਹੰਚੀਆ ਹੋਈਆਂ ਸਨ। ਅਚਾਨਕ ਗੁਬਾਰਿਆਂ ‘ਚ ਹਵਾ ਭਰਨ ਵਾਲਾ ਸਿਲੰਡਰ ਫੱਟ ਗਿਆ ਅਤੇ ਹਰ ਪਾਸੇ ਹਫੜਾ ਦਫੜੀ ਮੱਚ ਗਈ। ਏਐਸਪੀ ਪ੍ਰਵੀਨ ਧੀਮਾਨ ਨੇ ਪੁਸ਼ਟੀ ਕੀਤੀ ਕਿ ਹਾਦਸੇ ਵਿੱਚ ਮਰਨ ਵਾਲੇ ਵਿਅਕਤੀ ਦੀ ਪਛਾਣ ਨੇਕ ਰਾਜ (52) ਪੁੱਤਰ ਦੌਲਤਰਾਮ ਪਿੰਡ ਚੱਕ ਕਵਾਰ ਤਹਿਸੀਲ ਜਲਾਲਾਬਾਦ ਜ਼ਿਲ੍ਹਾ ਫਾਜ਼ਿਲਕਾ ਪੰਜਾਬ ਵਜੋਂ ਹੋਈ ਹੈ। ਹਾਦਸੇ ਦੌਰਾਨ ਨੇਕ ਰਾਜ ਦੀ ਇਕ ਲੱਤ ਟੁੱਟ ਗਈ ਸੀ ਜਿਸ ਤੋਂ ਬਾਅਦ ਉਨ੍ਹਾਂ ਦੀ ਮੌਤ ਹੋ ਗਈ।
ਇਸ ਦੇ ਨਾਲ ਹੀ ਗੁਰਮੀਤ ਸਿੰਘ (66) ਪੁੱਤਰ ਪਾਨ ਸਿੰਘ ਪਿੰਡ ਲੱਖਾਂ ਨਿਛਾਰੇ ਨੇੜੇ ਅਟਾਰੀ ਸਰਹੱਦ ਤਹਿਸੀਲ ਤਰਨਤਾਰਨ ਜ਼ਿਲ੍ਹਾ ਅੰਮ੍ਰਿਤਸਰ ਪੰਜਾਬ, ਜਗਰੂਪ ਸਿੰਘ (20) ਪੁੱਤਰ ਸੱਤਾ ਸਿੰਘ ਪਿੰਡ ਮਟੋਲਾ ਤਹਿਸੀਲ ਬਟਾਲਾ ਜ਼ਿਲ੍ਹਾ ਗੁਰਦਾਸਪੁਰ, ਅਕਰਮ ਸਿੰਘ (5) ਪੁੱਤਰ ਜੱਗਾ ਸਿੰਘ ਪਿੰਡ ਸ. ਮਟੋਲਾ ਤਹਿਸੀਲ ਬਟਾਲਾ ਜ਼ਿਲ੍ਹਾ ਗੁਰਦਾਸਪੁਰ ਪੰਜਾਬ, ਦਾ ਇਲਾਜ ਹਸਪਤਾਲ ‘ਚ ਚੱਲ ਰਿਹਾ ਹੈ। ਪੁਲਿਸ ਘਟਨਾ ਦੀ ਜਾਂਚ ਵਿਚ ਜੁਟੀ ਹੋਈ ਹੈ।