ਕੀ ਤੁਸੀਂ ਕਦੇ ਸੁਣਿਆ ਹੈ ਕਿ ਕੋਈ ਭੀਖ ਮੰਗ ਕੇ ਲੱਖਪਤੀ ਬਣ ਗਿਆ? ਜੀ ਹਾਂ ਇੰਦੌਰ ਦੀ ਰਹਿਣ ਵਾਲੀ ਔਰਤ ਭੀਖ ਮੰਗ ਕੇ ਬਣੀ ਲੱਖਪਤੀ। ਉਸ ਨੇ ਖੁਦ ਮੰਨਿਆ ਹੈ ਕਿ ਉਸ ਨੇ 45 ਦਿਨਾਂ ਵਿੱਚ ਭੀਖ ਮੰਗ ਕੇ ਢਾਈ ਲੱਖ ਰੁਪਏ ਇਕੱਠੇ ਕੀਤੇ ਹਨ। ਅਸਲ ਵਿੱਚ ਇਸ ਔਰਤ ਨੂੰ ਅਤੇ ਉਸ ਦੀ ਧੀ ਨੂੰ ਇਕ ਆਪਰੇਸ਼ਨ ਦੌਰਾਨ ਰੈਸਕਿਊ ਕੀਤਾ ਗਿਆ ਸੀ, ਪਰ ਜਦੋਂ ਔਰਤ ਨੇ ਭੀਖ ਨਾਲ ਹੋਈ ਆਪਣੀ ਕਮਾਈ ਬਾਰੇ ਦੱਸਿਆ ਤਾਂ ਪੁਲਿਸ ਵੀ ਹੈਰਾਨ ਰਹਿ ਗਈ।
ਉਸ ਔਰਤ ਨੇ ਦੱਸਿਆ ਕਿ ਸਿਰਫ਼ 45 ਦਿਨਾਂ ਵਿੱਚ ਉਸ ਨੇ ਢਾਈ ਲੱਖ ਰੁਪਏ ਕਮਾਏ ਹਨ। ਇਸ ਵਿੱਚੋਂ ਉਸ ਨੇ ਇੱਕ ਲੱਖ ਰੁਪਏ ਰਾਜਸਥਾਨ ‘ਚ ਆਪਣੇ ਘਰ ਭੇਜ ਦਿੱਤੇ ਹਨ ਅਤੇ 50 ਹਜ਼ਾਰ ਰੁਪਏ ਦੀ ਬੈਂਕ ਵਿੱਚ ਐਫ.ਡੀ. ਕਰਵਾਈ ਹੈ। ਪੁੱਛਗਿੱਛ ਦੌਰਾਨ ਔਰਤ ਕੋਲੋਂ 19 ਹਜ਼ਾਰ 200 ਰੁਪਏ ਬਰਾਮਦ ਹੋਏ ਜੋ ਉਸ ਨੇ ਪਿਛਲੇ 7 ਦਿਨਾਂ ‘ਚ ਕਮਾਏ ਸਨ। ਉਸ ਦੀ ਧੀ ਨੇ ਸਵੇਰ ਤੋਂ ਦੁਪਹਿਰ 1.30 ਵਜੇ ਤੱਕ 600 ਰੁਪਏ ਇਕੱਠੇ ਕੀਤੇ ਸਨ। ਇਹ ਸਿਰਫ਼ ਇੱਕ ਪਰਿਵਾਰ ਦੀ ਕਹਾਣੀ ਨਹੀਂ ਹੈ।
ਔਰਤ ਨੇ ਪੁੱਛਗਿੱਛ ਦੌਰਾਨ ਕਈ ਹੋਰ ਖੁਲਾਸੇ ਕੀਤੇ। ਉਸ ਨੇ ਦੱਸਿਆ ਕਿ ਰਾਜਸਥਾਨ ਦੇ ਉਸ ਦੇ ਪਿੰਡ ਤੋਂ 100 ਤੋਂ ਵੱਧ ਲੋਕ ਭੀਖ ਮੰਗਣ ਆਏ ਸਨ। ਉਹ ਲੋਕ ਅਜੇ ਵੀ ਭੀਖ ਮੰਗਦੇ ਹਨ ਅਤੇ ਜਦੋਂ ਕੋਈ ਕਾਰਵਾਈ ਹੁੰਦੀ ਹੈ ਤਾਂ ਉਹ ਲੁਕ ਜਾਂਦੇ ਹਨ। ਅਸਲ ਵਿੱਚ ਕਲੈਕਟਰ ਆਸ਼ੀਸ਼ ਸਿੰਘ ਨੇ ਭੀਖ ਮੰਗਣ ਵਾਲਿਆਂ ਨੂੰ ਲੈ ਕੇ ਇਲਾਕੇ ਵਿੱਚ ਜਾਂਚ ਦੇ ਹੁਕਮ ਦਿੱਤੇੇ ਸਨ। ਇਸ ਤੋਂ ਬਾਅਦ ਜਦੋਂ ਅਧਿਕਾਰੀ ਆਪ੍ਰੇਸ਼ਨ ਲਈ ਗਏ ਤਾਂ ਇੱਕ ਪਰਿਵਾਰ ਨੂੰ ਭੀਖ ਮੰਗਦੇ ਦੇਖਿਆ ਜਿਸ ਵਿੱਚ ਪਤੀ-ਪਤਨੀ ਤੇ ਤਿੰਨ ਬੱਚੇ ਸ਼ਾਮਲ ਸਨ।
