ਕੇਂਦਰੀ ਸਿਹਤ ਮੰਤਰਾਲੇ ਨੇ ਸੂਬਿਆਂ ਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਨੂੰ ਅੰਗਾਂ ਦੇ ਟ੍ਰਾਂਸਪਲਾਂਟ ਦੀ ਉਡੀਕ ਸੂਚੀ ’ਚ ਮਹਿਲਾ ਮਰੀਜ਼ਾਂ ਨੂੰ ਪਹਿਲ ਦੇਣ ਲਈ ਕਿਹਾ ਹੈ। ਮੰਤਰਾਲੇ ਨੇ ਇਹ ਵੀ ਸੁਝਾਅ ਦਿੱਤਾ ਹੈ ਕਿ ਅੰਗਾਂ ਦੀ ਟ੍ਰਾਂਸਪਲਾਂਟ ਦਗੀ ਉਡੀਕ ਕਰ ਰਹੇ ਮ੍ਰਿਤ ਦਾਨੀਆਂ ਦੇ ਨੇੜਲੇ ਸਬੰਧੀਆਂ ਨੂੰ ਪਹਿਲ ਦਿਓ। ਰਾਸ਼ਟਰੀ ਅੰਗ ਤੇ ਟਿਸ਼ੂ ਟ੍ਰਾਂਸਪਲਾਂਟ ਸੰਗਠਨ (ਐੱਨਓਟੀਟੀਓ) ਵੱਲੋਂ ਸਾਰੇ ਸੂਬਿਆਂ ਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਨੂੰ ਜਾਰੀ ਐਡਵਾਈਜ਼ਰੀ ’ਚ ਇਹ ਸੁਝਾਅ ਦਿੱਤੇ ਗਏ ਹਨ। ਇਹ ਐਡਵਾਈਜ਼ਰੀ ਦੋ ਅਗਸਤ ਨੂੰ ਭਾਰਤੀ ਅੰਗਦਾਨ ਦਿਹਾੜੇ ਮੌਕੇ ਜਾਰੀ ਕੀਤੀ ਗਈ ਸੀ। ਐਡਵਾਈਜ਼ਰੀ ’ਚ ਕਿਹਾ ਗਿਆ ਹੈ ਕਿ ਮ੍ਰਿਤਕ ਅੰਗਦਾਨੀਆਂ ਦਾ ਸਨਮਾਨਜਨਕ ਤਰੀਕੇ ਨਾਲ ਅੰਤਿਮ ਸੰਸਕਾਰ ਕੀਤਾ ਜਾਵੇ। ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਨੂੰ 15 ਅਗਸਤ, 26 ਜਨਵਰੀ, ਸੂਬਾ ਸਥਾਪਨਾ ਦਿਹਾੜੇ ਵਰਗੇ ਜਨਤਕ ਪ੍ਰੋਗਰਾਮਾਂ ’ਚ ਸਨਮਾਨਿਤ ਕੀਤਾ ਜਾਵੇ। ਮ੍ਰਿਤਕ ਦਾਨੀ ਅੰਗ ਟ੍ਰਾਂਸਪਲਾਂਟ ਦੀ ਉਡੀਕ ਸੂਚੀ ’ਚ ਮਹਿਲਾ ਮਰੀਜ਼ਾਂ ਨੂੰ ਵਾਧੂ ਅੰਕ ਦੇਣ ਦਾ ਪ੍ਰਬੰਧ ਕੀਤਾ ਜਾਵੇ ਤਾਂਕਿ ਲਿੰਗ ਸਮਾਨਤਾ ਨੂੰ ਦੂਰ ਕੀਤਾ ਜਾ ਸਕੇ। ਜੇ ਕਿਸੇ ਮ੍ਰਿਤਕ ਦਾਨੀ ਦੇ ਨੇੜੇ ਸਬੰਧੀ ਨੂੰ ਅੰਗ ਟ੍ਰਾਂਸਪਲਾਂਟ ਦੀ ਲੋੜ ਹੈ ਤਾਂ ਉਸ ਨੂੰ ਪਹਿਲ ਦਿੱਤੀ ਜਾਵੇ। ਸੂਬੇ ਸੜਕ ਹਾਦਸਿਆਂ ਦੇ ਸ਼ਿਕਾਰ ਤੇ ਬ੍ਰੇਨ ਹੈਮਰੇਜ ਦੇ ਮਰੀਜ਼ਾਂ ’ਚ ਸੰਭਾਵੀ ਮ੍ਰਿਤਕ ਦਾਨੀਆਂ ਦੀ ਸਮੇਂ ’ਤੇ ਪਛਾਣ ਲਈ ਐਮਰਜੈਂਸੀ ਸੇਵਾ ਮੁਲਾਜ਼ਮਾਂ ਤੇ ਐਂਬੂਲੈਂਸ ਮੁਲਾਜ਼ਮਾਂ ਨੂੰ ਸਿਖਲਾਈ ਦੇਣ ਤੇ ਇਸ ਸਬੰਧ ’ਚ ਹਸਪਤਾਲ ਦੇ ਅੰਗਦਾਨ ਕੋਆਰਡੀਨੇਟਰ ਨੂੰ ਸੂਚਿਤ ਕਰਨ।
-ਲੋਕ ਜਾਗਰੂਕਤਾ ਸਰਗਰਮੀਆਂ ਨੂੰ ਹੱਲਾਸ਼ੇਰੀ ਦੇਣ ਲਈ ਸੂਬਿਆਂ ਨੂੰ ਬ੍ਰਾਂਡ ਅੰਬੈਸਡਰ ਨਿਯੁਕਤ ਕਰਨ ਦਾ ਸੁਝਾਅ ਵੀ ਦਿੱਤਾ ਗਿਆ ਹੈ।
-ਅੰਗਦਾਨ ਤੇ ਟ੍ਰਾਂਸਪਲਾਂਟ ’ਚ ਟ੍ਰਾਂਸਪਲਾਂਟ ਕੋਆਰਡੀਨੇਟਰਾਂ ਦੀ ਅਹਿਮ ਭੂਮਿਕਾ ਨੂੰ ਦੇਖਦੇ ਹੋਏ ਅੰਗ ਟ੍ਰਾਂਸਪਲਾਂਟ ਜਾਂ ਅੰਗ ਨਿਕਾਸੀ ਕਰਨ ਵਾਲੇ ਹਸਪਤਾਲਾਂ ’ਚ ਉਨ੍ਹਾਂ ਲਈ ਸਥਾਈ ਅਹੁਦਾ ਸਿਰਜਿਆ ਜਾਵੇ।
-ਅੰਗ ਟ੍ਰਾਂਸਪਲਾਂਟ ਜਾਂ ਟਿਸ਼ੂ ਬੈਂਕਿੰਗ ਕਰਨ ਵਾਲੇ ਹਸਪਤਾਲਾਂ/ਕੇਂਦਰਾਂ ਨੂੰ ਹਦਾਇਤ ਜਾਰੀ ਕੀਤੀ ਜਾਣੀ ਚਾਹੀਦੀ ਹੈ ਕਿ ਉਹ ਐੱਨਓਟੀਟੀਓ ਵੱਲੋਂ ਬਣਾਏ ਗਏ ਰਾਸ਼ਟਰੀ ਰਜਿਸਟਰੀ ਲਈ ਹਰੇਕ ਅੰਗ ਜਾਂ ਟਿਸ਼ੂ ਦਾਨੀ ਤੇ ਲੈਣ ਵਾਲੇ ਦਾ ਡਾਟਾ ਮੁਹੱਈਆ ਕਰਵਾਉਣਗੇ। ਪਾਲਣਾ ਨਾ ਕਰਨ ਦੀ ਹਾਲਤ ’ਚ ਸੂਬੇ ਕਾਰਵਾਈ ਕਰਨ ’ਤੇ ਵਿਚਾਰ ਕਰ ਸਕਦੇ ਹਨ।
