ਨਵੀਂ ਦਿੱਲੀ, 21 ਜਨਵਰੀ 2022 – ਭਾਰਤੀ ਜਨਤਾ ਪਾਰਟੀ ਦੇ ਪਾਰਲੀਮਾਨੀ ਬੋਰਡ ਵੱਲੋਂ ਪੰਜਾਬ ਚੋਣਾਂ ਦੇ ਉਮੀਦਵਾਰਾਂ ਦੀ ਅੰਤਿਮ ਸੂਚੀ ਨੂੰ ਡੂੰਘੀ ਵਿਚਾਰ-ਵਟਾਂਦਰੇ ਤੋਂ ਬਾਅਦ ਹੁਣ ਕੇਂਦਰੀ ਚੋਣ ਕਮੇਟੀ ਨੇ ਵੀ ਸੂਚੀ ਨੂੰ ਹਰੀ ਝੰਡੀ ਦੇ ਦਿੱਤੀ ਹੈ। ਹੁਣ ਸਿਰਫ਼ ਇਸ ਦਾ ਰਸਮੀ ਐਲਾਨ ਬਾਕੀ ਹੈ, ਜੋ ਕੇ ਅੱਜ ਹੋ ਸਕਦਾ ਹੈ। ਪਾਰਟੀ ਸੂਤਰਾਂ ਅਨੁਸਾਰ 10 ਸੀਟਾਂ ‘ਤੇ ਕੈਪਟਨ ਅਮਰਿੰਦਰ ਸਿੰਘ ਨਾਲ ਉਲਝਿਆ ਪੇਚ ਸਾਫ਼ ਹੋ ਗਿਆ ਹੈ। ਸਾਰੀਆਂ ਸੀਟਾਂ ‘ਤੇ ਭਾਜਪਾ, ਲੋਕ ਪੰਜਾਬ ਕਾਂਗਰਸ ਅਤੇ ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਵਿਚਾਲੇ ਸਮਝੌਤਾ ਹੋ ਗਿਆ ਹੈ। ਜਦਕਿ ਬੈਂਸ ਭਰਾ ਇਸ ਗਠਜੋੜ ਤੋਂ ਬਾਹਰ ਹਨ।
ਪੰਜਾਬ ਵਿਧਾਨ ਸਭਾ ਚੋਣਾਂ ਦੇ ਦੰਗਲ ਵਿੱਚ ਭਾਜਪਾ ਨੇ ਆਪਣੇ 70 ਉਮੀਦਵਾਰ ਮੈਦਾਨ ਵਿੱਚ ਉਤਾਰ ਸਕਦਾ ਹੈ। 5 ਸੀਟਾਂ ਜੋ ਲੋਕ ਇਨਸਾਫ ਪਾਰਟੀ ਨੂੰ ਮਿਲਣੀਆਂ ਸਨ, ਉਹ ਵੀ ਹੁਣ ਕੈਪਟਨ ਅਤੇ ਢੀਂਡਸਾ ਤੇ ਬੀਜੇਪੀ ‘ਚ ਵੰਡੀਆਂ ਜਾਣਗੀਆਂ। ਇਸ ਤੋਂ ਬਾਅਦ ਭਾਜਪਾ ਦੀਆਂ ਸੀਟਾਂ ਵਧ ਸਕਦੀਆਂ ਹਨ ਅਤੇ 10 ਸੀਟਾਂ, ਜਿਨ੍ਹਾਂ ‘ਤੇ ਪੇਚ ਫਸਿਆ ਹੋਇਆ ਸੀ, ਜੇਕਰ ਕੈਪਟਨ ਨੂੰ ਦਿੱਤੀਆਂ ਗਈਆਂ ਤਾਂ ਉਹ ਵੀ ਘੱਟ ਸਕਦੀਆਂ ਹਨ।
ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਭਾਜਪਾ ਉਮੀਦਵਾਰਾਂ ਦੀ ਸੂਚੀ ਵਿੱਚ ਦੇਰੀ ਦੇ ਦੋ ਕਾਰਨ ਸਨ। ਇੱਕ ਲੋਕ ਇਨਸਾਫ ਪਾਰਟੀ ਵੱਲੋਂ ਸੀਟਾਂ ਵਧਾਉਣ ਦੀ ਮੰਗ ਅਤੇ ਦੂਸਰਾ ਕੈਪਟਨ ਅਮਰਿੰਦਰ ਸਿੰਘ ਦੀ ਪੁਆੜ, ਦੋਆਬਾ ਅਤੇ ਮਾਝੇ ਦੀਆਂ 10 ਸੀਟਾਂ ‘ਤੇ ਅਸਹਿਮਤੀ। ਭਾਜਪਾ ਨੇ ਗਠਜੋੜ ਵਿੱਚ ਆਈ ਲੋਕ ਇਨਸਾਫ ਪਾਰਟੀ ਨੂੰ 5 ਸੀਟਾਂ ਦਿੱਤੀਆਂ ਸਨ ਪਰ ਬੈਂਸ ਭਰਾਵਾਂ ਨੇ ਮੰਗ ਕੀਤੀ ਕਿ ਉਨ੍ਹਾਂ ਨੂੰ ਘੱਟੋ-ਘੱਟ 15 ਤੋਂ 18 ਸੀਟਾਂ ਦਿੱਤੀਆਂ ਜਾਣ। ਉਹ ਉਨ੍ਹਾਂ ਸੀਟਾਂ ਦੀ ਵੀ ਮੰਗ ਕਰ ਰਹੇ ਸਨ ਜਿਨ੍ਹਾਂ ‘ਤੇ ਭਾਜਪਾ ਨੇ ਆਪਣੇ ਉਮੀਦਵਾਰ ਪਹਿਲਾਂ ਹੀ ਤੈਅ ਕਰ ਲਏ ਹਨ। ਦੋ ਦਿਨਾਂ ਤੱਕ ਚੱਲੀ ਗਹਿਗੱਚ ਵਿਚਾਰ-ਵਟਾਂਦਰੇ ਤੋਂ ਬਾਅਦ ਵੀ ਦੋਵਾਂ ਵਿਚਾਲੇ ਸੀਟਾਂ ਦੀ ਵੰਡ ਨੂੰ ਲੈ ਕੇ ਕੋਈ ਸਮਝੌਤਾ ਨਹੀਂ ਹੋ ਸਕਿਆ ਅਤੇ ਲੋਕ ਇਨਸਾਫ ਪਾਰਟੀ ਵਿਚਕਾਰੋਂ ਵੱਖ ਹੋ ਗਈ।
