ਪੀਜੀਆਈ ਚੰਡੀਗੜ੍ਹ ਦੇ ਗਾਇਨੀ ਵਾਰਡ ਵਿੱਚ ਦਾਖ਼ਲ ਹੋ ਕੇ ਜ਼ਹਿਰੀਲਾ ਟੀਕਾ ਲਗਾਉਣ ਨਾਲ ਐਤਵਾਰ ਸ਼ਾਮ ਕਰੀਬ 7 ਵਜੇ ਇੱਕ ਮਹਿਲਾ ਮਰੀਜ਼ ਦੀ ਮੌਤ ਹੋ ਗਈ। ਮਹਿਲਾ ਮਰੀਜ਼ ਦੀ ਹਾਲਤ ਬਹੁਤ ਨਾਜ਼ੁਕ ਸੀ। ਉਹ ਕਰੀਬ 25 ਦਿਨਾਂ ਤੋਂ ਆਪਣੀ ਜ਼ਿੰਦਗੀ ਦੀ ਲੜਾਈ ਲੜ ਰਹੀ ਸੀ। ਪੀਜੀਆਈ ਪ੍ਰਸ਼ਾਸਨ ਨੇ ਇਸ ਦੀ ਪੁਸ਼ਟੀ ਕਰਦਿਆਂ ਕਿਹਾ ਹੈ ਕਿ ਮਾਹਿਰਾਂ ਦੀ ਟੀਮ ਦੀਆਂ ਸਾਰੀਆਂ ਕੋਸ਼ਿਸ਼ਾਂ ਦੇ ਬਾਵਜੂਦ ਮਰੀਜ਼ ਨੂੰ ਬਚਾਇਆ ਨਹੀਂ ਜਾ ਸਕਿਆ। ਲਾਸ਼ ਨੂੰ ਪੀਜੀਆਈ ਦੇ ਮੁਰਦਾਘਰ ਵਿੱਚ ਰਖਵਾਇਆ ਗਿਆ ਹੈ। ਪੁਲਿਸ ਕਾਰਵਾਈ ਤੋਂ ਬਾਅਦ ਲਾਸ਼ ਵਾਰਸਾਂ ਹਵਾਲੇ ਕਰ ਦਿੱਤੀ ਜਾਵੇਗੀ।
ਹਰਮੀਤ ਕੌਰ (24) ਵਾਸੀ ਰਾਜਪੁਰਾ, ਪਟਿਆਲਾ ਦੀ ਪਹਿਲਾਂ ਹੀ ਕਿਡਨੀ ਫੇਲ ਸੀ। 4 ਨਵੰਬਰ ਨੂੰ ਉਸ ਨੇ ਬੱਚੇ ਨੂੰ ਜਨਮ ਦਿੱਤਾ। ਇਸ ਤੋਂ ਬਾਅਦ ਉਸ ਦੀ ਹਾਲਤ ਗੰਭੀਰ ਹੋ ਗਈ। ਇਸ ਤੋਂ ਬਾਅਦ ਉਸ ਨੂੰ ਪੀਜੀਆਈ ਰੈਫਰ ਕਰ ਦਿੱਤਾ ਗਿਆ। ਉਸ ਨੂੰ 7 ਨਵੰਬਰ ਨੂੰ ਪੀ.ਜੀ.ਆਈ. ਭਰਤੀ ਕੀਤਾ ਗਿਆ।
ਪੀਜੀਆਈ ਵਿੱਚ ਇਲਾਜ ਦੌਰਾਨ 15 ਨਵੰਬਰ ਨੂੰ ਰਾਤ 11:05 ਵਜੇ ਇੱਕ ਔਰਤ ਪੀਜੀਆਈ ਦੇ ਗਾਇਨੀ ਵਾਰਡ ਵਿੱਚ ਪਹੁੰਚੀ ਅਤੇ ਉੱਥੇ ਦਾਖ਼ਲ ਹਰਮੀਤ ਕੌਰ ਦੀ ਨਣਦ ਨੂੰ ਦੱਸਿਆ ਕਿ ਡਾਕਟਰ ਨੇ ਮਰੀਜ਼ ਨੂੰ ਟੀਕਾ ਲਗਾਉਣ ਲਈ ਭੇਜਿਆ ਹੈ। ਟੀਕੇ ਤੋਂ ਬਾਅਦ ਹਰਮੀਤ ਦੀ ਹਾਲਤ ਵਿਗੜਨ ਲੱਗੀ। ਇਸ ਕਾਰਨ ਉਸ ਨੂੰ ਵਾਰਡ ਤੋਂ ਆਈਸੀਯੂ ਵਿੱਚ ਸ਼ਿਫਟ ਕਰ ਦਿੱਤਾ ਗਿਆ।
ਉਸ ਦੀ ਕਿਡਨੀ ਪਹਿਲਾਂ ਹੀ ਖ਼ਰਾਬ ਸੀ ਅਤੇ ਇੰਜੈਕਸ਼ਨ ਲੱਗਣ ਕਾਰਨ ਹਾਲਤ ਖ਼ਰਾਬ ਹੋ ਗਈ ਸੀ। ਸ਼ੱਕ ਹੋਣ ‘ਤੇ ਨਣਦ ਨੇ ਟੀਕਾ ਲਗਾਉਣ ਵਾਲੀ ਔਰਤ ਦੀ ਫੋਟੋ ਖਿੱਚ ਲਈ ਸੀ। ਜਦੋਂ ਮਾਮਲਾ ਮੀਡੀਆ ਵਿੱਚ ਆਇਆ ਤਾਂ ਜਾਂਚ ਸ਼ੁਰੂ ਕਰ ਦਿੱਤੀ ਗਈ। ਪੁਲਿਸ ਨੇ ਟੀਕਾ ਲਗਾਉਣ ਵਾਲੀ ਔਰਤ ਜਸਪ੍ਰੀਤ ਕੌਰ ਸਮੇਤ ਚਾਰ ਲੋਕਾਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਮੁਲਜ਼ਮਾਂ ਵਿੱਚ ਹਰਮੀਤ ਕੌਰ ਦਾ ਅਸਲੀ ਭਰਾ ਜਸਮੀਤ ਸਿੰਘ, ਰਿਸ਼ਤੇਦਾਰ ਬੂਟਾ ਸਿੰਘ ਅਤੇ ਮਨਦੀਪ ਸਿੰਘ ਸ਼ਾਮਲ ਹਨ। ਦਰਅਸਲ, ਜਸਮੀਤ ਆਪਣੀ ਭੈਣ ਦੇ ਅੰਤਰਜਾਤੀ ਵਿਆਹ ਤੋਂ ਨਾਰਾਜ਼ ਸੀ। ਗੁੱਸੇ ਕਾਰਨ ਉਸ ਨੇ ਹਸਪਤਾਲ ‘ਚ ਭੈਣ ਹਰਮੀਤ ਦਾ ਕਤਲ ਕਰਵਾਉਣ ਦੀ ਯੋਜਨਾ ਬਣਾਈ। ਇਸ ਦੇ ਲਈ ਉਸ ਨੇ ਆਪਣੇ ਰਿਸ਼ਤੇਦਾਰ ਬੂਟਾ ਸਿੰਘ ਨਾਲ ਸੰਪਰਕ ਕੀਤਾ। ਬੂਟਾ ਸਿੰਘ ਨੇ ਮਰੀਜ਼ਾਂ ਦੀ ਦੇਖਭਾਲ ਦਾ ਕੰਮ ਕਰਨ ਵਾਲੇ ਮਨਦੀਪ ਸਿੰਘ ਦੀ ਭਾਲ ਕੀਤੀ।
ਮੁਲਜ਼ਮਾਂ ਨੇ ਹਰਮੀਤ ਨੂੰ ਜ਼ਹਿਰੀਲਾ ਟੀਕਾ ਦੇਣ ਦੀ ਯੋਜਨਾ ਬਣਾਈ। ਇਸ ਦੇ ਲਈ ਕਾਕਰੋਚ ਮਾਰ ਸਪ੍ਰੇ, ਸੈਨੀਟਾਈਜ਼ਰ ਅਤੇ ਨੀਂਦ ਦੀਆਂ ਗੋਲੀਆਂ ਤੋਂ ਜ਼ਹਿਰੀਲਾ ਟੀਕਾ ਤਿਆਰ ਕੀਤਾ ਗਿਆ। ਇਸ ਤੋਂ ਪਹਿਲਾਂ ਮਨਦੀਪ ਹਰਮੀਤ ਨੂੰ ਇਹ ਟੀਕਾ ਦੇਣ ਜਾ ਰਿਹਾ ਸੀ ਪਰ ਪੀਜੀਆਈ ਦੇ ਗਾਇਨੀ ਵਾਰਡ ਵਿੱਚ ਪੁਰਸ਼ਾਂ ਦੇ ਦਾਖ਼ਲੇ ’ਤੇ ਪਾਬੰਦੀ ਕਾਰਨ ਉਹ ਕਾਮਯਾਬ ਨਹੀਂ ਹੋ ਸਕਿਆ। ਇਸ ਤੋਂ ਬਾਅਦ ਉਸ ਨੇ ਸੰਗਰੂਰ ਦੀ ਜਸਪ੍ਰੀਤ ਕੌਰ ਨੂੰ ਟੀਕਾ ਲਗਾਉਣ ਲਈ ਤਿਆਰ ਕੀਤਾ ਅਤੇ ਰੇਕੀ ਕਰਨ ਤੋਂ ਬਾਅਦ ਉਸ ਨੂੰ ਲੈ ਕੇ ਪੀਜੀਆਈ ਪਹੁੰਚਿਆ।
15 ਨਵੰਬਰ ਦੀ ਰਾਤ ਨੂੰ ਜਸਪ੍ਰੀਤ ਕੌਰ ਟੀਕਾ ਲਗਾਉਣ ਵਿਚ ਸਫਲ ਹੋ ਗਈ ਸੀ ਪਰ ਜਿਵੇਂ ਹੀ ਹਰਮੀਤ ਦੀ ਸਿਹਤ ਵਿਗੜ ਗਈ ਤਾਂ ਹੰਗਾਮਾ ਹੋ ਗਿਆ। ਇਸ ਦੌਰਾਨ ਮਨਦੀਪ ਅਤੇ ਜਸਪ੍ਰੀਤ ਪੀਜੀਆਈ ਤੋਂ ਫਰਾਰ ਹੋ ਗਏ। ਹਰਮੀਤ ਕੌਰ ਅਤੇ ਉਸ ਦਾ ਪਤੀ ਗੁਰਵਿੰਦਰ ਇੱਕੋ ਪਿੰਡ ਰਾਜਪੁਰਾ (ਪਟਿਆਲਾ) ਦੇ ਵਸਨੀਕ ਸਨ। ਦੋਵਾਂ ਨੇ ਪਿਛਲੇ ਸਾਲ ਸਤੰਬਰ ‘ਚ ਲਵ ਮੈਰਿਜ ਕੀਤੀ ਸੀ। ਹਰਮੀਤ ਦਾ ਪਰਿਵਾਰ ਇਸ ਤੋਂ ਦੁਖੀ ਸੀ। ਖਾਸ ਕਰਕੇ ਹਰਮੀਤ ਦਾ ਭਰਾ ਜਸਮੀਤ ਸਿੰਘ ਬਹੁਤ ਗੁੱਸੇ ਵਿੱਚ ਸੀ। ਉਹ ਲਗਾਤਾਰ ਗੁਰਵਿੰਦਰ ਅਤੇ ਉਸਦੀ ਭੈਣ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇ ਰਿਹਾ ਸੀ। ਜਸਮੀਤ ਨੇ ਆਪਣੀ ਭੈਣ ਦੇ ਕਤਲ ਲਈ 7 ਲੱਖ ਰੁਪਏ ਦਾ ਠੇਕਾ ਦਿੱਤਾ ਸੀ। ਜਸਮੀਤ ਇੰਨਾ ਨਾਰਾਜ਼ ਸੀ ਕਿ ਉਸ ਨੇ ਮੁਲਜ਼ਮਾਂ ਨੂੰ ਕਿਹਾ ਕਿ ਕੰਮ ਪੂਰਾ ਕੀਤਾ ਜਾਵੇ ਅਤੇ ਬਦਲੇ ਵਿੱਚ ਉਹ 10 ਲੱਖ ਰੁਪਏ ਦੇ ਸਕਦਾ ਹੈ।
ਜਸਮੀਤ ਸਿੰਘ ਨੇ ਆਪਣੇ ਰਿਸ਼ਤੇਦਾਰ ਬੂਟਾ ਸਿੰਘ ਰਾਹੀਂ ਮਨਦੀਪ ਨਾਲ ਸੌਦਾ ਤੈਅ ਕੀਤਾ ਸੀ। ਇਸ ਕੰਮ ਲਈ ਮਨਦੀਪ ਨੂੰ 50 ਹਜ਼ਾਰ ਰੁਪਏ ਐਡਵਾਂਸ ਵੀ ਦਿੱਤੇ ਗਏ ਸਨ। ਉਸ ਨੇ ਜਸਪ੍ਰੀਤ ਕੌਰ ਨੂੰ ਟੀਕਾ ਲਾਉਣ ਲਈ 3200 ਰੁਪਏ ਦਿੱਤੇ ਸਨ। ਹੁਣ ਸੈਕਟਰ-11 ਥਾਣਾ ਪੁਲਿਸ ਇਸ ਮਾਮਲੇ ‘ਚ ਕਤਲ ਦੀ ਧਾਰਾ ਜੋੜ ਸਕਦੀ ਹੈ। ਮਹਿਲਾ ਦੀ ਮੌਤ ਤੋਂ ਬਾਅਦ ਉਸ ਦੇ ਪਤੀ ਗੁਰਵਿੰਦਰ ਸਿੰਘ ਅਤੇ ਹੋਰ ਰਿਸ਼ਤੇਦਾਰਾਂ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ।
