ਪੰਜਾਬ ਯੂਨੀਵਰਸਿਟੀ ਦੇ ਫਾਈਨ ਆਰਟਸ ਵਿਭਾਗ ਦੇ ਪ੍ਰੋਫੈਸਰ ਤੀਰਥੰਕਰ ਭੱਟਾਚਾਰੀਆ ਦੇ ਸੈਕਟਰ-37 ਸੀ ਸਥਿਤ ਘਰ ਤੋਂ ਕਰੀਬ 20 ਲੱਖ ਰੁਪਏ ਦੇ ਸੋਨੇ ਦੇ ਗਹਿਣੇ ਅਤੇ ਨਕਦੀ ਚੋਰੀ ਕਰਨ ਵਾਲੇ ਤਿੰਨ ਮੁਲਜ਼ਮਾਂ ਨੂੰ ਥਾਣਾ ਸਦਰ-39 ਦੀ ਪੁਲਿਸ ਨੇ ਗ੍ਰਿਫਤਾਰ ਕੀਤਾ ਹੈ। ਪੁਲਿਸ ਨੇ ਮੁਲਜ਼ਮਾਂ ਕੋਲੋਂ 95 ਫੀਸਦੀ ਸਾਮਾਨ ਬਰਾਮਦ ਕਰ ਲਿਆ ਹੈ। ਦੱਸ ਦਈਏ ਕਿ ਮੁਲਜ਼ਮਾਂ ਦੀ ਪਛਾਣ ਸੈਕਟਰ-49 ਦੇ ਰਹਿਣ ਵਾਲੇ ਤਰੁਣ ਉਰਫ਼ ਲੱਲਾ, ਵਿੱਕੀ ਅਤੇ ਦਿਲੀਪ ਵਜੋਂ ਹੋਈ ਹੈ। ਪੁਲਿਸ ਨੇ ਮੁਲਜ਼ਮਾਂ ਨੂੰ ਅਦਾਲਤ ’ਚ ਪੇਸ਼ ਕੀਤਾ ਜਿੱਥੋਂ ਉਨ੍ਹਾਂ ਨੂੰ ਦਿਨ ਦੇ ਪੁਲੀਸ ਰਿਮਾਂਡ ’ਤੇ ਭੇਜ ਦਿੱਤਾ ਗਿਆ।
ਜਾਣਕਾਰੀ ਦਿੰਦਿਆਂ ਡੀਐਸਪੀ ਚਰਨਜੀਤ ਸਿੰਘ ਵਿਰਕ ਨੇ ਦੱਸਿਆ ਕਿ ਜਿਸ ਘਰ ਵਿੱਚ ਚੋਰੀ ਹੋਈ ਹੈ ਉਸ ਦੇ ਆਲੇ-ਦੁਆਲੇ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਜਾਂਚ ਕਰਨ ਤੋਂ ਬਾਅਦ ਚੋਰਾਂ ਖ਼ਿਲਾਫ਼ ਕਾਫੀ ਪੁਖ਼ਤਾ ਸਬੂਤ ਮਿਲੇ ਹਨ। ਜਿਸ ਤੋਂ ਬਾਅਦ ਥਾਣਾ-39 ਦੇ ਇੰਚਾਰਜ ਇੰਸਪੈਕਟਰ ਨਰਿੰਦਰ ਪਟਿਆਲ ਨੂੰ ਗੁਪਤ ਸੂਚਨਾ ਮਿਲੀ ਕਿ ਮੁਲਜ਼ਮ ਸੈਕਟਰ-49 ਦੇ ਏਰੀਏ ਵਿੱਚ ਦੇਖੇ ਗਏ ਹਨ। ਜਿਸ ਤੋਂ ਬਾਅਦ ਪੁਲਿਸ ਟੀਮ ਉਥੇ ਪਹੁੰਚੀ ਅਤੇ ਦੋਸ਼ੀ ਨੂੰ ਗ੍ਰਿਫਤਾਰ ਕਰ ਲਿਆ।
ਨਾਲ ਹੀ ਪੁਲਿਸ ਜਾਂਚ ‘ਚ ਸਾਹਮਣੇ ਆਇਆ ਹੈ ਕਿ ਦੋਸ਼ੀ ਨਸ਼ੇ ਦਾ ਆਦੀ ਹੈ ਅਤੇ ਨਸ਼ੇ ਦੀ ਪੂਰਤੀ ਲਈ ਚੋਰੀਆਂ ਕਰਦਾ ਹੈ। ਮੁਲਜ਼ਮ ਤਰੁਣ ਖ਼ਿਲਾਫ਼ ਥਾਣਾ ਸਦਰ-39 ਵਿੱਚ ਅਤੇ ਇੱਕ ਕੇਸ ਥਾਣਾ-19 ਵਿੱਚ ਦਰਜ ਹੈ। ਦੂਜੇ ਮੁਲਜ਼ਮ ਵਿੱਕੀ ਖ਼ਿਲਾਫ਼ ਥਾਣਾ ਸਦਰ-19 ਵਿੱਚ ਕੇਸ ਦਰਜ ਹੈ ਅਤੇ ਥਾਣਾ-31 ਵਿੱਚ ਇੱਕ ਹੋਰ ਕੇਸ ਦਰਜ ਹੈ। ਤੀਜੇ ਮੁਲਜ਼ਮ ਦਿਲੀਪ ਖ਼ਿਲਾਫ਼ ਥਾਣਾ-39 ਵਿੱਚ ਕੇਸ ਦਰਜ ਹੈ।
ਤਰੁਣ ਅਤੇ ਵਿੱਕੀ ਜ਼ਮਾਨਤ ‘ਤੇ ਬਾਹਰ ਹਨ। ਜਦੋਂ ਚੋਰੀ ਦੀ ਘਟਨਾ ਵਾਪਰੀ ਤਾਂ ਮਕਾਨ ਮਾਲਕ ਤੀਰਥੰਕਰ ਕੇ.ਕੇ ਵਿਖੇ ਕਲਾਸਾਂ ਲੈਣ ਗਿਆ ਹੋਇਆ ਸੀ। ਚੋਰ ਦੁਪਹਿਰ 2.57 ‘ਤੇ ਘਰ ‘ਚ ਦਾਖਲ ਹੋਏ ਅਤੇ 4 ਮਿੰਟ ‘ਚ ਵਾਰਦਾਤ ਨੂੰ ਅੰਜਾਮ ਦੇ ਕੇ 3.01 ‘ਤੇ ਫਰਾਰ ਹੋ ਗਏ। ਜਦੋਂ ਉਹ ਵਾਪਸ ਆਏ ਤਾਂ ਬੈੱਡਰੂਮ ਵਿੱਚ ਅਲਮਾਰੀ ਦਾ ਸਾਮਾਨ ਖਿਲਰਿਆ ਪਿਆ ਸੀ। ਜਦੋਂ ਉਸ ਨੇ ਦੇਖਿਆ ਤਾਂ ਉਸ ਦੀ ਦਾਦੀ ਅਤੇ ਮਾਤਾ-ਪਿਤਾ ਦੇ ਬਣਾਏ ਗਹਿਣੇ ਅਤੇ ਕਰੀਬ 70 ਹਜ਼ਾਰ ਰੁਪਏ ਦੀ ਨਕਦੀ ਗਾਇਬ ਸੀ।
ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ‘ਚ ਦੱਸਿਆ ਗਿਆ ਕਿ 3 ਸੋਨੇ ਦੇ ਹਾਰ ਸੈੱਟ, 3 ਸੋਨੇ ਦੀਆਂ ਮੁੰਦਰੀਆਂ, 3 ਜੋੜੇ ਕੰਨਾਂ ਦੀਆਂ ਵਾਲੀਆਂ, ਹੱਥ ਦੇ ਕੰਗਣ, 6 ਲੌਕਟ, ਕਰੀਬ 25 ਤੋਲੇ ਸੋਨਾ ਅਤੇ ਕਰੀਬ 70 ਹਜ਼ਾਰ ਦੀ ਨਕਦੀ ਚੋਰੀ ਹੋ ਗਈ। ਬਦਮਾਸ਼ ਚੋਰਾਂ ਨੇ ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਪਹਿਲਾਂ ਉਚਿਤ ਰੇਕੀ ਕੀਤੀ ਸੀ। ਇਸ ਤੋਂ ਬਾਅਦ ਜਦੋਂ ਪ੍ਰੋਫੈਸਰ ਆਪਣੀ ਕਾਰ ਲੈ ਕੇ ਪੀਯੂ ਗਿਆ ਤਾਂ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ।
ਇਹ ਕੋਨੇ ਵਾਲਾ ਮਕਾਨ ਹੋਣ ਕਾਰਨ ਚੋਰ ਪਾਰਕ ਦੇ ਨਾਲ ਲੱਗਦੇ ਕੰਧ ਤੋਂ ਕੰਧ ਟੱਪ ਕੇ ਪਿਛਲੇ ਪਾਸੇ ਪਹੁੰਚ ਗਏ। ਚੋਰ ਦੁਪਹਿਰ 2.57 ‘ਤੇ ਘਰ ‘ਚ ਦਾਖਲ ਹੋਏ ਅਤੇ 4 ਮਿੰਟ ‘ਚ ਵਾਰਦਾਤ ਨੂੰ ਅੰਜਾਮ ਦੇ ਕੇ 3.01 ‘ਤੇ ਫਰਾਰ ਹੋ ਗਏ।
