ਚੰਡੀਗੜ੍ਹ ਦੇ ਪਾਰਕਾਂ ਵਿੱਚੋਂ ਸਟੇਨਲੈਸ ਸਟੀਲ ਦੇ ਡਸਟਬਿਨ ਚੋਰੀ ਹੋਣ ਦੇ ਮਾਮਲੇ ਲਗਾਤਾਰ ਸਾਹਮਣੇ ਆ ਰਹੇ ਹਨ। ਨਗਰ ਨਿਗਮ ਨੇ ਨਵੰਬਰ 2022 ਵਿੱਚ 3300 ਸਟੇਨਲੈਸ ਸਟੀਲ ਡਸਟਬਿਨ ਲਗਾਏ ਸਨ। ਇਸ ਵਿੱਚ ਹਰ ਵੱਡੇ ਪਾਰਕ ਵਿੱਚ 8 ਤੋਂ 10 ਡਸਟਬਿਨਾਂ ਦਾ ਸੈੱਟ ਲਗਾਇਆ ਗਿਆ ਸੀ ਪਰ ਪਿਛਲੇ ਇੱਕ ਸਾਲ ਵਿੱਚ ਹਰ ਪਾਰਕ ਵਿੱਚੋਂ ਔਸਤਨ ਦੋ ਤੋਂ ਤਿੰਨ ਡਸਟਬਿਨ ਚੋਰੀ ਹੋ ਚੁੱਕੇ ਹਨ।
ਦੱਸ ਦਈਏ ਕਿ ਕਲੀਨ ਸਿਟੀ ਗਰੀਨ ਸਿਟੀ ਸਕੀਮ ਤਹਿਤ ਚੰਡੀਗੜ੍ਹ ਵਿੱਚ 3300 ਡਸਟਬਿਨ ਲਗਾਏ ਗਏ ਸਨ। ਇਹ ਡਸਟਬਿਨ ਸਾਬਕਾ ਮੇਅਰ ਸਰਬਜੀਤ ਕੌਰ ਦੇ ਕਾਰਜਕਾਲ ਦੌਰਾਨ ਲਗਾਏ ਗਏ ਸਨ। ਇਸ ਦੀ ਸ਼ੁਰੂਆਤ ਮਨੀਮਾਜਰਾ ਦੇ ਸੈਂਟਰਲ ਪਾਰਕ ਤੋਂ ਹੋਈ। ਇਸ ਵਿੱਚ ਦੋ-ਦੋ ਡਸਟਬਿਨਾਂ ਦਾ ਸੈੱਟ ਸੀ। ਇੱਕ ਬਾਇਓਡੀਗਰੇਡੇਬਲ ਅਤੇ ਦੂਸਰਾ ਗੈਰ-ਬਾਇਓਡੀਗ੍ਰੇਡੇਬਲ ਕੂੜੇ ਲਈ ਸੀ। ਇਸ ਤੋਂ ਪਹਿਲਾਂ ਸ਼ਹਿਰ ਵਿੱਚ ਪਲਾਸਟਿਕ ਦੇ ਡਸਟਬਿਨ ਲਗਾਏ ਗਏ ਸਨ। ਹੁਣ ਇਨ੍ਹਾਂ ਦੀ ਚੋਰੀ ਨੇ ਨਗਰ ਨਿਗਮ ਲਈ ਨਵੀਂ ਸਮੱਸਿਆ ਖੜ੍ਹੀ ਕਰ ਦਿੱਤੀ ਹੈ।
ਸੈਕਟਰ-52 ਦੇ ਵਸਨੀਕ ਸਮਾਜ ਸੇਵੀ ਰਾਜੀਵ ਗਰਗ ਦਾ ਕਹਿਣਾ ਹੈ ਕਿ ਸ਼ਾਮ ਨੂੰ ਪਾਰਕਾਂ ਵਿੱਚ ਨਸ਼ੇੜੀ ਬੈਠੇ ਰਹਿੰਦੇ ਹਨ। ਉਹ ਇੱਥੇ ਬੈਠ ਕੇ ਨਸ਼ਾ ਕਰਦੇ ਹਨ। ਸਟੇਨਲੈੱਸ ਸਟੀਲ ਦੇ ਡਸਟਬਿਨ ਬਾਜ਼ਾਰ ਵਿੱਚ ਆਸਾਨੀ ਨਾਲ ਵਿਕ ਜਾਂਦੇ ਹਨ। ਇਸ ਕਾਰਨ ਨਸ਼ੇੜੀ ਇਸ ‘ਤੇ ਨਜ਼ਰ ਰੱਖਦੇ ਹਨ। ਉਨ੍ਹਾਂ ਅਪੀਲ ਕੀਤੀ ਕਿ ਨਗਰ ਨਿਗਮ ਨੂੰ ਇਸ ਪਾਸੇ ਧਿਆਨ ਦੇਣਾ ਚਾਹੀਦਾ ਹੈ ਨਹੀਂ ਤਾਂ ਜਲਦੀ ਹੀ ਪਾਰਕਾਂ ਵਿੱਚੋਂ ਇਹ ਸਾਰੇ ਡਸਟਬਿਨ ਚੋਰੀ ਹੋ ਜਾਣਗੇ।