ਪੀਟਰ ਰੇਹੜਾ ਬੀਤੀ ਰਾਤ ਅਬੋਹਰ ਵਿੱਚ ਇੱਕ ਟਰੱਕ ਦੀ ਲਪੇਟ ਵਿੱਚ ਆ ਕੇ ਪਲਟ ਗਿਆ। ਇਸ ਘਟਨਾ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ। ਇਸ ਦੌਰਾਨ ਉਸ ਦੀ ਪਤਨੀ, ਬੱਚਾ ਅਤੇ ਜੀਜਾ ਜ਼ਖ਼ਮੀ ਹੋ ਗਏ।
ਮੌਕੇ ’ਤੇ ਪੁੱਜੇ ਰੈਪਿਡ ਟੀਮ ਦੇ ਮੁਲਾਜ਼ਮਾਂ ਨੇ ਦੱਸਿਆ ਕਿ ਉਹ ਪਿੰਡ ਦੋਦਾ ਤੋਂ ਸੀਤੋ ਵੱਲ ਗਸ਼ਤ ਕਰ ਰਹੇ ਸਨ। ਇਸ ਦੌਰਾਨ ਉਨ੍ਹਾਂ ਦੇਖਿਆ ਕਿ ਪਿੰਡ ਭਾਗੂ ਰੋਡ ’ਤੇ ਇੱਕ ਪੀਟਰ ਰੇਹੜਾ ਪਲਟਿਆ ਹੋਇਆ ਸੀ। ਕੁਝ ਲੋਕ ਇਸ ਦੇ ਹੇਠਾਂ ਦੱਬੇ ਹੋਏ ਸਨ। ਉਨ੍ਹਾਂ ਆਸ-ਪਾਸ ਦੇ ਲੋਕਾਂ ਦੀ ਮਦਦ ਨਾਲ ਇਕ ਔਰਤ, ਇਕ ਸਾਲ ਦੇ ਬੱਚੇ ਅਤੇ ਕੁਝ ਹੋਰਾਂ ਨੂੰ ਬਚਾਇਆ। ਇਸਤੋਂ ਇਲਾਵਾ ਉਹ ਜ਼ਖਮੀਆਂ ਨੂੰ ਅਬੋਹਰ ਹਸਪਤਾਲ ਲੈ ਗਏ।
ਡਾਕਟਰਾਂ ਅਨੁਸਾਰ ਮ੍ਰਿਤਕ ਦੀ ਪਛਾਣ ਸੁਰਿੰਦਰ (23) ਪੁੱਤਰ ਹੰਸਰਾਜ ਵਾਸੀ ਸ਼ੇਰੇਵਾਲਾ ਵਜੋਂ ਹੋਈ ਹੈ। ਉਹ ਆਪਣੀ ਪਤਨੀ ਪੂਨਮ, ਇੱਕ ਸਾਲ ਦੇ ਬੱਚੇ ਪ੍ਰਦੀਪ ਅਤੇ ਜੀਜਾ ਰਿੰਕੂ ਪੁੱਤਰ ਗਿਰਧਾਰੀ ਲਾਲ ਵਾਸੀ ਕੁਲਾਰ ਨਾਲ ਪਿੰਡ ਜਾ ਰਿਹਾ ਸੀ। ਰਸਤੇ ਵਿੱਚ ਇੱਕ ਟਰੱਕ ਨੇ ਉਸਦੇ ਪੀਟਰ ਰੇਹੜੇ ਨੂੰ ਟੱਕਰ ਮਾਰ ਦਿੱਤੀ। ਇੱਥੇ ਜ਼ਖਮੀ ਰਿੰਕੂ ਦੀ ਹਾਲਤ ਗੰਭੀਰ ਹੋਣ ‘ਤੇ ਉਸ ਨੂੰ ਮੁੱਢਲੀ ਸਹਾਇਤਾ ਤੋਂ ਬਾਅਦ ਫਰੀਦਕੋਟ ਰੈਫਰ ਕਰ ਦਿੱਤਾ ਗਿਆ।
