ਮੋਹਾਲੀ ਦੇ ਲਾਂਡਰਾ-ਬਨੂੜ ਰੋਡ ‘ਤੇ ਸਥਿਤ ਸਰਕਾਰੀ ਹਾਈ ਸਕੂਲ ਤਸੌਲੀ ‘ਚ ਇਕ ਬੋਹੜ ਅਤੇ ਨਿੰਮ ਦਾ ਦਰੱਖਤ ਡਿੱਗ ਗਿਆ ਹੈ। ਹਾਦਸੇ ਦੇ ਸਮੇਂ ਬੱਚੇ ਸਕੂਲ ਵਿੱਚ ਪੜ੍ਹ ਰਹੇ ਸਨ। ਪਰ ਇਹ ਦਰੱਖਤ ਕਲਾਸ ਰੂਮ ਤੋਂ ਥੋੜੀ ਦੂਰ ਸੀ, ਜਿਸ ਕਰਕੇ ਇਸ ਵਿੱਚ ਕਿਸੇ ਕਿਸਮ ਦਾ ਕੋਈ ਨੁਕਸਾਨ ਨਹੀਂ ਹੋਇਆ।
ਸਕੂਲ ਪ੍ਰਸ਼ਾਸਨ ਵੱਲੋਂ ਇਸ ਮਾਮਲੇ ਦੀ ਸੂਚਨਾ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਨੂੰ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ ਮੋਹਾਲੀ ਦੇ ਫੇਜ਼-2, ਫੇਜ਼-4 ਅਤੇ ਫੇਜ਼ 3-5 ਦੇ ਲਾਈਟ ਪੁਆਇੰਟਾਂ ‘ਤੇ ਵੀ ਦਰੱਖਤ ਡਿੱਗਣ ਦੀ ਸੂਚਨਾ ਮਿਲੀ ਹੈ। ਬੋਹੜ ਅਤੇ ਨਿੰਮ ਦੇ ਰੁੱਖ ਬਹੁਤ ਪੁਰਾਣੇ ਸਨ ਅਤੇ ਇਕੱਠੇ ਖੜ੍ਹੇ ਸਨ। ਇਨ੍ਹਾਂ ਦੀ ਉਮਰ 150-200 ਸਾਲ ਦੇ ਕਰੀਬ ਦੱਸੀ ਜਾਂਦੀ ਹੈ।
ਸਿੱਖਿਆ ਵਿਭਾਗ ਵੱਲੋਂ ਪਿਛਲੇ ਸਾਲ ਸਾਰੇ ਸਰਕਾਰੀ ਸਕੂਲਾਂ ਵਿੱਚ ਲਗਾਏ ਗਏ ਰੁੱਖਾਂ ਦਾ ਸਰਵੇਖਣ ਕੀਤਾ ਗਿਆ ਸੀ। ਇਸ ਵਿੱਚ 200 ਤੋਂ ਵੱਧ ਦਰੱਖਤ ਪਾਏ ਗਏ ਸਨ ਪਰ ਸਰਵੇਖਣ ਤੋਂ ਬਾਅਦ ਇਨ੍ਹਾਂ ਨੂੰ ਹਟਾਉਣ ਲਈ ਕੁਝ ਨਹੀਂ ਕੀਤਾ ਗਿਆ।
ਪਿਛਲੇ ਸਾਲ ਚੰਡੀਗੜ੍ਹ ਦੇ ਇਕ ਨਿੱਜੀ ਸਕੂਲ ‘ਤੇ 250 ਸਾਲ ਪੁਰਾਣਾ ਦਰੱਖਤ ਡਿੱਗਣ ਕਰਕੇ ਇਕ ਵਿਦਿਆਰਥਣ ਦੀ ਮੌਤ ਹੋ ਗਈ ਸੀ ਅਤੇ 14 ਹੋਰ ਜ਼ਖਮੀ ਹੋ ਗਏ ਸਨ।ਇਸ ਤੋਂ ਬਾਅਦ ਦਰੱਖਤਾਂ ਦੇ ਸਰਵੇ ਦਾ ਕੰਮ ਸ਼ੁਰੂ ਕੀਤਾ ਗਿਆ। ਸੋਮਵਾਰ ਨੂੰ ਵੀ ਚੰਡੀਗੜ੍ਹ ‘ਚ ਤੂਫਾਨ ਤੋਂ ਬਾਅਦ ਸੈਕਟਰ 15-16 ਲਾਈਟ ਪੁਆਇੰਟ, ਪਿੰਡ ਧਨਾਸ ਅਤੇ ਪਟਿਆਲਾ ਦੇ ਰਾਓ ਨਦੀ ‘ਤੇ ਦਰੱਖਤ ਡਿੱਗ ਗਏ ਸਨ।
