ਕਪੂਰਥਲਾ ਦੇ ਫਗਵਾੜਾ ਸਬ-ਡਿਵੀਜ਼ਨ ਦੇ ਵਸਨੀਕ ਇੱਕ ਵਿਅਕਤੀ ਦੇ ਕ੍ਰੈਡਿਟ ਕਾਰਡ ਤੋਂ 2 ਲੱਖ 64 ਹਜ਼ਾਰ 770 ਰੁਪਏ ਦੀ ਆਨਲਾਈਨ ਧੋਖਾਧੜੀ ਹੋਈ ਹੈ। ਹਾਲਾਂਕਿ ਇਸ ਮਾਮਲੇ ‘ਚ 8 ਮਹੀਨਿਆਂ ਦੀ ਜਾਂਚ ਤੋਂ ਬਾਅਦ ਪੁਲਸ ਨੇ 4 ਸੂਬਿਆਂ ਦੇ 5 ਦੋਸ਼ੀਆਂ ਖਿਲਾਫ ਧੋਖਾਦੇਹੀ ਦਾ ਮਾਮਲਾ ਦਰਜ ਕੀਤਾ ਹੈ।
ਪੀੜਤ ਇੰਦਰਜੀਤ ਮਠਾਰੂ ਨੇ ਦੱਸਿਆ ਕਿ ਜਨਵਰੀ 2024 ਵਿੱਚ ਕਿਸੇ ਨੇ ਉਸ ਦੇ ਅਤੇ ਉਸ ਦੀ ਪਤਨੀ ਦੇ ਕ੍ਰੈਡਿਟ ਕਾਰਡ ਤੋਂ ਆਨਲਾਈਨ ਸੋਨਾ ਖਰੀਦਿਆ ਸੀ। ਜਿਸ ਦਾ ਪਤਾ ਉਸ ਨੂੰ ਉਦੋਂ ਲੱਗਾ ਜਦੋਂ ਉਸ ਦੇ ਮੋਬਾਈਲ ‘ਤੇ ਲਗਾਤਾਰ ਕਈ ਲੈਣ-ਦੇਣ ਦੇ ਐਸ.ਐਮ.ਐਸ. ਆਏ ਜਦੋਂ ਕਿ ਉਸ ਦਾ ਕ੍ਰੈਡਿਟ ਕਾਰਡ ਘਰ ਹੀ ਰੱਖਿਆ ਹੋਇਆ ਸੀ।
ਜਾਂਚ ਤੋਂ ਬਾਅਦ ਪਤਾ ਲੱਗਾ ਕਿ ਆਨਲਾਈਨ ਖਰੀਦਿਆ ਗਿਆ ਸੋਨਾ ਦਿੱਲੀ, ਹਰਿਆਣਾ, ਬਿਹਾਰ ਅਤੇ ਉੱਤਰ ਪ੍ਰਦੇਸ਼ ਦੇ 5 ਲੋਕਾਂ ਨੂੰ ਪਹੁੰਚਾਇਆ ਗਿਆ ਸੀ। ਜਿਸ ਨੇ ਉਸਦੇ ਅਤੇ ਉਸਦੀ ਪਤਨੀ ਦੇ ਕ੍ਰੈਡਿਟ ਕਾਰਡ ਤੋਂ ਵੱਖ-ਵੱਖ ਲੈਣ-ਦੇਣ ਕਰਦੇ ਹੋਏ 2 ਲੱਖ 64 ਹਜ਼ਾਰ 770 ਰੁਪਏ ਦੀ ਖਰੀਦਦਾਰੀ ਕੀਤੀ।
ਇਸ ਸਬੰਧੀ ਪੀੜਤ ਇੰਦਰਜੀਤ ਮਠਾਰੂ ਨੇ 10 ਜਨਵਰੀ 2024 ਨੂੰ ਐਸਐਸਪੀ ਕਪੂਰਥਲਾ ਨੂੰ ਸ਼ਿਕਾਇਤ ਕੀਤੀ ਸੀ। 8 ਮਹੀਨਿਆਂ ਬਾਅਦ ਜ਼ਿਲਾ ਪੁਲਸ ਨੇ ਜਾਂਚ ਕਰਦੇ ਹੋਏ 5 ਠੱਗਾਂ ਖਿਲਾਫ ਧੋਖਾਧੜੀ ਦੀ ਧਾਰਾ ਤਹਿਤ ਪਰਚਾ ਦਰਜ ਕੀਤਾ ਹੈ।
ਮੁਲਜ਼ਮਾਂ ਦੀ ਪਛਾਣ ਰਵਿਦਾਸ ਵਾਸੀ ਜਨਕਪੁਰੀ ਦਿੱਲੀ, ਮਨੀਸ਼ ਝਾਅ ਵਾਸੀ ਸਨਾਤਨ ਧਰਮ ਮੰਦਰ ਨੇੜੇ ਅੰਬਾਲਾ ਹਰਿਆਣਾ, ਅਵਿਨਾਸ਼ ਗੌਤਮ ਵਾਸੀ ਉੱਤਮ ਨਗਰ ਦਿੱਲੀ, ਆਨੰਦ ਰਾਜਪੂਤ ਵਾਸੀ ਸਫਦਰਗੰਜ ਕਾਨਪੁਰ ਨਗਰ ਉੱਤਰ ਪ੍ਰਦੇਸ਼ ਅਤੇ ਅੰਕਿਤ ਕੁਮਾਰ ਵਾਸੀ ਨਿਊ ਬੀ ਚੰਦਰਮਾਰੀ ਮੋਤੀ ਵਜੋਂ ਹੋਈ ਹੈ।
