ਭੁਨਰਹੇੜੀ, ਸਨੌਰ, ਪਟਿਆਲਾ, 20 ਜੁਲਾਈ: ਪੰਜਾਬ ਦੇ ਵਣ ਤੇ ਜੰਗਲੀ ਜੀਵ ਸੁਰੱਖਿਆ ਅਤੇ ਖੁਰਾਕ ਤੇ ਸਿਵਲ ਸਪਲਾਈਜ਼ ਅਤੇ ਖਪਤਕਾਰ ਸੁਰੱਖਿਆ ਮਾਮਲੇ ਵਿਭਾਗਾਂ ਦੇ ਮੰਤਰੀ ਲਾਲ ਚੰਦ ਕਟਾਰੂਚੱਕ ਨੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਵੱਲੋਂ ਕੀਤੀ ਗਈ ਅਪੀਲ ਤਹਿਤ ਪੰਜਾਬ ਅੰਦਰ ਕਿਸਾਨਾਂ ਦੀਆਂ ਮੋਟਰਾਂ ‘ਤੇ 5-5 ਬੂਟੇ ਲਗਾਉਣ ਦੀ ਮੁਹਿੰਮ ਦੀ ਸ਼ੁਰੂਆਤ ਅੱਜ ਸਨੌਰ ਹਲਕੇ ਦੇ ਪਿੰਡ ਨੈਣਾ ਖੁਰਦ ਤੋਂ ਕੀਤੀ।
ਕਟਾਰੂਚੱਕ ਮੁੱਖ ਮੰਤਰੀ ਦੇ ਵਾਤਾਵਰਣ ਸਬੰਧੀ ਫ਼ਲੈਗਸ਼ਿਪ ਪ੍ਰੋਗਰਾਮ ਸ਼ਹੀਦ-ਏ-ਆਜ਼ਮ ਭਗਤ ਸਿੰਘ ਹਰਿਆਵਲ ਲਹਿਰ ਤਹਿਤ ਸਨੌਰ ਹਲਕੇ ‘ਚ ਵਿਧਾਇਕ ਸ. ਹਰਮੀਤ ਸਿੰਘ ਪਠਾਣਮਾਜਰਾ ਦੀ ਅਗਵਾਈ ਹੇਠ 50 ਹਜ਼ਾਰ ਬੂਟੇ ਅਤੇ 115 ਤ੍ਰਿਵੈਣੀਆਂ ਲਗਾਉਣ ਦੀ ਸ਼ੁਰੂਆਤ ਕਰਵਾਉਣ ਪੁੱਜੇ ਹੋਏ ਸਨ। ਉਨ੍ਹਾਂ ਨੇ ਕੁਲ੍ਹੇਮਾਜਰਾ ਫਾਰਮ ‘ਚ ਬੂਟੇ ਲਗਾਉਣ ਮਗਰੋਂ ਪਿੰਡਾਂ ‘ਚ ਬੂਟੇ ਵੰਡਣ ਦੀ ਵੀ ਸ਼ੁਰੂਆਤ ਕੀਤੀ।
ਕਟਾਰੂਚੱਕ ਨੇ ਕਿਹਾ ਕਿ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠਲੀ ਪੰਜਾਬ ਸਰਕਾਰ ਨੇ ਰਾਜ ਨੂੰ ਮੁੜ ਤੋਂ ਰੰਗਲਾ ਪੰਜਾਬ ਬਣਾਉਣ ਲਈ ਹਰਿਆਲੀ ਨੂੰ ਵਿਕਾਸ ਦਾ ਹਿੱਸਾ ਬਣਾਇਆ ਹੈ, ਜਿਸ ਲਈ ਸਰਕਾਰ ਨੇ ਅਹਿਮ ਫੈਸਲਾ ਲੈਂਦਿਆਂ ਟੈਕਸਟਾਈਲ ਪਾਰਕ ਪ੍ਰਾਜੈਕਟ ਦੀ ਥਾਂ ਮੱਤੇਵਾੜਾ ਜੰਗਲ ਨੂੰ ਬਚਾਉਣ ਨੂੰ ਪਹਿਲ ਦਿੱਤੀ ਹੈ।
ਉਨ੍ਹਾਂ ਦੱਸਿਆ ਕਿ ਰਾਜ ‘ਚ ਨਗਰ-ਵਣ ਯੋਜਨਾ ਅਧੀਨ ਬਣਾਏ ਜਾ ਰਹੇ 4 ਨਵੇਂ ਵਾਤਾਵਰਣ ਪਾਰਕਾਂ ‘ਚੋਂ ਇੱਕ ਪਾਰਕ ਪਟਿਆਲਾ ਜ਼ਿਲ੍ਹੇ ਦੇ ਖੇੜੀ ਗੁੱਜਰਾਂ ‘ਚ 61.10 ਲੱਖ ਰੁਪਏ ਦੀ ਲਾਗਤ ਨਾਲ ਵਿਕਸਤ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਨੇ ਐਲਾਨ ਕੀਤਾ ਕਿ ਰਾਜ ਅੰਦਰ ਬਣਾਈਆਂ ਜਾ ਰਹੀਆਂ 154 ਗੁਰੂ ਨਾਨਕ ਬਗੀਚੀਆਂ ‘ਚੋਂ ਇੱਕ ਬਗੀਚੀ ਹਲਕਾ ਸਨੌਰ ‘ਚ ਵੀ ਬਣਾਈ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਰਾਜ ‘ਚ ਨਜ਼ਾਇਜ਼ ਕਬਜ਼ਿਆਂ ਹੇਠੋਂ ਛੁਡਵਾਈਆਂ ਜਮੀਨਾਂ ‘ਤੇ ਵੀ ਬੂਟੇ ਲਗਾਉਣ ਤਹਿਤ ਬੀੜ ਕੁਲੇਮਾਜਰਾ ‘ਚ ਵੀ 43 ਏਕੜ ਜਮੀਨ ‘ਚ ਬੂਟੇ ਲਾਏ ਜਾ ਰਹੇ ਹਨ।
ਆਜ਼ਮ ਸ. ਭਗਤ ਸਿੰਘ ਹਰਿਆਵਲ ਲਹਿਰ ਲਈ ਵਿਸ਼ੇਸ਼ ਫੰਡ ਰਾਖਵੇ ਰੱਖੇ ਅਤੇ ਇਸ ਤਹਿਤ 58.63 ਲੱਖ ਬੂਟੇ ਲਗਾਏ ਜਾ ਰਹੇ ਹਨ। ਇਸ ਦੇ ਨਾਲ ਹੀ ਰਾਜ ਦੇ ਹਰ ਹਲਕੇ ‘ਚ ਸਾਡੀ ਪੁਰਾਣੀ ਵਿਰਾਸਤ ਨਿੰਮ, ਬੋਹੜ ਤੇ ਪਿੱਪਲ ਦਰਖਤਾਂ ਦੀਆਂ 115-115 ਤ੍ਰਿਵੈਣੀਆਂ ਵੀ ਲਗਾਈਆਂ ਜਾ ਰਹੀਆਂ ਹਨ। ਜਦਕਿ ਪੁਰਾਣੇ ਬੂਟਿਆਂ ਨੂੰ ਬਚਾਉਣ ਤੋਂ ਇਲਾਵਾ 1.16 ਕਰੋੜ ਨਵੇਂ ਬੂਟੇ ਲਗਾਏ ਜਾਣਗੇ, ਜਿਸ ਲਈ 20 ਲੱਖ ਬੂਟੇ ਕਿਸਾਨਾਂ ਤੇ ਐਨ.ਜੀ.ਓਜ਼ ਨੂੰ ਦੇਣ ਸਮੇਤ ਸਰਕਾਰੀ ਇਮਾਰਤਾਂ ਦੀਆਂ ਖਾਲੀ ਥਾਵਾਂ ‘ਚ ਲਾਏ ਜਾਣਗੇ। ਇਸ ਤੋਂ ਮਗਰੋਂ ਲੋਕਾਂ ਦੇ ਵਿਸ਼ਾਲ ਇਕੱਠ ਨੂੰ ਸੰਬੋਧਨ ਕਰਦਿਆਂ ਕੈਬਨਿਟ ਮੰਤਰੀ ਲਾਲ ਚੰਦ ਕਟਾਰੂਚੱਕ ਨੇ ਕਿਸਾਨਾਂ ਨੂੰ ਆਪਣੀਆਂ ਮੋਟਰਾਂ ‘ਤੇ 5-5 ਬੂਟੇ ਲਗਾਉਣ ਅਤੇ ਆਮ ਲੋਕਾਂ ਨੂੰ ਆਪਣੇ ਘਰਾਂ ਤੇ ਖਾਲੀ ਥਾਵਾਂ ‘ਚ ਬੂਟੇ ਲਗਾਕੇ ਇਨ੍ਹਾਂ ਨੂੰ ਆਪਣੇ ਧੀਆਂ-ਪੁੱਤਾਂ ਦੀ ਤਰ੍ਹਾਂ ਪਾਲਣ ਦੀ ਅਪੀਲ ਕੀਤੀ।
