- ਪ੍ਰੇਮੀ ਨੇ ਕਰਵਾਇਆ ਕਿਸੇ ਹੋਰ ਨਾਲ ਵਿਆਹ
- ਪ੍ਰੇਮਿਕਾ ਨੇ ਪ੍ਰੇਮੀ ਦੇ ਘਰ ਬਾਹਰ ਹੀ ਨਿਗਲਿਆ ਜ਼ਹਿਰ
- ਪ੍ਰੇਮਿਕਾ ਦੀ ਹੋਈ ਮੌ+ਤ, ਪ੍ਰੇਮੀ ‘ਤੇ ਹੋਇਆ ਪਰਚਾ
ਹੁਸ਼ਿਆਰਪੁਰ, 2 ਨਵੰਬਰ 2023 – ਹਾਜੀਪੁਰ ਦੇ ਥਾਣਾ ਹਾਜੀਪੁਰ ਦੇ ਪਿੰਡ ਰੈਲੀ ‘ਚ ਬੁੱਧਵਾਰ ਨੂੰ ਇਕ ਲੜਕੀ ਨੇ ਆਪਣੇ ਪ੍ਰੇਮੀ ਦੇ ਘਰ ਦੇ ਬਾਹਰ ਜ਼ਹਿਰ ਖਾ ਕੇ ਖੁਦਕੁਸ਼ੀ ਕਰ ਲਈ। ਮ੍ਰਿਤਕ ਦੀ ਪਛਾਣ ਪੂਜਾ ਪਿੰਡ ਵਾਸੀ ਸ਼੍ਰੀਪੰਡਯਨ ਵਜੋਂ ਹੋਈ ਹੈ। ਪੁਲਿਸ ਨੇ ਪੂਜਾ ਦੇ ਭਰਾ ਦੇ ਬਿਆਨਾਂ ਦੇ ਆਧਾਰ ‘ਤੇ ਨੌਜਵਾਨ ਅਕਸ਼ੈ ਕੁਮਾਰ ਖਿਲਾਫ ਖੁਦਕੁਸ਼ੀ ਲਈ ਉਕਸਾਉਣ ਦਾ ਮਾਮਲਾ ਦਰਜ ਕਰ ਲਿਆ ਹੈ। ਸ਼ਿਕਾਇਤ ਵਿੱਚ ਪੂਜਾ ਦੇ ਭਰਾ ਬੀਰਬਲ ਵਾਸੀ ਸ੍ਰੀਪੰਡਯਨ ਥਾਣਾ ਤਲਵਾੜਾ ਨੇ ਦੱਸਿਆ ਕਿ ਉਸ ਦੀਆਂ ਤਿੰਨ ਭੈਣਾਂ ਅਤੇ ਇੱਕ ਭਰਾ ਹੈ। ਭੈਣ ਪੂਜਾ ਕੁਝ ਸਮੇਂ ਤੋਂ ਅਕਸ਼ੈ ਕੁਮਾਰ ਨਾਲ ਪ੍ਰੇਮ ਸਬੰਧਾਂ ਵਿੱਚ ਸੀ।
ਪੂਜਾ ਨੇ ਮੈਨੂੰ ਦੱਸਿਆ ਸੀ ਕਿ ਉਹ ਅਕਸ਼ੈ ਨਾਲ ਵਿਆਹ ਨੂੰ ਲੈ ਕੇ ਗੱਲਬਾਤ ਕਰ ਰਹੀ ਸੀ। ਅਕਸ਼ੈ ਨੇ ਵੀ ਉਸ ਨੂੰ ਭਰੋਸਾ ਦਿੱਤਾ ਹੈ ਕਿ ਉਹ ਉਸ ਨਾਲ ਹੀ ਵਿਆਹ ਕਰੇਗਾ। ਇਸੇ ਦੌਰਾਨ ਮੇਰੇ ਚਾਚੇ ਦੇ ਲੜਕੇ ਯੋਗੇਸ਼ ਕੁਮਾਰ ਨੂੰ ਪਤਾ ਲੱਗਾ ਕਿ ਅਕਸ਼ੈ ਨੇ ਪੂਜਾ ਨਾਲ ਵਿਆਹ ਕਰਨ ਦੀ ਬਜਾਏ 26 ਅਕਤੂਬਰ ਨੂੰ ਕਿਸੇ ਹੋਰ ਲੜਕੀ ਨਾਲ ਵਿਆਹ ਕਰਵਾ ਲਿਆ ਹੈ।
ਜਦੋਂ ਪੂਜਾ ਨੂੰ ਇਸ ਗੱਲ ਦਾ ਪਤਾ ਲੱਗਾ ਤਾਂ ਉਹ ਬੁੱਧਵਾਰ ਸਵੇਰੇ ਘਰੋਂ ਨਿਕਲ ਕੇ ਰੈਲੀ ਪਿੰਡ ਪਹੁੰਚੀ ਅਤੇ ਅਕਸ਼ੈ ਦੇ ਘਰ ਦੇ ਸਾਹਮਣੇ ਜ਼ਹਿਰ ਖਾ ਲਿਆ। ਜਦੋਂ ਪੂਜਾ ਦੀ ਹਾਲਤ ਵਿਗੜਨ ਲੱਗੀ ਤਾਂ ਆਸ-ਪਾਸ ਦੇ ਲੋਕ ਉਸ ਨੂੰ ਸਿਵਲ ਹਸਪਤਾਲ ਦਸੂਹਾ ਲੈ ਗਏ ਪਰ ਰਸਤੇ ਵਿੱਚ ਨੰਗਲ ਘੋਘਰਾ ਨੇੜੇ ਪੂਜਾ ਦੀ ਮੌਤ ਹੋ ਗਈ।
