ਪੰਜਾਬ ਦੇ ਲੁਧਿਆਣਾ ਜ਼ਿਲ੍ਹੇ ਦੇ ਸ਼ਿਵਾਜੀ ਨਗਰ ਵਿੱਚ ਵਾਹਨ ਚੋਰ ਗਿਰੋਹ ਸਰਗਰਮ ਹੈ। ਤਾਜ਼ਾ ਮਾਮਲੇ ਮੁਤਾਬਿਕ ਮਾਡਲ ਟਾਊਨ ਦੀ ਡਾਕਟਰ ਤਾਨਿਆ ਸੀਐਮਸੀ ਹਸਪਤਾਲ ਵਿੱਚ ਕੰਮ ਕਰਦੀ ਆਪਣੀ ਸਹੇਲੀ ਨਾਲ ਬਰਗਰ ਪੈਕ ਕਰਵਾਉਣ ਲਈ ਦੁਕਾਨ ‘ਤੇ ਗਈ ਸੀ। ਤਾਨਿਆ ਨੇ ਐਕਟਿਵਾ ਰੈਸਟੋਰੈਂਟ ਦੇ ਬਾਹਰ ਲਗਾਈ ਸੀ ਪਰ ਗਲਤੀ ਨਾਲ ਉਹ ਚਾਬੀ ਸਕੂਟੀ ਵਿੱਚ ਲੱਗੀ ਹੀ ਭੁੱਲ ਗਈ। ਜਿਵੇਂ ਹੀ ਉਹ ਚੀਜ਼ਾਂ ਪੈਕ ਕਰਕੇ 5 ਮਿੰਟ ਬਾਅਦ ਬਾਹਰ ਆਈ ਤਾਂ ਉਹ ਹੈਰਾਨ ਰਹਿ ਗਈ। ਉਸ ਦੀ ਐਕਟਿਵਾ ਗਾਇਬ ਸੀ। ਉਸਨੇ ਤੁਰੰਤ ਰੌਲਾ ਪਾਇਆ। ਆਸ-ਪਾਸ ਦੇ ਲੋਕ ਇਕੱਠੇ ਹੋ ਗਏ ਅਤੇ ਪੁਲਸ ਨੂੰ ਸੂਚਨਾ ਦਿੱਤੀ।
ਸੀਸੀਟੀਵੀ ਕੈਮਰੇ ਵਿੱਚ ਦੇਖਿਆ ਗਿਆ ਕਿ ਲਾਲ ਕਮੀਜ਼ ਪਹਿਨੇ ਸ਼ੱਕੀ ਵਿਅਕਤੀ ਨੇ ਐਕਟਿਵਾ ਚੋਰੀ ਕਰ ਲਈ। ਤਾਨਿਆ ਦੇ ਐਕਟਿਵਾ ਪਾਰਕ ਕਰਨ ਤੋਂ ਪਹਿਲਾਂ ਉਹ ਵਿਅਕਤੀ ਰੈਸਟੋਰੈਂਟ ਦੇ ਬਾਹਰ ਕੁਝ ਦੇਰ ਤੱਕ ਘੁੰਮਦਾ ਰਿਹਾ। ਜਿਵੇਂ ਹੀ ਉਕਤ ਵਿਅਕਤੀ ਦੀ ਨਜ਼ਰ ਸਕੂਟੀ ਨਾਲ ਲੱਗੀ ਚਾਬੀ ‘ਤੇ ਪਈ ਤਾਂ ਉਸ ਨੇ ਤੁਰੰਤ ਸਕੂਟੀ ਚੋਰੀ ਕਰ ਲਈ ਅਤੇ ਮੌਕਾ ਦੇਖ ਕੇ ਭੱਜ ਗਿਆ।
ਤਾਨਿਆ ਨੇ ਦੱਸਿਆ ਕਿ ਉਹ ਫਰੀਦਕੋਟ ਵਿੱਚ ਡਾਕਟਰ ਹੈ। ਉਸ ਦੀ ਚਿੱਟੇ ਰੰਗ ਦੀ ਐਕਟਿਵਾ ਦਾ ਨੰਬਰ ਪੀ.ਬੀ.10-ਐਚ.ਬੀ-7343 ਹੈ। ਧਰਮਪੁਰਾ ਪੁਲਿਸ ਅਨੁਸਾਰ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।