ਮੁਹਾਲੀ ਦੇ ਫੇਜ਼ 1 ਵਿੱਚ ਐਤਵਾਰ ਨੂੰ ਭਾਰੀ ਮੀਂਹ ਕਾਰਨ ਇੱਕ ਮਾਰੂਤੀ ਗੱਡੀ ਉੱਤੇ ਨਿੰਮ ਦਾ ਦਰੱਖਤ ਡਿੱਗਣ ਦੀ ਖਬਰ ਸਾਹਮਣੇ ਆਈ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਕਾਰ ਮਾਲਕ ਦਾ ਇਸ ਹਾਦਸੇ ਵਿਚ ਬਚਾਅ ਰਿਹਾ ਜਦਕਿ ਕਾਰ ਦੀ ਛੱਤ ਬੁਰੀ ਤਰ੍ਹਾਂ ਨੁਕਸਾਨੀ ਗਈ।
ਦੱਸ ਦਈਏ ਕਿ ਕਾਰ ਦੇ ਮਾਲਕ ਦਾ ਨਾਮ ਵਿਨੋਦ ਹੈ ਜੋ ਕਿ ਫਰਿੱਜ ਏਅਰ ਕੰਡੀਸ਼ਨ ਮਕੈਨਿਕ ਦਾ ਕੰਮ ਕਰਦਾ ਹੈ, ਉਸ ਨੇ ਦੱਸਿਆ ਕਿ ਹਾਦਸੇ ਤੋਂ 10 ਮਿੰਟ ਪਹਿਲਾਂ ਹੀ ਕਾਰ ਪਾਰਕ ਕੀਤੀ ਸੀ, ਜਦੋਂ ਇਲਾਕੇ ਵਿੱਚ ਕਿਸੇ ਚੀਜ਼ ਦੇ ਡਿੱਗਣ ਦੀ ਜ਼ੋਰਦਾਰ ਆਵਾਜ਼ ਆਈ। ਜਦੋਂ ਲੋਕਾਂ ਨੇ ਬਾਹਰ ਆ ਕੇ ਦੇਖਿਆ ਤਾਂ ਗੱਡੀਆਂ ਦੇ ਉੱਪਰ ਇੱਕ ਦਰੱਖਤ ਡਿੱਗਿਆ ਹੋਇਆ ਸੀ, ਬਾਕੀ ਵਾਹਨ ਤਾਂ ਵਾਲ-ਵਾਲ ਬਚ ਗਏ ਪਰ ਵਿਨੋਦ ਦੀ ਕਾਰ ਦੀ ਛੱਤ ਟੁੱਟ ਗਈ। ਮੌਕੇ ‘ਤੇ ਮੌਜੂਦ ਲੋਕ ਨੇ ਮਿਲ ਕੇ ਟੁੱਟੇ ਹੋਏ ਦਰੱਖਤ ਨੂੰ ਵੱਢ ਦਿੱਤਾ ਅਤੇ ਕਾਰ ਨੂੰ ਦਰੱਖਤ ਹੇਠੋ ਕੱਢਿਆ।