ਗੁਰਦਾਸਪੁਰ, 17 ਸਤੰਬਰ 2024 – ਸੋਸ਼ਲ ਮੀਡੀਆ ਪਲੇਟਫਾਰਮ ਤੇ ਤੇਜੀ ਨਾਲ ਵਾਇਰਲ ਹੋ ਰਹੀ ਇੱਕ ਸੀਸੀਟੀਵੀ ਫੁਟੇਜ ਹੈਰਾਨ ਕਰਨ ਵਾਲੀ ਹੈ। ਫੁਟੇਜ ਗੁਰਦਾਸਪੁਰ ਦੇ ਸਿਵਲ ਹਸਪਤਾਲ ਦੀ ਹੈ ਜਿਸ ਵਿੱਚ ਇੱਕ ਬਜ਼ੁਰਗ ਔਰਤ ਦੂਜੀ ਔਰਤ ਨਾਲ ਗੱਲਾਂ ਕਰਦੀ ਕੋਈ ਨਜ਼ਰ ਆ ਰਹੀ ਹੈ ਤੇ ਬੜੀ ਚਲਾਕੀ ਨਾਲ ਆਪਣੇ ਹੱਥ ਵਿੱਚ ਫੜਿਆ ਰੁਮਾਲ ਪਿੱਛੇ ਲੈ ਜਾਂਦੀ ਹੈ ਤੇ ਰੁਮਾਲ ਦੀ ਆੜ ਵਿੱਚ ਦੂਜੀ ਔਰਤ ਦੇ ਪਿੱਛੇ ਪਿਆ ਪਰਸ ਲੁਕਾ ਕੇ ਔਰਤ ਦੇ ਸਾਹਮਣੇ ਹੀ ਲਿਫਾਫੇ ਵਿੱਚ ਪਾ ਲੈਂਦੀ ਹੈ, ਪਰ ਸਾਹਮਣੇ ਵਾਲੀ ਔਰਤ ਨੂੰ ਪਤਾ ਨਹੀਂ ਲੱਗਦਾ। ਇਹੋ ਨਹੀਂ ਪਰਸ ਚੁੱਕ ਕੇ ਉਥੋਂ ਆਰਾਮ ਨਾਲ ਲੰਗੜਾਉਂਦੀ ਹੋਈ ਨਿਕਲ ਵੀ ਜਾਂਦੀ ਹੈ।
ਪੀੜਤ ਪਰਿਵਾਰ ਨੇ ਇਸ ਸੀਸੀ ਟੀਵੀ ਦੇ ਨਾਲ ਇੱਕ ਆਡੀਓ ਵਾਇਰਲ ਕਰਕੇ ਇਸ ਔਰਤ ਦੀ ਪਹਿਚਾਣ ਕਰਨ ਦੀ ਅਪੀਲ ਕੀਤੀ ਹੈ ਨਾਲ ਹੀ ਦੱਸਿਆ ਹੈ ਕਿ ਪਰਸ ਵਿੱਚ ਇਕ ਸੋਨੇ ਦੀ ਅੰਗੂਠੀ, ਇੱਕ ਮੋਬਾਈਲ , 5 ਹਜਾਰ ਰੁਪਏ ਨਕਦੀ ਜੋ ਉਸਨੇ ਹਸਪਤਾਲ ਵਿੱਚ ਟੈਸਟ ਵਗੈਰਾ ਕਰਵਾਉਣ ਲਈ ਰੱਖੇ ਸਨ ਦੇ ਨਾਲ ਆਧਾਰ ਕਾਰਡ ਅਤੇ ਪੈਨ ਵੀ ਕਾਰਡ ਸੀ।
ਕਸਬਾ ਕਲਾਨੌਰ ਨੇੜੇ ਪਿੰਡ ਮੰਝ ਦੇ ਰਹਿਣ ਵਾਲੇ ਸੰਦੀਪ ਨੇ ਦੱਸਿਆ ਕਿ ਉਸ ਦੀ ਭਰਜਾਈ ਜੋ ਗਰਭਵਤੀ ਹੈ ਅਤੇ ਉਸਦੀ ਮਾਂ ਟੈਸਟ ਕਰਵਾਉਣ ਲਈ ਸਿਵਲ ਹਸਪਤਾਲ ਗੁਰਦਾਸਪੁਰ ਆਏ ਸਨ । ਇਸ ਦੌਰਾਨ ਉਹ ਡਾਕਟਰ ਦੇ ਕਮਰੇ ਵਿੱਚ ਚਲੇ ਗਏ ਪਰ ਉਸ ਦੀ ਭਰਜਾਈ ਗਲਤੀ ਨਾਲ ਆਪਣਾ ਪਰਸ ਬਾਹਰ ਬਣੀਆਂ ਕੁਰਸੀਆਂ ਤੇ ਹੀ ਛੱਡ ਗਈ। ਬਾਅਦ ਵਿੱਚ ਬਾਹਰ ਆਏ ਤਾਂ ਦੇਖਿਆ ਪਰਸ ਉਥੇ ਨਹੀਂ ਸੀ ਜਦੋਂ ਸੀਸੀ ਟੀਵੀ ਕੈਮਰੇ ਚੈੱਕ ਕੀਤੇ ਤਾਂ ਵੇਖਿਆ ਕਿ ਪਰਸ ਵਾਲੀ ਜਗ੍ਹਾ ਤੇ ਦੋ ਔਰਤਾਂ ਬੈਠੀਆਂ ਸੀ ਜਿਨਾਂ ਵਿੱਚੋਂ ਇੱਕ ਬਜ਼ੁਰਗ ਔਰਤ ਬੜੀ ਚਲਾਕੀ ਨਾਲ ਪਰਸ ਰੁਮਾਲ ਵਿੱਚ ਲੁਕੋ ਕੇ ਲੈ ਜਾਂਦੀ ਹੈ। ਹੁਣ ਪੀੜਤ ਪਰਿਵਾਰ ਉਸ ਦੀ ਫੁਟੇਜ ਜਾਰੀ ਕਰਕੇ ਔਰਤ ਦੀ ਪਹਿਚਾਣ ਕਰਨ ਦੀ ਅਪੀਲ ਕਰ ਰਿਹਾ ਹੈ।
