ਮੋਹਾਲੀ, 16 ਅਗਸਤ (ਬਲਜੀਤ ਮਰਵਾਹਾ) : ਨੇੜਲੇ ਪਿੰਡ ਦੇਸੂ ਮਾਜਰੇ ਦੇ ਫਲਾਈਓਵਰ ਨਜ਼ਦੀਕ ਬੀਤੀ 14-15 ਫਰਵਰੀ 2023 ਨੂੰ ਹੋਏ ਝਗੜੇ ਵਿੱਚ ਮ੍ਰਿਤਕ ਬਬਨਪ੍ਰੀਤ ਸਿੰਘ ਦੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਦੀ ਮੰਗ ਨੂੰ ਲੈ ਕੇ ਬਬਨਪ੍ਰੀਤ ਸਿੰਘ ਦੇ ਮਾਪੇ ਦਫ਼ਤਰਾਂ ਵਿਚ ਠੋਕਰਾਂ ਖਾਣ ਲਈ ਮਜਬੂਰ ਹਨ। ਹਿਮਾਯੂਪੁਰ ਸਰਹੰਦ, ਜ਼ਿਲ੍ਹਾ ਸ੍ਰੀ ਫਤਿਹਗੜ ਸਾਹਿਬ ਦੇ ਰਹਿਣ ਵਾਲੇ ਅਤੇ ਹੁਣ ਅਜੀਤ ਇਨਕਲੈਵ ਰੰਧਾਵਾ ਰੋਡ ਖਰੜ ਦੇ ਵਸਨੀਕ ਚਰਨਜੀਤ ਸਿੰਘ ਨੇ ਦੱਸਿਆ ਕਿ ਉਹ ਆਪਣੇ ਪੁੱਤਰ ਦੇ ਕਾਤਲਾਂ ਨੂੰ ਸਜ਼ਾਵਾਂ ਦਿਵਾਉਣ ਲਈ ਦਫ਼ਤਰਾਂ ਦੇ ਚੱਕਰ ਮਾਰ ਰਿਹਾ ਹੈ।
ਅੱਜ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਮ੍ਰਿਤਕ ਬਬਨਪ੍ਰੀਤ ਸਿੰਘ ਦੇ ਪਿਤਾ ਚਰਨਜੀਤ ਸਿੰਘ, ਮਾਤਾ ਅਮਨਦੀਪ ਕੌਰ, ਨਾਨੀ ਮਨਜੀਤ ਕੌਰ ਅਤੇ ਦੋਸਤ ਅਨਮੋਲ ਸਿੰਘ ਨੇ ਪੁਲਿਸ ਉਤੇ ਦੋਸ਼ ਲਗਾਇਆ ਕਿ ਪੁਲਿਸ ਦੋਸ਼ੀਆਂ ਨੂੰ ਜਾਣਬੁੱਝ ਕੇ ਗ੍ਰਿਫਤਾਰ ਨਹੀਂ ਕਰ ਰਹੀ। ਮਾਪਿਆਂ ਨੇ ਕਿਹਾ ਕਿ ਪੁਲਿਸ ਵੱਲੋਂ 7 ਦੋਸ਼ੀਆਂ ਵਿਚੋਂ ਸਿਰਫ 4 ਦੋਸ਼ੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ, ਜਦੋਂ ਕਿ ਅਜੇ ਤਿੰਨ ਦੋਸ਼ੀ ਪੁਲਿਸ ਦੀ ਗ੍ਰਿਫਤ ਤੋਂ ਬਾਹਰ ਹਨ। ਉਨ੍ਹਾਂ ਦੱਸਿਆ ਸਾਗਰ ਨਾਹਰ, ਕੁਲਬੀਰ, ਅਮਨ ਸੇਠੀ ਤੇ ਰਮਨ ਕੁਮਾਰ ਨੂੰ ਪੁਲਿਸ ਨੇ ਗ੍ਰਿਫਤਾਰ ਕਰ ਲਿਆ ਸੀ, ਪ੍ਰੰਤੂ ਹੁਣ ਰਮਨ ਕੁਮਾਰ ਨੂੰ ਕੇਸ ਵਿਚੋਂ ਕੱਢ ਦਿੱਤਾ ਗਿਆ ਹੈ। ਜਦੋਂ ਕਿ ਤਰਨਜੀਤ ਸਿੰਘ ਪ੍ਰਿੰਸ ਵਾਸੀ ਰਾਏਪੁਰ ਕਲਾਂ, ਜਸਪ੍ਰੀਤ ਸਿੰਘ ਜਸਨ ਵਾਸੀ ਦੁਰਾਲੀ, ਪਰਮਿੰਦਰ ਸਿੰਘ, ਹਰਕੀਰਤ ਸਿੰਘ ਕਾਰ ਮਾਲਕ ਨੂੰ ਅਜੇ ਤੱਕ ਗ੍ਰਿਫਤਾਰ ਨਹੀਂ ਕੀਤਾ ਗਿਆ।
ਉਨ੍ਹਾਂ ਦੱਸਿਆ ਕਿ ਪੁਲਿਸ ਵੱਲੋਂ ਉਕਤ ਦੋਸ਼ੀਆਂ ਨੂੰ ਗ੍ਰਿਫਤਾਰ ਨਾ ਕਰਨ ਕਾਰਨ ਇਕ ਦੋਸ਼ੀ ਪਰਮਿੰਦਰ ਸਿੰਘ ਵਿਦੇਸ਼ ਭੱਜਣ ਵਿੱਚ ਸਫਲ ਹੋ ਗਿਆ। ਉਨ੍ਹਾਂ ਕਿਹਾ ਕਿ ਉਹ ਇਨਸਾਫ ਲਈ ਹੁਣ ਤੱਕ ਪੁਲਿਸ ਦੇ ਉਚ ਅਧਿਕਾਰੀਆਂ ਤੋਂ ਲੈ ਕੇ ਮੁੱਖ ਮੰਤਰੀ ਤੱਕ ਪਹੁੰਚ ਕਰ ਚੁੱਕੇ ਹਨ, ਪ੍ਰੰਤੂ ਅਜੇ ਤੱਕ ਦੋਸ਼ੀਆਂ ਨੂੰ ਗ੍ਰਿਫਤਾਰ ਨਹੀਂ ਕੀਤਾ। ਉਨ੍ਹਾਂ ਪੁਲਿਸ ਉਤੇ ਦੋਸ਼ ਲਗਾਇਆ ਕਿ ਜਦੋਂ ਉਹ ਪੁਲਿਸ ਨੂੰ ਦੋਸ਼ੀਆਂ ਬਾਰੇ ਜਾਣਕਾਰੀ ਦਿੰਦੇ ਹਨ ਤਾਂ ਪੁਲਿਸ ਮੌਕੇ ਉਤੇ ਨਹੀਂ ਪਹੁੰਚਦੀ। ਉਨ੍ਹਾਂ ਦੱਸਿਆ ਕਿ ਉਹ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਪੱਤਰ ਲਿਖ ਕੇ ਅਤੇ ਉਨ੍ਹਾਂ ਦੇ ਦਫ਼ਤਰ ’ਚ ਨਿੱਜੀ ਤੌਰ ਉਤੇ ਪਹੁੰਚ ਕੇ ਇਨਸਾਫ ਦੀ ਮੰਗ ਕਰ ਚੁੱਕੇ ਹਨ, ਪ੍ਰੰਤੂ ਅਜੇ ਤੱਕ ਕੋਈ ਜਵਾਬ ਨਹੀਂ ਮਿਲਿਆ।
ਜ਼ਿਕਰਯੋਗ ਹੈ ਕਿ 14 ਅਤੇ 15 ਫਰਵਰੀ 2023 ਦੀ ਦਰਮਿਆਨੀ ਰਾਤ ਨੂੰ ਪਾਰਾ ਕਲੱਬ ਨੇੜੇ ਏਲੰਤੇ ਮਾਲ ਤੋਂ ਬਬਨਪ੍ਰੀਤ ਸਿੰਘ ਤੇ ਅਕਾਸ਼ਦੀਪ ਸਿੰਘ ਚੰਡੀਗੜ੍ਰ ਤੋਂ ਵਾਪਸ ਆ ਰਹੇ ਸਨ। ਪਾਰਾ ਕਲੱਬ ਵਿੱਚ ਉਨ੍ਹਾਂ ਦੀ ਸਾਗਰ ਨਾਹਰ ਵਾਸੀ ਸਹਿਰ ਬਡਾਲਾ, ਪਰਮਿੰਦਰ ਵਾਸੀ ਗਰੀਨ ਐਵੀਨਿਊ ਖਰੜ, ਕੁਲਬੀਰ ਸਰਾਓ ਵਾਸੀ ਨਿਆ ਸਹਿਰ ਬਡਾਲਾ, ਤਰਨਦੀਪ ਪ੍ਰਿੰਸ ਵਾਸੀ ਰਾਏਪੁਰ, ਜਸਪ੍ਰੀਤ ਸਿੰਘ ਜਸਨ ਵਾਸੀ ਦੁਰਾਲੀ, ਰਮਨ ਕੁਮਾਰ ਵਾਸੀ ਰਾਜਪੁਰਾ, ਹਰਕੀਰਤ ਸਿੰਘ ਕੁੰਭੜਾ ਤੇ ਹੋਰ 4-5 ਬੰਦਿਆਂ ਨਾਲ ਝਗੜਾ ਹੋ ਗਿਆ ਸੀ। ਇਨ੍ਹਾਂ ਸਾਰਿਆਂ ਨੇ ਗੱਡੀ ਦਾ ਪਿੱਛਾ ਕਰਦੇ ਹੋਏ ਫਲਾਈਓਵਰ ਦੇ ਨੇੜੇ ਗੱਡੀ ਨੂੰ ਘੇਰ ਕੇ ਉਨ੍ਹਾਂ ਉਤੇ ਹਮਲਾ ਕਰ ਦਿੱਤਾ ਸੀ। ਇਸ ਦੌਰਾਨ ਬਬਨਪ੍ਰੀਤ ਸਿੰਘ ਦੀ ਮੌਤ ਹੋ ਗਈ ਸੀ।
