ਲੁਧਿਆਣਾ : ਸੂਬੇ ਦੇ ਕਈ ਜ਼ਿਲ੍ਹਿਆਂ ’ਚ ਮੌਸਮ ਇਕ ਵਾਰ ਫਿਰ ਬਦਲ ਗਿਆ ਹੈ। ਸ਼ਨਿਚਰਵਾਰ ਨੂੰ ਧੁੰਦ ਛਾਈ ਰਹੀ। ਸਵੇਰ ਦੇ ਸਮੇਂ ਵਿਜ਼ੀਬਿਲਿਟੀ 15 ਤੋਂ 20 ਮੀਟਰ ਤਕ ਰਹੀ। ਇਸ ਕਾਰਨ ਰਾਹਗੀਰਾਂ ਨੂੰ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਦੁਪਹਿਰ ਦੋ ਵਜੇ ਤਕ ਧੁੰਦ ਛਾਈ ਰਹੀ। ਹਾਲਾਂਕਿ, ਵਿਚ-ਵਿਚ ਧੁੱਪ ਵੀ ਨਿਕਲੀ ਪਰ ਧੁੰਦ ਦੇ ਅੱਗੇ ਬੇਅਸਰ ਦਿਖਾਈ ਦਿੱਤੀ। ਸ਼ਾਮ ਚਾਰ ਵਜੇ ਤੋਂ ਬਾਅਦ ਤੋਂ ਪੱਛਮੀ ਗਡ਼ਬਡ਼ੀ ਦੇ ਸਰਗਰਮ ਹੋਣ ਨਾਲ ਬੱਦਲਾਂ ਨੇ ਵੀ ਸ਼ਹਿਰ ’ਚ ਐਂਟਰੀ ਕੀਤੀ।
ਇਸ ਤੋਂ ਬਾਅਦ ਠੰਢ ਅਚਾਨਕ ਵੱਧ ਗਈ। ਸ਼ਾਮ ਛੇ ਵਜੇ ਦੇ ਕਰੀਬ ਲੋਕਾਂ ਨੂੰ ਕਾਫ਼ੀ ਜ਼ਿਆਦਾ ਠੰਢ ਮਹਿਸੂਸ ਹੋ ਰਹੀ ਸੀ। ਭਾਰਤੀ ਮੌਸਮ ਵਿਭਾਗ ਚੰਡੀਗਡ਼੍ਹ ਦੇ ਮੁਤਾਬਕ ਐਤਵਾਰ ਤੇ ਸੋਮਵਾਰ ਨੂੰ ਕਈ ਜ਼ਿਲ੍ਹਿਆਂ ’ਚ ਸੀਤ ਲਹਿਰ ਦਾ ਜ਼ੋਰ ਰਹੇਗਾ। ਬੱਦਲ ਵੀ ਛਾਏ ਰਹਿਣਗੇ, ਜਿਸ ਨਾਲ ਦਿਨ ’ਚ ਠੰਢ ਵਧੇਗੀ ਤੇ ਪਾਰਾ ਡਿੱਗੇਗਾ। ਹਾਲਾਂਕਿ, ਰਾਤ ਦਾ ਤਾਪਮਾਨ ਵਧੇਗਾ। ਕੁਝ ਜ਼ਿਲ੍ਹਿਆਂ ’ਚ ਬੂੰਦਾਬਾਂਦੀ ਜਾਂ ਗਰਜ ਨਾਲ ਛਿੱਟੇ ਪੈ ਸਕਦੇ ਹਨ। 28 ਤੇ 29 ਦਸੰਬਰ ਨੂੰ ਕਈ ਜ਼ਿਲ੍ਹਿਆਂ ’ਚ ਬਾਰਿਸ਼ ਦੀ ਸੰਭਾਵਨਾ ਪ੍ਰਗਟਾਈ ਗਈ ਹੈ, ਖਾਸ ਤੌਰ ’ਤੇ ਨੀਮ ਪਹਾਡ਼ੀ ਇਲਾਕਿਆਂ ’ਚ। ਵਿਭਾਗ ਮੁਤਾਬਕ 31 ਦਸੰਬਰ ਤਕ ਲੋਕਾਂ ਨੂੰ ਕਡ਼ਾਕੇ ਦੀ ਠੰਢ ਦਾ ਸਾਹਮਣਾ ਕਰਨਾ ਪਵੇਗਾ।
