ਅਮਰੀਕਾ ਦੀ ਦਿੱਗਜ ਟੈੱਕ ਕੰਪਨੀ ਐਪਲ ਨੇ ਭਾਰਤੀ ਮੁਕਾਬਲੇਬਾਜ਼ੀ ਕਮਿਸ਼ਨ ਵੱਲੋਂ ਉਸ ਉੱਤੇ ਲੱਗੇ ਦੋਸ਼ਾਂ ਨੂੰ ਹਟਾਉਣ ਦੀ ਅਪੀਲ ਕੀਤੀ ਹੈ। ਐਪਲ ਉੱਤੇ ਦੋਸ਼ ਲੱਗੇ ਹਨ ਕਿ ਉਸ ਨੇ ਐਪ ਮਾਰਕੀਟ ਵਿਚ ਆਪਣੀ ਪਾਵਰ ਦਾ ਗਲਤ ਇਸਤੇਮਾਲ ਕੀਤਾ। ਐਪਲ ਨੇ ਆਪਣੀ ਸਫਾਈ ਵਿਚ ਕਿਹਾ ਕਿ ਦੱਖਣ ਏਸ਼ੀਆਈ ਦੇਸ਼ ਵਿਚ ਗੂਗਲ ਦੇ ਮੁਕਾਬਲੇ ਉਹ ਬਹੁਤ ਛੋਟਾ ਖਿਡਾਰੀ ਹੈ। ਇੱਥੇ ਪੂਰੀ ਤਰ੍ਹਾਂ ਗੂਗਲ ਦਾ ਡਾਮਿਨੈਂਸ ਹੈ।
ਐਪਲ ਨੇ ਆਪਣੀ ਫਾਈਲਿੰਗ ਵਿਚ ਕਿਹਾ, ਭਾਰਤ ਵਿਚ ਉਸ ਦੀ ਬਾਜ਼ਾਰ ਹਿੱਸੇਦਾਰੀ 0-5 ਫੀਸਦੀ ਹੈ, ਜਦੋਂਕਿ ਗੂਗਲ ਦਾ ਮਾਰਕੀਟ ਸ਼ੇਅਰ 90-100 ਫੀਸਦੀ ਹੈ ਕਿਉਂਕਿ ਜ਼ਿਆਦਾਤਰ ਲੋਕਾਂ ਕੋਲ ਐਂਡ੍ਰਾਇਡ ਫੋਨ ਹੈ। ਅਜਿਹੇ ਵਿਚ ਭਾਰਤੀ ਬਾਜ਼ਾਰ ਵਿਚ ਪ੍ਰਭੁਤਵ ਦੇ ਬਿਨਾਂ ਉਹ ਆਪਣੀ ਪਾਵਰ ਦਾ ਦੁਰ ਉਪਯੋਗ ਨਹੀਂ ਕਰ ਸਕਦਾ। ਇਸ ਲਈ ਉਸ ਨੂੰ ਇਸ ਕੇਸ ਤੋਂ ਬਾਹਰ ਕੱਢਿਆ ਜਾਵੇ। 16 ਨਵੰਬਰ ਦੀ ਇਸ ਫਾਈਲਿੰਗ ਵਿਚ ਚੀਫ ਕੰਪਲਾਇੰਸ ਆਫਿਸਰ ਕਾਇਲ ਏਂਡੀਰ ਦੇ ਸਾਇਨ ਹਨ।
ਐਪਲ ਨੇ ਸੀ. ਸੀ. ਆਈ. ਨੂੰ ਆਪਣੀ ਫਾਈਲਿੰਗ ਵਿਚ ਜੋ ਵੀ ਗੱਲਾਂ ਕਹੀਆਂ ਹਨ, ਉਸ ਨੂੰ ਲੈ ਕੇ ਕੋਈ ਵੀ ਪ੍ਰਮਾਣ ਪੇਸ਼ ਨਹੀਂ ਕੀਤੇ ਹਨ, ਉਥੇ ਹੀ ਸੀ. ਸੀ. ਆਈ. ਨੇ ਵੀ ਇਸ ਮਾਮਲੇ ਵਿਚ ਹੁਣ ਤੱਕ ਜੋ ਵੀ ਜਾਂਚ ਕੀਤੀ ਹੈ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਹੈ। ਇਸ ਮਾਮਲੇ ਨੂੰ ਲੈ ਕੇ ਜਦੋਂ ਐਪਲ ਅਤੇ ਸੀ. ਸੀ. ਆਈ. ਤੋਂ ਜਾਣਕਾਰੀ ਮੰਗੀ ਗਈ ਤਾਂ ਉਨ੍ਹਾਂ ਨੇ ਇਸ ਉੱਤੇ ਕੋਈ ਰਿਸਪਾਂਸ ਨਹੀਂ ਦਿੱਤਾ, ਉਥੇ ਹੀ ਗੂਗਲ ਨੇ ਵੀ ਕੁੱਝ ਵੀ ਕਹਿਣ ਤੋਂ ਇਨਕਾਰ ਕਰ ਦਿੱਤਾ।
