ਅਮਰੀਕੀ ਕੰਪਨੀ ਗੂਗਲ ‘ਤੇ ਲਗਭਗ 936 ਕਰੋੜ ਰੁਪਏ ($113.04 ਮਿਲੀਅਨ) ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਇਹ ਇਸ ਮਹੀਨੇ ‘ਚ ਦੂਜੀ ਸਭ ਤੋਂ ਵੱਡੀ ਕਾਰਵਾਈ ਹੈ। ਇਸ ਤੋਂ ਪਹਿਲਾਂ ਕੁਝ ਦਿਨ ਪਹਿਲਾ ਹੀ ਗੂਗਲ ਨੂੰ ਕੰਪੀਟੀਸ਼ਨ ਕਮਿਸ਼ਨ ਆਫ ਇੰਡੀਆ (ਸੀਸੀਆਈ) ਨੇ ਲਗਭਗ 1,338 ਕਰੋੜ ਰੁਪਏ ਦਾ ਜੁਰਮਾਨਾ ਲਗਾਇਆ ਸੀ।
ਇੰਡੀਅਨ ਕੰਪੀਟੀਸ਼ਨ ਕਮਿਸ਼ਨ (ਸੀਸੀਆਈ) ਮੁਤਾਬਕ ਜੇਕਰ ਕੋਈ ਐਪ ਡਿਵੈਲਪਰ ਗੂਗਲ ਪਲੇਅਸਟੋਰ ‘ਤੇ ਆਪਣੀ ਐਪ ਵੇਚਣਾ ਚਾਹੁੰਦਾ ਹੈ ਜਾਂ ਐਪ/ਮੋਬਾਈਲ ਗੇਮ ਦੀ ਮਦਦ ਨਾਲ ਪੈਸਾ ਕਮਾਉਣਾ ਚਾਹੁੰਦਾ ਹੈ ਤਾਂ ਉਸ ਨੂੰ ਗੂਗਲ ਦੇ ਪੇਮੈਂਟ ਸਿਸਟਮ ਦੀ ਵਰਤੋਂ ਕਰਨੀ ਪਵੇਗੀ। ਸੀਸੀਆਈ ਮੁਤਾਬਕ ਇਹ ਭਾਰਤੀ ਮੁਕਾਬਲੇਬਾਜ਼ੀ ਐਕਟ ਦੀ ਉਲੰਘਣਾ ਹੈ। ਇਸ ਲਈ ਸੀਸੀਆਈ ਨੇ ਗੂਗਲ ‘ਤੇ 936.44 ਕਰੋੜ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਇਸ ਦੇ ਨਾਲ ਹੀ ਗੂਗਲ ਨੂੰ ਆਦੇਸ਼ ਦਿੱਤਾ ਗਿਆ ਹੈ ਕਿ ਗੂਗਲ ਪਲੇ ਸਟੋਰ ‘ਤੇ ਐਪ ਡਿਵੈਲਪਰਾਂ ਨੂੰ ਥਰਡ ਪਾਰਟੀ ਪੇਮੈਂਟ ਸਿਸਟਮ ਅਤੇ ਯੂਪੀਆਈ ਦੇ ਤਹਿਤ ਪੈਸੇ ਕਮਾਉਣ ਦੀ ਇਜਾਜ਼ਤ ਦਿੱਤੀ ਜਾਵੇ। ਨਾਲ ਹੀ, ਸੀਸੀਆਈ ਨੇ ਗੂਗਲ ਨੂੰ ਆਦੇਸ਼ ਦਿੱਤਾ ਹੈ ਕਿ ਗੂਗਲ ਕਿਸੇ ਵੀ ਐਪ ਡਿਵੈਲਪਰ ਨੂੰ ਆਪਣੀ ਅਦਾਇਗੀ ਪ੍ਰਣਾਲੀ ਦੀ ਵਰਤੋਂ ਕਰਨ ਲਈ ਮਜਬੂਰ ਨਹੀਂ ਕਰ ਸਕਦਾ ਹੈ।