ਯੂਟਿਊਬ ਨੇ ਆਪਣੇ ਪਲੇਟਫਾਰਮਾਂ ਤੋਂ 22 ਲੱਖ ਤੋਂ ਵੱਧ ਭਾਰਤੀ ਵੀਡੀਓਜ਼ ਨੂੰ ਹਟਾ ਦਿੱਤਾ ਹੈ ਅਤੇ ਲੱਖਾਂ ਚੈਨਲਾਂ ‘ਤੇ ਵੀ ਪਾਬੰਦੀ ਲਗਾ ਦਿੱਤੀ ਹੈ। ਆਓ ਤੁਹਾਨੂੰ ਦੱਸਦੇ ਹਾਂ ਕਿ ਯੂਟਿਊਬ ਨੇ ਅਜਿਹੀ ਕਾਰਵਾਈ ਕਿਉਂ ਕੀਤੀ ਹੈ।
ਦਰਅਸਲ, YouTube ਨੇ ਅਕਤੂਬਰ ਤੋਂ ਦਸੰਬਰ 2023 ਤੱਕ ਕਮਿਊਨਿਟੀ ਦਿਸ਼ਾ-ਨਿਰਦੇਸ਼ ਲਾਗੂ ਕਰਨ ਦੀ ਰਿਪੋਰਟ ਪੇਸ਼ ਕੀਤੀ ਹੈ। ਇਸ ਰਿਪੋਰਟ ‘ਚ ਦੇਖਿਆ ਗਿਆ ਹੈ ਕਿ ਯੂ-ਟਿਊਬ ਨੇ ਦੁਨੀਆ ਦੇ ਕਈ ਦੇਸ਼ਾਂ ਦੇ ਵੀਡੀਓਜ਼ ਨੂੰ ਆਪਣੇ ਪਲੇਟਫਾਰਮ ਤੋਂ ਹਟਾ ਦਿੱਤਾ ਹੈ ਪਰ ਸਭ ਤੋਂ ਜ਼ਿਆਦਾ ਗਿਣਤੀ ਭਾਰਤੀ ਵੀਡੀਓਜ਼ ਦੀ ਹੈ। ਵਿਸ਼ਵ ਪੱਧਰ ‘ਤੇ ਯੂਟਿਊਬ ਨੇ 9 ਮਿਲੀਅਨ ਯਾਨੀ 90 ਲੱਖ ਵੀਡੀਓਜ਼ ‘ਤੇ ਇਹ ਕਾਰਵਾਈ ਕੀਤੀ ਹੈ।
ਯੂਟਿਊਬ ਨੇ ਆਪਣੇ ਦਿਸ਼ਾ-ਨਿਰਦੇਸ਼ਾਂ ਦੀ ਪਾਲਣਾ ਨਾ ਕਰਨ ਕਾਰਨ ਦੁਨੀਆ ਭਰ ਤੋਂ ਕੁੱਲ 90,12,232 ਵੀਡੀਓਜ਼ ਨੂੰ ਡਿਲੀਟ ਕੀਤਾ ਹੈ। ਇਨ੍ਹਾਂ ‘ਚੋਂ ਜ਼ਿਆਦਾਤਰ ਵੀਡੀਓਜ਼ ਭਾਰਤ ਦੇ ਹਨ। ਯੂਟਿਊਬ ਨੇ ਭਾਰਤ ਤੋਂ ਕੁੱਲ 22,54,902 ਵੀਡੀਓਜ਼ ਨੂੰ ਡਿਲੀਟ ਕੀਤਾ ਹੈ। ਇਸ ਸੂਚੀ ‘ਚ ਭਾਰਤ ਤੋਂ ਬਾਅਦ ਸਿੰਗਾਪੁਰ ਦੂਜੇ ਨੰਬਰ ‘ਤੇ ਹੈ, ਜਿੱਥੇ ਯੂਟਿਊਬ ਦੁਆਰਾ 12,43,871 ਵੀਡੀਓ ਡਿਲੀਟ ਕੀਤੇ ਗਏ ਹਨ। ਇਨ੍ਹਾਂ ਤੋਂ ਇਲਾਵਾ ਯੂਟਿਊਬ ਦਾ ਆਪਣਾ ਦੇਸ਼ ਯਾਨੀ ਅਮਰੀਕਾ ਤੀਜੇ ਸਥਾਨ ‘ਤੇ ਹੈ, ਜਿਸ ਦੇ 7,88,354 ਵੀਡੀਓਜ਼ ਨੂੰ ਕੰਪਨੀ ਨੇ ਡਿਲੀਟ ਕੀਤਾ ਹੈ। ਦੱਸ ਦੇਈਏ ਕਿ ਯੂਟਿਊਬ ਦੇ ਕਮਿਊਨਿਟੀ ਦਿਸ਼ਾ-ਨਿਰਦੇਸ਼ਾਂ ਵਿੱਚ ਸਪੈਮ, ਸੰਵੇਦਨਸ਼ੀਲ ਸਮੱਗਰੀ, ਹਿੰਸਕ ਸਮੱਗਰੀ, ਗਲਤ ਜਾਣਕਾਰੀ, ਡੀਪਫੇਕ ਆਦਿ ਸ਼ਾਮਲ ਹਨ।
ਵੀਡੀਓ ਹਟਾਉਣ ਤੋਂ ਇਲਾਵਾ, YouTube ਨੇ ਆਪਣੇ ਪਲੇਟਫਾਰਮਾਂ ਤੋਂ ਕੁੱਲ 2,05,92,341 ਚੈਨਲਾਂ ਨੂੰ ਵੀ ਹਟਾ ਦਿੱਤਾ ਹੈ। ਇਹਨਾਂ ਵਿੱਚੋਂ, 92.8% ਚੈਨਲਾਂ ਨੂੰ ਸਪੈਮ, ਗੁੰਮਰਾਹਕੁੰਨ ਜਾਂ ਧੋਖਾਧੜੀ ਵਾਲੀ ਸਮੱਗਰੀ ਲਈ ਹਟਾ ਦਿੱਤਾ ਗਿਆ ਹੈ। ਇਸ ਦੇ ਨਾਲ ਹੀ, 4.5% ਨਗਨਤਾ ਜਾਂ ਜਿਨਸੀ ਸਮੱਗਰੀ ਲਈ ਅਤੇ 0.9% ਨੂੰ ਗਲਤ ਜਾਣਕਾਰੀ ਫੈਲਾਉਣ ਲਈ ਹਟਾ ਦਿੱਤਾ ਗਿਆ ਹੈ।