ਇੰਗਲੈਂਡ ਦੇ ਤੇਜ਼ ਗੇਂਦਬਾਜ਼ ਜੇਮਸ ਐਂਡਰਸਨ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈਣ ਜਾ ਰਹੇ ਹਨ। ਜੇਮਸ ਐਂਡਰਸਨ ਨੇ ਸ਼ਨੀਵਾਰ ਨੂੰ ਸੋਸ਼ਲ ਮੀਡੀਆ ‘ਤੇ ਆਪਣੀ ਸੰਨਿਆਸ ਦਾ ਐਲਾਨ ਕੀਤਾ। ਐਂਡਰਸਨ 10 ਜੁਲਾਈ ਨੂੰ ਲਾਰਡਸ ‘ਚ ਵੈਸਟਇੰਡੀਜ਼ ਖਿਲਾਫ ਆਪਣਾ ਆਖਰੀ ਟੈਸਟ ਮੈਚ ਖੇਡਣਗੇ। ਉਹ ਜੁਲਾਈ ‘ਚ 42 ਸਾਲ ਦੇ ਹੋ ਜਾਣਗੇ।
ਐਂਡਰਸਨ ਨੇ ਸੰਨਿਆਸ ਦਾ ਫੈਸਲਾ ਇੰਗਲੈਂਡ ਦੇ ਟੈਸਟ ਕੋਚ ਬ੍ਰੈਂਡਨ ਮੈਕੁਲਮ ਨਾਲ ਗੱਲਬਾਤ ਤੋਂ ਬਾਅਦ ਲਿਆ। ਮੈਕੁਲਮ ਹਾਲ ਹੀ ‘ਚ ਐਂਡਰਸਨ ਨੂੰ ਮਿਲਣ ਨਿਊਜ਼ੀਲੈਂਡ ਤੋਂ ਇੰਗਲੈਂਡ ਪਹੁੰਚੇ ਸਨ। ਇਸ ਦੌਰਾਨ ਉਸ ਨੇ ਐਂਡਰਸਨ ਨੂੰ ਕਿਹਾ ਕਿ ਉਹ ਹੁਣ ਭਵਿੱਖ ਵੱਲ ਦੇਖ ਰਿਹਾ ਹੈ ਅਤੇ 2025-26 ਐਸ਼ੇਜ਼ ਲਈ ਟੀਮ ਤਿਆਰ ਕਰਨਾ ਚਾਹੁੰਦਾ ਹੈ। ਦੋਵਾਂ ਨੇ ਇਸ ਦੌਰਾਨ ਗੋਲਫ ਵੀ ਖੇਡਿਆ।
ਐਂਡਰਸਨ ਦਾ ਟੈਸਟ ਕਰੀਅਰ 21 ਸਾਲ ਦਾ ਰਿਹਾ। ਇਸ ਦੌਰਾਨ ਉਸ ਨੇ ਇੰਗਲੈਂਡ ਟੀਮ ਲਈ ਕਈ ਮੈਚ ਆਪਣੇ ਦਮ ‘ਤੇ ਜਤਾਏ ਹਨ। ਉਹ ਦੁਨੀਆ ਦੀ ਕਿਸੇ ਵੀ ਪਿੱਚ ‘ਤੇ ਵਿਕਟ ਲੈਣ ਦੇ ਸਮਰੱਥ ਹੈ। ਜੇਮਸ ਐਂਡਰਸਨ ਨੇ 2003 ਵਿੱਚ ਲਾਰਡਸ ਵਿੱਚ ਇੰਗਲੈਂਡ ਲਈ ਆਪਣਾ ਟੈਸਟ ਡੈਬਿਊ ਕੀਤਾ ਸੀ। ਹੁਣ ਤੱਕ ਉਹ ਇੰਗਲੈਂਡ ਲਈ 187 ਟੈਸਟ ਮੈਚਾਂ ‘ਚ 700 ਵਿਕਟਾਂ ਲੈ ਚੁੱਕੇ ਹਨ। ਉਹ ਟੈਸਟ ਕ੍ਰਿਕਟ ਦੇ ਇਤਿਹਾਸ ਵਿਚ 700 ਵਿਕਟਾਂ ਲੈਣ ਵਾਲੇ ਇਕਲੌਤੇ ਤੇਜ਼ ਗੇਂਦਬਾਜ਼ ਹਨ।