ਅਰਜਨਟੀਨਾ ਦੇ ਕਪਤਾਨ ਅਤੇ ਵਿਸ਼ਵ ਦੇ ਮਹਾਨ ਫੁਟਬਾਲਰਾਂ ਵਿੱਚੋਂ ਇੱਕ ਲਿਓਨਲ ਮੇਸੀ ਨੇ ਕਿਹਾ ਹੈ ਕਿ ਇਸ ਸਾਲ ਕਤਰ ਵਿੱਚ ਹੋਣ ਵਾਲਾ ਫੀਫਾ ਵਿਸ਼ਵ ਕੱਪ ਉਸ ਦਾ ਆਖਰੀ ਵਿਸ਼ਵ ਕੱਪ ਹੋਵੇਗਾ। ਮੇਸੀ ਨੇ ਇਸ ਗੱਲ ਦਾ ਐਲਾਨ ਅਰਜਨਟੀਨਾ ਦੇ ਪੱਤਰਕਾਰ ਨਾਲ ਇੰਟਰਵਿਊ ਦੌਰਾਨ ਕੀਤਾ। ਉਸ ਨੇ ਕਿਹਾ- ਮੈਂ ਕਤਰ ‘ਚ ਹੋਣ ਵਾਲੇ ਫੀਫਾ ਵਿਸ਼ਵ ਕੱਪ ਤੋਂ ਬਾਅਦ ਇਸ ਖੇਡ ਤੋਂ ਸੰਨਿਆਸ ਲੈ ਲਵਾਂਗਾ। ਮੈਂ ਪਹਿਲਾਂ ਹੀ ਫੈਸਲਾ ਲੈ ਲਿਆ ਹੈ ਅਤੇ ਟੀਮ ਨੂੰ ਇਸ ਬਾਰੇ ਦੱਸ ਦਿੱਤਾ ਹੈ, ਇਹ ਮੇਰਾ ਆਖਰੀ ਵਿਸ਼ਵ ਕੱਪ ਹੋਵੇਗਾ।
ਦੱਸ ਦਈਏ ਕਿ ਮੇਸੀ ਇਸ ਸਮੇਂ 35 ਸਾਲ ਦੇ ਹਨ ਅਤੇ ਅਰਜਨਟੀਨਾ ਲਈ ਚਾਰ ਵਿਸ਼ਵ ਕੱਪ ਖੇਡ ਚੁਕੇ ਹਨ। 2022 ਵਿੱਚ ਹੋਣ ਵਾਲਾ ਵਿਸ਼ਵ ਕੱਪ ਉਸ ਦਾ ਪੰਜਵਾਂ ਫੀਫਾ ਵਿਸ਼ਵ ਕੱਪ ਹੋਵੇਗਾ। ਮੇਸੀ ਨੇ 2005 ਵਿੱਚ ਅਰਜਨਟੀਨਾ ਸੀਨੀਅਰ ਟੀਮ ਲਈ ਆਪਣਾ ਡੈਬਿਊ ਕੀਤਾ ਸੀ ਅਤੇ 164 ਮੈਚਾਂ ਵਿੱਚ 90 ਗੋਲ ਕੀਤੇ ਹਨ।