ਟੀਮ ਇੰਡੀਆ ਨੇ ਬਾਰਬਾਡੋਸ ਦੇ ਕੇਨਸਿੰਗਟਨ ਓਵਲ ਮੈਦਾਨ ‘ਤੇ ਟੀ-20 ਵਿਸ਼ਵ ਕੱਪ ਜਿੱਤ ਕੇ ਇਤਿਹਾਸ ਰਚ ਦਿੱਤਾ। ਬਾਰਬਾਡੋਸ ਦੀ ਧਰਤੀ ਟੀਮ ਇੰਡੀਆ ਲਈ ਹੀ ਨਹੀਂ ਸਗੋਂ ਉਸ ਹਰ ਪ੍ਰਸ਼ੰਸਕ ਲਈ ਖਾਸ ਬਣ ਗਈ ਹੈ ਪਰ ਹੁਣ ਰੋਹਿਤ ਅਤੇ ਟੀਮ ਮੁਸੀਬਤ ਚ ਫਸ ਗਏ ਹਨ। ਅਸਲ ‘ਚ ਟੀਮ ਇੰਡੀਆ ਬਾਰਬਾਡੋਸ ‘ਚ ਫਸ ਗਈ ਹੈ ਅਤੇ ਇਸ ਦਾ ਕਾਰਨ ਹੈ ਤੂਫਾਨ। ਪੂਰਾ ਬਾਰਬਾਡੋਸ ਚੱਕਰਵਾਤ ਦੀ ਲਪੇਟ ਵਿਚ ਆ ਗਿਆ ਹੈ।
ਬਾਰਬਾਡੋਸ ਵਿੱਚ ਤੂਫਾਨ ਕਾਰਨ ਬਿਜਲੀ ਅਤੇ ਪਾਣੀ ਦੀ ਵਿਵਸਥਾ ਵੀ ਠੱਪ ਹੋ ਗਈ ਹੈ। ਤੇਜ਼ ਮੀਂਹ ਅਤੇ ਤੂਫਾਨੀ ਹਵਾਵਾਂ ਨੇ ਹਵਾਈ ਆਵਾਜਾਈ ਵੀ ਠੱਪ ਕਰ ਦਿੱਤੀ ਹੈ। ਰਿਪੋਰਟਾਂ ਮੁਤਾਬਕ ਬਾਰਬਾਡੋਸ ਤੋਂ ਕਈ ਫਲਾਈਟਾਂ ਨੂੰ ਵੀ ਰੱਦ ਕਰ ਦਿੱਤਾ ਗਿਆ ਹੈ। ਅਜਿਹੇ ਚ ਸਵਾਲ ਇਹ ਹੈ ਕਿ ਕੀ ਸਾਡੇ ਹੀਰੋ, ਉੱਥੇ ਹੀ ਫਸ ਜਾਣਗੇ? ਸਿਰਫ ਖਿਡਾਰੀ ਹੀ ਨਹੀਂ, ਬੀਸੀਸੀਆਈ ਸਕੱਤਰ ਜੈ ਸ਼ਾਹ ਵੀ ਬਾਰਬਾਡੋਸ ਵਿੱਚ ਹਨ। ਖਬਰਾਂ ਮੁਤਾਬਕ ਜੈ ਸ਼ਾਹ ਨੇ ਟੀਮ ਇੰਡੀਆ ਤੋਂ ਪਹਿਲਾਂ ਭਾਰਤ ਪਰਤਣਾ ਸੀ ਪਰ ਬਾਰਬਾਡੋਸ ‘ਚ ਮੌਸਮ ਖਰਾਬ ਹੋਣ ਤੋਂ ਬਾਅਦ ਉਨ੍ਹਾਂ ਨੇ ਟੀਮ ਨਾਲ ਰਹਿਣ ਦਾ ਫੈਸਲਾ ਕੀਤਾ।
ਮੌਸਮ ਦੇ ਅੰਕੜਿਆਂ ਤੋਂ ਪਤਾ ਚੱਲਦਾ ਹੈ ਕਿ ਤੂਫਾਨ ਬੇਰੀਲ ਕਾਰਨ ਮੰਗਲਵਾਰ ਸਵੇਰੇ (ਭਾਰਤੀ ਸਮੇਂ) ਤੋਂ ਪਹਿਲਾਂ ਰੋਹਿਤ ਸ਼ਰਮਾ ਅਤੇ ਉਸ ਦੀ ਟੀ-20 ਵਿਸ਼ਵ ਕੱਪ ਜੇਤੂ ਟੀਮ ਦੇ ਬਾਰਬਾਡੋਸ ਦੇ ਕੈਰੇਬੀਅਨ ਟਾਪੂ ਨੂੰ ਛੱਡਣ ਦੀ ਕੋਈ ਸੰਭਾਵਨਾ ਨਹੀਂ ਹੈ।
ਤੂਫ਼ਾਨ ਬੇਰੀਲ ਨੂੰ ਕੈਰੇਬੀਅਨ ਵਿੱਚ ਦੂਜੇ ਸਭ ਤੋਂ ਭਿਆਨਕ ਤੂਫ਼ਾਨ ਵਜੋਂ ਦਰਜਾ ਦਿੱਤਾ ਗਿਆ ਹੈ। ਬਾਰਬਾਡੋਸ ਤੋਂ ਇਲਾਵਾ ਗ੍ਰੇਨਾਡਾ, ਸੇਂਟ ਲੂਸੀਆ, ਸੇਂਟ ਵਿਨਸੇਂਟ ਅਤੇ ਗ੍ਰੇਨਾਡਾਈਨ ਟਾਪੂਆਂ ਦੇ ਹੋਰ ਕੈਰੇਬੀਅਨ ਟਾਪੂਆਂ ਲਈ ਤੂਫਾਨ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ। ਕੇਂਦਰ ਨੇ ਕਿਹਾ ਕਿ ਹਰੀਕੇਨ ਬੇਰੀਲ ਸੋਮਵਾਰ ਨੂੰ ਬਾਰਬਾਡੋਸ ਅਤੇ ਵਿੰਡਵਰਡ ਟਾਪੂਆਂ ਵਿੱਚ ਤੇਜ਼ ਹਵਾਵਾਂ, ਖਤਰਨਾਕ ਤੂਫਾਨ ਅਤੇ 3 ਤੋਂ 6 ਇੰਚ ਦੀ ਭਾਰੀ ਬਾਰਿਸ਼ ਲਿਆਏਗਾ, ਜਿਸ ਨਾਲ ਨੀਵੇਂ ਇਲਾਕਿਆਂ ਵਿੱਚ ਹੜ੍ਹ ਆਉਣ ਦਾ ਖ਼ਤਰਾ ਹੈ।