ਸੋਨਾ ਮਹਾਪਾਤਰਾ ਉਨ੍ਹਾਂ ਮਸ਼ਹੂਰ ਹਸਤੀਆਂ ’ਚੋਂ ਇਕ ਹੈ, ਜੋ ਹਮੇਸ਼ਾ ਆਪਣੀ ਰਾਏ ’ਤੇ ਕਾਇਮ ਰਹਿੰਦੀ ਹੈ। ਇਸ ਵਾਰ ਉਸ ਨੇ ਸ਼ਹਿਨਾਜ਼ ਗਿੱਲ ਬਾਰੇ ਸੋਸ਼ਲ ਮੀਡੀਆ ’ਤੇ ਆਪਣੀ ਰਾਏ ਜ਼ਾਹਿਰ ਕੀਤੀ। ਹਾਲ ਹੀ ’ਚ ਸ਼ਹਿਨਾਜ਼ ਗਿੱਲ ਇਕ ਇਵੈਂਟ ’ਚ ਪਹੁੰਚੀ, ਜਿਥੇ ਉਸ ਨੂੰ ਗਾਉਣ ਲਈ ਕਿਹਾ ਗਿਆ। ਇਸ ਦੌਰਾਨ ਸ਼ਹਿਨਾਜ਼ ਨੇ ਅਜ਼ਾਨ ਦੀ ਆਵਾਜ਼ ਸੁਣੀ ਤੇ ਉਹ ਚੁੱਪ ਹੋ ਗਈ। ਲੋਕਾਂ ਨੇ ਸ਼ਹਿਨਾਜ਼ ਦੇ ਇਸ ਕਦਮ ਦੀ ਤਾਰੀਫ਼ ਕੀਤੀ। ਇਸ ਤੋਂ ਬਾਅਦ ਸੋਨਾ ਮਹਾਪਾਤਰਾ ਨੂੰ ਉਹ ਦਿਨ ਯਾਦ ਆਇਆ, ਜਦੋਂ ਸ਼ਹਿਨਾਜ਼ ਗਿੱਲ ਨੇ ‘ਬਿੱਗ ਬੌਸ 16’ ’ਚ ਪਹੁੰਚੇ ਸਾਜਿਦ ਖ਼ਾਨ ਨੂੰ ਸੁਪੋਰਟ ਕੀਤਾ ਸੀ। ਸੋਨਾ ਮਹਾਪਾਤਰਾ ਲਿਖਦੀ ਹੈ ਕਿ ਰਾਸ਼ਟਰੀ ਟੀ. ਵੀ. ’ਤੇ ਜਿਣਸੀ ਸ਼ੋਸ਼ਣ ਦਾ ਇਕ ਦੋਸ਼ੀ ਦਿਖਾਇਆ ਗਿਆ ਸੀ। ਕਾਸ਼ ਉਹ ਆਪਣੀਆਂ ਭੈਣਾਂ ਦਾ ਕੁਝ ਸਤਿਕਾਰ ਕਰੇ। ਸੋਨਾ ਮਹਾਪਾਤਰਾ ਦੇ ਇਸ ਟਵੀਟ ਤੋਂ ਬਾਅਦ ਉਹ ਇੰਟਰਨੈੱਟ ’ਤੇ ਟਰੋਲ ਹੋਣ ਲੱਗੀ।
ਹੁਣ ਟ੍ਰੋਲਰਾਂ ਨੂੰ ਜਵਾਬ ਦਿੰਦੇ ਹੋਏ ਅਦਾਕਾਰਾ ਨੇ ਸ਼ਹਿਨਾਜ਼ ਦੇ ਟੈਲੇਂਟ ‘ਤੇ ਸਵਾਲ ਖੜ੍ਹੇ ਕੀਤੇ ਹਨ। ਸੋਨਾ ਦਾ ਇਹ ਟਵੀਟ ਕਾਫੀ ਵਾਇਰਲ ਹੋ ਰਿਹਾ ਹੈ। ਆਪਣੇ ਤਾਜ਼ਾ ਟਵੀਟ ‘ਚ ਸੋਨਾ ਨੇ ਸ਼ਹਿਨਾਜ਼ ਗਿੱਲ ਲਈ ਲਿਖਿਆ, “ਜੈਕਲੀਨ ਵਰਗੀ ਇੱਕ ਹੋਰ ਸਟਾਰਲੇਟ ਲਈ ਖੜ੍ਹੇ ਹੋਣ ਵਾਲੇ ਪਿਆਰੇ ਟ੍ਰੋਲਸ, ਮੈਨੂੰ ਨਹੀਂ ਪਤਾ ਕਿ ਸ਼ਹਿਨਾਜ਼ ਦਾ ਖ਼ਾਸ ਟੈਲੇਂਟ ਕੀ ਹੈ? ਉਸ ਨੂੰ ਹੁਣੇ-ਹੁਣੇ ਇੱਕ ਲੋਅ-ਬ੍ਰੋ ਰਿਐਲਿਟੀ ਟੀਵੀ ਸ਼ੋਅ ਤੋਂ ਪ੍ਰਸਿੱਧੀ ਮਿਲੀ ਹੈ। ਮੈਂ ਅਜਿਹੀਆਂ ਔਰਤਾਂ ਦੇ ਤਰੀਕਿਆਂ ਨੂੰ ਜਾਣਦੀ ਹਾਂ ਜੋ ਰੋਲ ਜਾਂ ਪੈਸਾ ਹਾਸਲ ਕਰਨ ਲਈ ਸ਼ਾਰਟਕੱਟ ਲੈਂਦੀਆਂ ਹਨ।” ਦੱਸ ਦੇਈਏ ਕਿ ਸਾਜਿਦ ਖ਼ਾਨ ‘ਤੇ ਸਾਲ 2018 ‘ਚ ਮੀਟੂ ਦਾ ਦੋਸ਼ ਲੱਗਾ ਸੀ। ਇਸ ਕਾਰਨ ਉਨ੍ਹਾਂ ਨੂੰ ਇਕ ਸਾਲ ਲਈ ਫ਼ਿਲਮ ਇੰਡਸਟਰੀ ਤੋਂ ਵੀ ਬਰਖ਼ਾਸਤ ਕਰ ਦਿੱਤਾ ਗਿਆ ਸੀ। ਸਾਜਿਦ ਨੇ ‘ਬਿੱਗ ਬੌਸ 16’ ਨਾਲ ਗਲੈਮਰ ਦੀ ਦੁਨੀਆ ‘ਚ ਵਾਪਸੀ ਕੀਤੀ ਸੀ। ਉਸ ਸਮੇਂ ਇੱਕ ਪਾਸੇ ਸਾਜਿਦ ਦੇ ਖ਼ਿਲਾਫ਼ ਮੋਰਚਾ ਸੀ ਅਤੇ ਸ਼ਹਿਨਾਜ਼ ਨੇ ਉਸ ਦਾ ਸਾਥ ਦਿੱਤਾ ਸੀ। ਉਦੋਂ ਤੋਂ ਸੋਨਾ ਅਕਸਰ ਟਵਿੱਟਰ ‘ਤੇ ਉਸ ‘ਤੇ ਹਮਲਾ ਕਰਦੀ ਨਜ਼ਰ ਆਉਂਦੀ ਹੈ।
