ਨੈਸ਼ਨਲ ਇਨਵੈਸਟੀਗੇਸ਼ਨ ਏਜੰਸੀ (ਐਨਆਈਏ) ਦੀ ਚੰਡੀਗੜ੍ਹ ਸ਼ਾਖਾ ਦਫ਼ਤਰ ਨੇ ਇੱਕ ਸਰਕੂਲਰ ਜਾਰੀ ਕਰਦਿਆਂ ਕਿਹਾ ਹੈ ਕਿ ਸੇਵਾਮੁਕਤ ਪੁਲਿਸ ਅਧਿਕਾਰੀ ਐਨਆਈਏ ਵਿੱਚ ਜਾਂਚ ਮਾਹਿਰ (ਸਲਾਹਕਾਰ) ਵਜੋਂ ਕੰਮ ਕਰ ਸਕਦੇ ਹਨ। ਪੁਲਿਸ ਅਧਿਕਾਰੀਆਂ ਤੋਂ ਇਲਾਵਾ ਕੇਂਦਰ ਅਤੇ ਰਾਜ ਸਰਕਾਰਾਂ ਦੇ ਸੇਵਾਮੁਕਤ ਅਧਿਕਾਰੀਆਂ ਨੂੰ ਵਾਕ-ਇਨ-ਇੰਟਰਵਿਊ ਲਈ ਬੁਲਾਇਆ ਗਿਆ ਹੈ।
ਦੱਸ ਦਈਏ ਕਿ ਏਜੰਸੀ ਕੋਲ ਇਨਵੈਸਟੀਗੇਸ਼ਨ ਸਪੈਸ਼ਲਿਸਟ (ਸਲਾਹਕਾਰ) ਦੀਆਂ ਤਿੰਨ ਅਸਾਮੀਆਂ ਹਨ, ਪੋਸਟਿੰਗ ਸਿਰਫ ਚੰਡੀਗੜ੍ਹ ਵਿੱਚ ਹੋਵੇਗੀ। ਇੰਸਪੈਕਟਰ, ਡੀਐਸਪੀ, ਐਸਪੀ ਅਤੇ ਕੇਂਦਰੀ ਪੁਲਿਸ ਸੰਸਥਾਵਾਂ ਵਿੱਚ ਇਸੇ ਰੈਂਕ ਦੇ ਸੇਵਾਮੁਕਤ ਅਧਿਕਾਰੀ ਇਨ੍ਹਾਂ ਅਸਾਮੀਆਂ ਲਈ ਅਪਲਾਈ ਕਰ ਸਕਦੇ ਹਨ। ਸੀਬੀਆਈ, ਐਨਸੀਬੀ, ਆਈਬੀ, ਕੈਬਨਿਟ ਸਕੱਤਰੇਤ, ਐਨਟੀਆਰਓ, ਕਸਟਮ, ਇਨਕਮ ਟੈਕਸ, ਡੀਆਰਆਈ ਤੋਂ ਸੇਵਾਮੁਕਤ ਅਧਿਕਾਰੀ ਵੀ ਅਪਲਾਈ ਕਰ ਸਕਦੇ ਹਨ।
ਇਸ ਅਸਾਮੀ ਲਈ ਬਿਨੈਕਾਰ ਦੀ ਉਮਰ 65 ਸਾਲ ਤੋਂ ਘੱਟ ਹੋਣੀ ਚਾਹੀਦੀ ਹੈ। ਇਸ ਦੇ ਨਾਲ ਹੀ ਬਿਨੈਕਾਰ ਕੋਲ ਅਪਰਾਧਿਕ ਮਾਮਲਿਆਂ, ਖੁਫੀਆ ਜਾਂ ਦਹਿਸ਼ਤ ਨਾਲ ਨਜਿੱਠਣ ਲਈ ਘੱਟੋ-ਘੱਟ 10 ਸਾਲ ਦਾ ਤਜਰਬਾ ਹੋਣਾ ਚਾਹੀਦਾ ਹੈ। ਬਿਨੈਕਾਰ ਵਾਕ-ਇਨ-ਇੰਟਰਵਿਊ ਲਈ 22 ਅਤੇ 23 ਮਈ ਨੂੰ ਸਵੇਰੇ 11.00 ਵਜੇ ਬੁੜੈਲ ਜੇਲ੍ਹ, ਸੈਕਟਰ 51 ਸਥਿਤ ਐਨਆਈਏ ਦੇ ਦਫ਼ਤਰ ਵਿੱਚ ਦਸਤਾਵੇਜ਼ਾਂ ਸਮੇਤ ਪਹੁੰਚ ਸਕਦੇ ਹਨ।