ਐੱਸ.ਏ.ਐੱਸ ਨਗਰ (ਬਲਜੀਤ ਮਰਵਾਹਾ): ਫੀਲਡ ਡਾਇਰੈਕਟਰ, ਕਲਪਨਾ ਕੇ., ਆਈ.ਐਫ.ਐਸ. ਨੇ ਦੱਸਿਆ ਕਿ ਹਾਲ ਹੀ ਵਿੱਚ ਪੈਦਾ ਹੋਏ ਮਾਦਾ ਟਾਈਗਰ ਗੌਰੀ ਦੇ ਬੱਚੇ ਨੂੰ ਮਾਂ ਸਮੇਤ ਸੀ.ਸੀ.ਟੀ.ਵੀ. ਨਿਗਰਾਨੀ ਅਧੀਨ ਰੱਖਿਆ ਗਿਆ ਸੀ। 9 ਅਗਸਤ 2023 ਦੀ ਸਵੇਰ 10 ਵਜੇ ਤੱਕ ਮਾਂ ਅਤੇ ਬੱਚਾ ਸਾਧਾਰਨ ਵਿਵਹਾਰ ਕਰ ਰਹੇ ਸਨ ਅਤੇ ਇਸ ਸਮੇਂ ਬੱਚੇ ਨੂੰ ਚੁਸਤੀ ਨਾਲ ਆਪਣੀ ਮਾਂ ਦਾ ਦੁੱਧ ਚੁੰਘਦੇ ਦੇਖਿਆ ਜਾ ਰਿਹਾ ਸੀ। ਹੌਲੀ ਹੌਲੀ ਬੱਚਾ ਪਹਿਲਾਂ ਨਾਲੋਂ ਘੱਟ ਗਤੀਵਿਧੀ ਪ੍ਰਦਰਸ਼ਿਤ ਕਰਨ ਲਗਿਆ। ਮਾਂ ਆਪਣੇ ਬੱਚੇ ਨੂੰ ਐਕਟਿਵ ਕਰਨ ਲਈ ਵਾਰ-ਵਾਰ ਯਤਨ ਕਰ ਰਹੀ ਸੀ ਪਰ ਇਸਦੇ ਬਾਵਜੂਦ, ਉਹ ਦੁੱਧ ਚੁੰਘਾਉਣ ਦੇ ਅਯੋਗ ਸੀ। ਸ਼ਾਮ ਨੂੰ ਬੱਚੇ ਨੂੰ ਵੈਟਰਨਰੀ ਵਿੰਗ ਦੁਆਰਾ ਨਿਰਧਾਰਿਤ ਪ੍ਰੋਟੋਕੋਲ ਅਨੁਸਾਰ ਨਿਓ ਨੇਟਲ ਯੂਨਿਟ ਸੈੱਟਅੱਪ ਵਿੱਚ ਸ਼ਿਫਟ ਕਰ ਦਿੱਤਾ ਗਿਆ। ਫਿਜੀਓਲੋਜੀਕਲ ਪੈਰਾਮੀਟਰ ਦੀ ਲਗਾਤਾਰ ਨਜ਼ਦੀਕੀ ਨਿਗਰਾਨੀ ਦੇ ਬਾਵਜੂਦ ਰਾਤ 10 ਵਜੇ ਦੇ ਕਰੀਬ ਬੱਚੇ ਨੇ ਆਖਰੀ ਸਾਹ ਲਿਆ।
ਟਾਈਗਰ ਗੌਰੀ ਦੇ ਬੱਚੇ ਦੇ ਮਰ ਜਾਣ ਕਾਰਨ ਚਿੜੀਆਘਰ ਪ੍ਰਸ਼ਾਸਨ ਸਦਮੇਂ ਵਿੱਚ ਹੈ। ਨਵੀਂ ਜੋੜੀ ਅਰਜੁਨ ਅਤੇ ਗੌਰੀ ਦੇ ਪ੍ਰਜਨਨ ਲਈ ਪਿਛਲੇ ਚਾਰ ਮਹੀਨਿਆਂ ਤੋਂ ਚਿੜੀਆਘਰ ਪ੍ਰਸ਼ਾਸਨ ਦੁਆਰਾ ਕੀਤੇ ਗਏ ਸਖਤ ਯਤਨਾਂ ਅਤੇ ਸਖਤ ਮਿਹਨਤ ਤੋਂ ਬਾਅਦ ਇਹ ਬੱਚੇ ਪੈਦਾ ਹੋਏ ਸਨ। ਫੀਲਡ ਡਾਇਰੈਕਟਰ ਨੇ ਇਹ ਵੀ ਦੱਸਿਆ ਕਿ ਸ਼ਾਵਕਾਂ ਦੀ ਮੌਤ ਦੇ ਕਾਰਨਾਂ ਦੀ ਵਿਸਤ੍ਰਿਤ ਜਾਂਚ ਨੂੰ ਯਕੀਨੀ ਬਣਾਉਣ ਲਈ ਮ੍ਰਿਤਕ ਬੱਚੇ ਅਤੇ ਵਿਸਰਾ ਦੇ ਨਮੂਨੇ ਪੋਸਟਮਾਰਟਮ ਅਤੇ ਹੋਰ ਹਿਸਟੋ-ਪੈਥੋਲੋਜੀਕਲ ਜਾਂਚ ਲਈ ਆਈ.ਵੀ.ਆਰ.ਆਈ ਬਰੇਲੀ ਅਤੇ ਗੁਰੂ ਅੰਗਦ ਦੇਵ ਵੈਟਰਨਰੀ ਤੇ ਐਨੀਮਲ ਸਾਇੰਸਜ਼ ਯੂਨਵਰਸਿਟੀ, ਲੁਧਿਆਣਾ ਨੂੰ ਭੇਜੇ ਗਏ ਹਨ।
