ਭਾਰਤ ਅਤੇ ਪਾਕਿਸਤਾਨ ਦੀਆਂ ਟੀਮਾਂ ਲਗਭਗ ਇੱਕ ਸਾਲ ਬਾਅਦ ਆਹਮੋ-ਸਾਹਮਣੇ ਹੋਣ ਜਾ ਰਹੀਆਂ ਹਨ। ਦੋਵੇਂ ਟੀਮਾਂ ਆਗਾਮੀ ਏਸ਼ੀਆ ਕੱਪ ‘ਚ ਭਿੜਨਗੀਆਂ। ਦੁਨੀਆ ਭਰ ਦੇ ਕ੍ਰਿਕਟ ਪ੍ਰਸ਼ੰਸਕ ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਹੋਣ ਵਾਲੇ ਮੈਚ ਦਾ ਇੰਤਜ਼ਾਰ ਕਰ ਰਹੇ ਹਨ। ਇਸ ਵਾਰ ਦਿੱਗਜ ਅਭਿਨੇਤਾ ਸੰਨੀ ਦਿਓਲ ਟੀਵੀ ‘ਤੇ ਮਹਾਮੁਕਾਬਲੇ ਦੌਰਾਨ ਨਜ਼ਰ ਆਉਣ ਵਾਲੇ ਹਨ।
ਆਪਣੀ ਹਾਲੀਆ ਫਿਲਮ ਗਦਰ-2 ਨਾਲ ਸੁਰਖੀਆਂ ਬਟੋਰਨ ਵਾਲੇ ਸੰਨੀ ਦਿਓਲ ਏਸ਼ੀਆ ਕੱਪ ਦੇ ਬ੍ਰਾਡਕਾਸਟਰ ਸਟਾਰ ਸਪੋਰਟਸ ‘ਤੇ ਨਜ਼ਰ ਆਉਣਗੇ। ਸਟਾਰ ਸਪੋਰਟਸ ਨੇ ਇੱਕ ਪ੍ਰੋਮੋ ਜਾਰੀ ਕੀਤਾ ਹੈ, ਜਿਸ ਵਿੱਚ ਉਸ ਨੇ ਕਿਹਾ ਕਿ ਉਹ ਮੈਚ ਦੌਰਾਨ ਤਾਰਾ ਸਿੰਘ ਬਣ ਕੇ ਆਉਣਗੇ। ਦੱਸ ਦਈਏ ਕਿ ਸੰਨੀ ਦਿਓਲ ਨੇ ਆਪਣੀ ਫਿਲਮ ਗਦਰ-ਏਕ ਪ੍ਰੇਮ ਕਥਾ ਅਤੇ ਗਦਰ-2 ਵਿੱਚ ਤਾਰਾ ਸਿੰਘ ਦੀ ਭੂਮਿਕਾ ਨਿਭਾਈ ਹੈ। ਅਭਿਨੇਤਾ ਨੇ ਵੀਡੀਓ ‘ਚ ਕਿਹਾ, “ਏਸ਼ੀਆ ਕੱਪ ‘ਚ ਭਾਰਤ-ਪਾਕਿਸਤਾਨ ਮੈਚ ਤੋਂ ਪਹਿਲਾਂ ਮੈਂ ਸੰਨੀ ਦਿਓਲ ਹੀ ਰਹਾਂਗਾ, ਪਰ ਇਹ ਜ਼ਬਰਦਸਤ ਮੁਕਾਬਲਾ ਸ਼ੁਰੂ ਹੁੰਦੇ ਹੀ ਮੈਂ ਤਾਰਾ ਸਿੰਘ ਬਣ ਜਾਵਾਂਗਾ।”
ਸੰਨੀ ਦਿਓਲ ਨੇ ਅੱਗੇ ਕਿਹਾ, “ਜੇਕਰ ਤੁਸੀਂ ਇਸ ਮੈਚ ਵਿੱਚ ਗਦਰ ਮਚਾਉਣਾ ਚਾਹੁੰਦੇ ਹੋ, ਤਾਂ ਟੀਮ ਇੰਡੀਆ ਲਈ ਹੱਥ ਖੜ੍ਹੇ ਕਰੋ।” ਮੈਨ ਇਨ ਬਲੂ ਦਾ ਉਤਸ਼ਾਹ ਵਧਾਓ।” ਪ੍ਰੋਮੋ ਵਿੱਚ ਭਾਰਤ-ਪਾਕਿਸਤਾਨ ਮੈਚ ਦੀਆਂ ਪੁਰਾਣੀਆਂ ਕਲਿੱਪ ਦਿਖਾਈ ਦੇ ਰਹੀਆਂ ਹਨ। ਕਪਤਾਨ ਰੋਹਿਤ ਸ਼ਰਮਾ ਅਤੇ ਅਨੁਭਵੀ ਬੱਲੇਬਾਜ਼ ਵਿਰਾਟ ਕੋਹਲੀ ਬੱਲੇਬਾਜ਼ੀ ਕਰਦੇ ਹੋਏ ਨਜ਼ਰ ਆ ਰਹੇ ਹਨ। ਆਲਰਾਊਂਡਰ ਹਾਰਦਿਕ ਪੰਡਯਾ ਅਤੇ ਰਵਿੰਦਰ ਜਡੇਜਾ ਪਾਕਿਸਤਾਨੀ ਖਿਡਾਰੀਆਂ ਨਾਲ ਗੱਲਬਾਤ ਕਰਦੇ ਨਜ਼ਰ ਆ ਰਹੇ ਹਨ।