ਮੋਹਾਲੀ ਦੇ ਖਰੜ ਸਥਿਤ ਇੱਕ ਨਿੱਜੀ ਯੂਨੀਵਰਸਿਟੀ ਦੀ ਪਾਰਕਿੰਗ ਵਿੱਚ ਖੜੀ ਕਾਰ ਵਿੱਚੋਂ ਪਰਸ ਅਤੇ ਹੋਰ ਕੀਮਤੀ ਸਮਾਨ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਚੋਰਾਂ ਨੇ ਪਰਸ ਵਿੱਚ ਰੱਖੇ ਡੈਬਿਟ ਕਾਰਡ ਦਾ ਪਾਸਵਰਡ ਜਾਣੇ ਬਿਨਾਂ ਖਾਤੇ ਵਿੱਚੋਂ 46,600 ਰੁਪਏ ਵੀ ਕੱਢਵਾ ਲਏ। ਇਸ ਸਬੰਧੀ ਥਾਣਾ ਸਦਰ ਖਰੜ ਦੀ ਪੁਲੀਸ ਨੇ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਪੀੜਤ ਅਮਨਦੀਪ ਵਾਸੀ ਪਿੰਡ ਨੂਰਪੁਰਬੇਦੀ ਜ਼ਿਲ੍ਹਾ ਰੋਪੜ ਨੇ ਦੱਸਿਆ ਕਿ ਉਹ 6 ਸਤੰਬਰ ਨੂੰ ਪੰਜਾਬ ਪੁਲੀਸ ਵਿੱਚ ਕਾਂਸਟੇਬਲ ਦੀ ਭਰਤੀ ਦੀ ਪ੍ਰੀਖਿਆ ਦੇਣ ਲਈ ਆਇਆ ਸੀ। ਪ੍ਰੀਖਿਆ ਕੇਂਦਰ ਵਿੱਚ ਮੋਬਾਈਲ ਅਤੇ ਪਰਸ ਲੈ ਕੇ ਜਾਣ ਦੀ ਇਜਾਜ਼ਤ ਨਹੀਂ ਸੀ। ਇਸ ਲਈ ਉਹ ਆਪਣਾ ਸਾਮਾਨ ਕਾਰ ਵਿੱਚ ਰੱਖ ਕੇ ਪ੍ਰੀਖਿਆ ਦੇਣ ਲਈ ਚਲਾ ਗਿਆ। ਪੀੜਤ ਅਮਨਦੀਪ ਨੇ ਦੱਸਿਆ ਕਿ ਇਹ ਬਹੁਤ ਹੀ ਤੇਜ਼ ਚੋਰ ਸਨ। ਉਹਨਾਂ ਨੇ ਕਾਰ ਦਾ ਕੋਈ ਵੀ ਸ਼ੀਸ਼ਾ ਨਹੀਂ ਤੋੜਿਆ ਸਗੋਂ ਡਰਾਈਵਰ ਸਾਈਡ ਦੇ ਸ਼ੀਸ਼ੇ ਦੀ ਰਬੜ ਕੱਢ ਕੇ ਕਾਰ ਦਾ ਤਾਲਾ ਖੋਲ੍ਹਿਆ। ਸਾਮਾਨ ਚੋਰੀ ਕਰਨ ਬਾਅਦ ਦੁਬਾਰਾ ਲੌਕ ਲਗਾ ਦਿੱਤਾ ਗਿਆ। ਚੋਰਾਂ ਨੇ ਪੀੜਤ ਦਾ ਪਰਸ ਅਤੇ ਮੋਬਾਈਲ ਫੋਨ ਚੋਰੀ ਕਰ ਲਿਆ ਸੀ। ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਪਹਿਲਾਂ 10,000 ਰੁਪਏ, ਫਿਰ 20,000 ਰੁਪਏ ਅਤੇ ਫਿਰ ਤੋਂ 10,000 ਰੁਪਏ ਏ.ਟੀ.ਐਮ ਕਾਰਡ ਤੋਂ ਕਢਵਾ ਲਏ। ਜਦੋਂ ਏ.ਟੀ.ਐਮ ਕਾਰਡ ਦੀ 40 ਹਜ਼ਾਰ ਦੀ ਲਿਮਟ ਪੂਰੀ ਹੋ ਗਈ ਤਾਂ ਇਕ ਦੁਕਾਨ ‘ਤੇ 6200 ਦੀ ਖਰੀਦਦਾਰੀ ਕੀਤੀ | ਉਸ ਤੋਂ ਬਾਅਦ 400 ਰੁਪਏ ਦੀ ਹੋਰ ਖਰੀਦ ਕੀਤੀ।