ਨਵੀਂ ਦਿੱਲੀ: ਦਿੱਲੀ ‘ਚ ਸ਼ਰਾਬ ਪੀਣ ਵਾਲਿਆਂ ਲਈ ਵੱਡੀ ਖਬਰ ਹੈ। ਦਿੱਲੀ ਸਰਕਾਰ ਨੇ ਆਪਣੀ ਨਵੀਂ ਆਬਕਾਰੀ ਨੀਤੀ ਦੇ ਤਹਿਤ, ਪਿਛਲੇ ਸਾਲ 21 ਦਿਨਾਂ ਤੋਂ ਸ਼ਰਾਬ ‘ਤੇ ਪਾਬੰਦੀ ਵਾਲੇ ਦਿਨਾਂ ਦੀ ਗਿਣਤੀ ਘਟਾ ਕੇ ਸਿਰਫ਼ ਤਿੰਨ ਕਰ ਦਿੱਤੀ ਹੈ। ਇਹ ਜਾਣਕਾਰੀ ਸੋਮਵਾਰ ਨੂੰ ਜਾਰੀ ਇਕ ਅਧਿਕਾਰਤ ਆਦੇਸ਼ ਤੋਂ ਆਈ ਹੈ। ਇਸ ਸਬੰਧੀ ਨਵਾਂ ਨਿਯਮ ਲਾਗੂ ਕੀਤਾ ਗਿਆ ਹੈ। ਜਾਰੀ ਹੁਕਮਾਂ ਵਿੱਚ ਕਿਹਾ ਗਿਆ ਹੈ ਕਿ ਗਣਤੰਤਰ ਦਿਵਸ (26 ਜਨਵਰੀ), ਸੁਤੰਤਰਤਾ ਦਿਵਸ (15 ਅਗਸਤ) ਅਤੇ 2 ਅਕਤੂਬਰ ਨੂੰ ਗਾਂਧੀ ਜੈਅੰਤੀ ਮੌਕੇ ਲਾਇਸੈਂਸਸ਼ੁਦਾ ਸ਼ਰਾਬ ਅਤੇ ਅਫੀਮ ਦੀਆਂ ਦੁਕਾਨਾਂ ਬੰਦ ਰਹਿਣਗੀਆਂ।
ਨਾਲ ਹੀ, ਆਬਕਾਰੀ ਵਿਭਾਗ ਨੇ ਕਿਹਾ ਕਿ ਡਰਾਈ-ਡੇ ਦੌਰਾਨ, ਐਲ-15 ਲਾਇਸੈਂਸ ਵਾਲੇ ਹੋਟਲ ਸੰਚਾਲਕ ਆਪਣੇ ਕਮਰਿਆਂ ਵਿੱਚ ਮਹਿਮਾਨਾਂ ਨੂੰ ਸ਼ਰਾਬ ਪਰੋਸ ਸਕਣਗੇ। ਹਾਲਾਂਕਿ ਹੁਕਮਾਂ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਇਨ੍ਹਾਂ ਤਿੰਨ ਡਰਾਈ ਡੇਅਜ਼ ਤੋਂ ਇਲਾਵਾ ਸਰਕਾਰ ਸਾਲ ਵਿੱਚ ਕਿਸੇ ਵੀ ਦਿਨ ਨੂੰ ਸਮੇਂ-ਸਮੇਂ ‘ਤੇ ‘ਡਰਾਈ-ਡੇਅ’ ਐਲਾਨ ਸਕਦੀ ਹੈ। ਪਿਛਲੇ ਸਾਲ ਤਕ ਹੋਲੀ, ਦੀਵਾਲੀ, ਜਨਮ ਅਸ਼ਟਮੀ, ਮੁਹੱਰਮ, ਈਦ-ਉਲ-ਜ਼ੂਹਾ (ਬਕਰੀਦ), ਗੁੱਡ ਫਰਾਈਡੇ, ਰਾਮ ਨੌਮੀ, ਮਹਾਵੀਰ ਜੈਅੰਤੀ, ਬੁੱਧ ਪੂਰਨਿਮਾ, ਮਹਾਰਿਸ਼ੀ ਵਾਲਮੀਕਿ ਜੈਅੰਤੀ, ਗੁਰੂ ਨਾਨਕ ਜੈਅੰਤੀ, ਦੁਸਹਿਰਾ ਤੇ ਹੋਰ ਤਿਉਹਾਰ ਵਾਲੇ ਦਿਨ ਖੁਸ਼ਕ ਦਿਨ ਰਹਿੰਦਾ ਸੀ।
