ਅਮਰੀਕੀ ਤਕਨੀਕੀ ਕੰਪਨੀ ਮੇਟਾ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ਵਟਸਐਪ ਦੇ ਇੱਕ ਮੁਫਤ ਫੀਚਰ ਨੂੰ ਖਤਮ ਕਰਨ ਵਾਲੀ ਹੈ। ਦੱਸ ਦਈਏ ਕਿ ਹੁਣ ਤਕ ਕਰੋੜਾਂ WhatsApp ਉਪਭੋਗਤਾ ਬੈਕਅੱਪ ਲਈ ਗੂਗਲ ਡਰਾਈਵ ਸਟੋਰੇਜ ਦੀ ਵਰਤੋਂ ਕਰ ਰਹੇ ਹਨ ਅਤੇ ਇਸ ਲਈ ਕੋਈ ਪੈਸਾ ਨਹੀਂ ਦੇਣਾ ਪੈ ਰਿਹਾ। ਹਾਲਾਂਕਿ, ਬਹੁਤ ਜਲਦੀ ਤੁਹਾਨੂੰ ਕਲਾਉਡ ਸਟੋਰੇਜ ਲਈ ਜੇਬ ਢਿੱਲੀ ਕਰਨੀ ਪਵੇਗੀ। ਗੂਗਲ ਵਟਸਐਪ ਦੇ ਬੈਕਅੱਪ ਨੂੰ ਲੈ ਕੇ ਆਪਣੀ ਨੀਤੀ ‘ਚ ਬਦਲਾਅ ਕਰ ਰਿਹਾ ਹੈ। ਆਓ ਦੇਖੀਏ ਕਿ ਤੁਹਾਨੂੰ ਬੈਕਅੱਪ ਲਈ ਭੁਗਤਾਨ ਕਿਉਂ ਕਰਨਾ ਪਵੇਗਾ।
ਗੂਗਲ ਡਰਾਈਵ ‘ਤੇ 15GB ਕਲਾਉਡ ਸਟੋਰੇਜ ਮੁਫਤ ਉਪਲਬਧ ਹੈ। ਹੁਣ ਤੱਕ, WhatsApp ਬੈਕਅੱਪ ਲਈ ਵਰਤੀ ਜਾਂਦੀ Google ਡਰਾਈਵ ਸਟੋਰੇਜ ਨੂੰ 15GB ਸੀਮਾ ਵਿੱਚ ਨਹੀਂ ਗਿਣਿਆ ਜਾਂਦਾ ਸੀ। ਗੂਗਲ ਨੇ ਪਿਛਲੇ ਸਾਲ ਨਵੰਬਰ ‘ਚ ਨਵੇਂ ਬਦਲਾਅ ਦੇ ਸੰਕੇਤ ਦਿੱਤੇ ਸਨ। ਗੂਗਲ ਨੇ ਦੱਸਿਆ ਸੀ ਕਿ ਵਟਸਐਪ ਬੈਕਅਪ ਨੂੰ ਲੈ ਕੇ ਵੱਡਾ ਬਦਲਾਅ ਕਰਨ ਜਾ ਰਿਹਾ ਹੈ।
ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ ਗੂਗਲ ਨੇ ਲਿਖਿਆ ਸੀ ਕਿ ਇੱਕ ਵੱਡੇ ਬਦਲਾਅ ਦੇ ਤਹਿਤ, ਐਂਡਰਾਇਡ ‘ਤੇ WhatsApp ਬੈਕਅਪ ਨੂੰ ਗੂਗਲ ਖਾਤੇ ਦੀ ਕਲਾਉਡ ਸਟੋਰੇਜ ਲਿਮਿਟ ਵਿੱਚ ਗਿਣਿਆ ਜਾਵੇਗਾ। ਇਸ ਦਾ ਮਤਲਬ ਹੈ ਕਿ ਵਟਸਐਪ ਬੈਕਅੱਪ ਦਾ ਡਾਟਾ ਵੀ 15GB ਦੀ ਮੁਫਤ ਸੀਮਾ ‘ਚ ਸ਼ਾਮਲ ਹੋਵੇਗਾ। ਇਸ 15GB ਸਟੋਰੇਜ ‘ਚ ਯੂਜ਼ਰਸ ਦਾ Gmail, Google Photos, Drive ਦਾ ਡਾਟਾ ਵੀ ਸ਼ਾਮਲ ਹੈ। ਜੇਕਰ ਤੁਸੀਂ 15GB ਕਲਾਉਡ ਸਟੋਰੇਜ ਸੀਮਾ ਪੂਰੀ ਕਰ ਲਈ ਹੈ , ਤਾਂ ਤੁਹਾਨੂੰ ਹੋਰ ਸਟੋਰੇਜ ਲਈ ਭੁਗਤਾਨ ਕਰਨਾ ਪਵੇਗਾ। ਇਸਦੇ ਲਈ ਤੁਹਾਨੂੰ ਗੂਗਲ ਵਨ ਦੀ ਸਬਸਕ੍ਰਿਪਸ਼ਨ ਲੈਣੀ ਪਵੇਗੀ। ਇਹ Google ਦੀ ਅਦਾਇਗੀ ਗਾਹਕੀ (Paid Subscription) ਯੋਜਨਾ ਹੈ।