ਮਲੇਰਕੋਟਲਾ : – ਪੰਜਾਬ ਦੇ ਮਲੇਰਕੋਟਲਾ ਵਿੱਚ ਕਰੀਬ ਇੱਕ ਦਹਾਕੇ ਬਾਅਦ ਸੂਬੇ ਦੇ ਦੋ ਸਾਬਕਾ ਡੀਜੀਪੀਜ਼ ਦੀਆਂ ਪਤਨੀਆਂ ਚੋਣ ਦੰਗਲ ਵਿੱਚ ਆਹਮੋ-ਸਾਹਮਣੇ ਹੋ ਗਈਆਂ ਹਨ। ਕਾਂਗਰਸ ਦੇ ਸਾਬਕਾ ਡੀਜੀਪੀ ਮੁਹੰਮਦ ਮੁਸਤਫਾ ਦੀ ਪਤਨੀ ਰਜ਼ੀਆ ਸੁਲਤਾਨਾ (ਕੈਬਿਨੇਟ ਮੰਤਰੀ) ਚੋਣ ਮੈਦਾਨ ਵਿੱਚ ਹਨ। ਰਜ਼ੀਆ ਸੁਲਤਾਨਾ ਇਸ ਸੀਟ ਤੋਂ ਤਿੰਨ ਵਾਰ ਚੋਣਾਂ (2002, 2007 ਅਤੇ 2017) ਜਿੱਤ ਚੁਕੇ ਹਨ। ਉਨ੍ਹਾਂ ਦੇ ਸਾਹਮਣੇ ਕੈਪਟਨ ਅਮਰਿੰਦਰ ਸਿੰਘ ਨੇ ਪੰਜਾਬ ਲੋਕ ਕਾਂਗਰਸ ਦੀ ਉਮੀਦਵਾਰ ਫਰਜ਼ਾਨਾ ਆਲਮ ਨੂੰ ਮੈਦਾਨ ਵਿੱਚ ਉਤਾਰਿਆ ਹੈ। ਫਰਜ਼ਾਨਾ ਆਲਮ ਸਾਬਕਾ ਡੀਜੀਪੀ ਮੁਹੰਮਦ ਇਜ਼ਹਾਰ ਆਲਮ ਦੀ ਪਤਨੀ ਹਨ|
ਇਸ ਤੋਂ ਪਹਿਲਾਂ ਫਰਜ਼ਾਨਾ ਆਲਮ ਨੇ ਅਕਾਲੀ ਦਲ ਦੀ ਟਿਕਟ ‘ਤੇ 2012 ਦੀ ਵਿਸੇਸ਼ ਚੋਣ ਲੜੀ ਸੀ ਅਤੇ ਉਨ੍ਹਾਂ ਦੇ ਸਾਹਮਣੇ ਕਾਂਗਰਸ ਉਮੀਦਵਾਰ ਵਜੋਂ ਰਜ਼ੀਆ ਸੁਲਤਾਨਾ ਸੀ। ਫਿਰ ਫਰਜ਼ਾਨਾ ਆਲਮ ਨੇ 5200 ਵੋਟਾਂ ਦੇ ਫਰਕ ਨਾਲ ਜਿੱਤ ਦਰਜ ਕਰਕੇ ਨਾ ਸਿਰਫ ਰਜ਼ੀਆ ਸੁਲਤਾਨਾ ਦੇ ਜੇਤੂ ਰੱਥ ਨੂੰ ਰੋਕਿਆ, ਸਗੋਂ ਜਿੱਤ ਦੀ ਹੈਟ੍ਰਿਕ ਵੀ ਨਹੀਂ ਲੱਗਣ ਦਿੱਤੀ।
ਸਿਆਸੀ ਖੇਤਰ ਵਿੱਚ ਸਵਾਲ ਉਠਾਏ ਜਾ ਰਹੇ ਹਨ ਕਿ ਕੀ ਰਜ਼ੀਆ ਸੁਲਤਾਨਾ 2012 ਦੀ ਹਾਰ ਦੀ ਬਰਾਬਰੀ ਕਰ ਸਕੇਗੀ। ਕਾਂਗਰਸ ਤੋਂ ਇਲਾਵਾ ਕੈਪਟਨ, ਢੀਂਡਸਾ ਅਤੇ ਭਾਜਪਾ ਦੀ ਸਾਂਝੀ ਉਮੀਦਵਾਰ ਫਰਜ਼ਾਨਾ ਆਲਮ ਨੂੰ ਵੀ ਅਕਾਲੀ ਦਲ ਦੇ ਨੁਸਰਤ ਇਕਰਾਮ ਖਾਨ ਨਾਲ ਟੱਕਰ ਲੈਣੀ ਹੋਵੇਗੀ। ਆਮ ਆਦਮੀ ਪਾਰਟੀ ਵੀ ਜ਼ੋਰਦਾਰ ਹਾਜ਼ਰੀ ਲਗਾ ਰਹੀ ਹੈ। ਸੰਸਦੀ ਸਕੱਤਰ ਤੋਂ ਇਲਾਵਾ ਫਰਜ਼ਾਨਾ ਆਲਮ ਵਕਫ਼ ਬੋਰਡ ਦੀ ਚੇਅਰਪਰਸਨ ਰਹਿ ਚੁੱਕੀ ਹੈ। 2017 ‘ਚ ਫਰਜ਼ਾਨਾ ਨੇ ਚੋਣ ਲੜਨ ਤੋਂ ਇਨਕਾਰ ਕਰ ਦਿੱਤਾ ਸੀ।