ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਉੱਤਰੀ ਕੋਰੀਆ ਦੇ ਤਾਨਾਸ਼ਾਹ ਕਿਮ ਜੋਂਗ ਉਨ ਨੂੰ ਕਰੀਬ 4 ਕਰੋੜ ਰੁਪਏ ਦੀ ਲਗਜ਼ਰੀ ਕਾਰ ਗਿਫਟ ਕੀਤੀ ਹੈ। ‘ਬਲੂਮਬਰਗ’ ਦੀ ਰਿਪੋਰਟ ਮੁਤਾਬਕ ਕਿਮ ਦੀ ਭੈਣ ਕਿਮ ਯੋ ਜੋਂਗ ਅਤੇ ਇਕ ਉੱਚ ਅਧਿਕਾਰੀ ਨੇ ਸੋਮਵਾਰ ਨੂੰ ਇਹ ਤੋਹਫਾ ਪ੍ਰਾਪਤ ਕੀਤਾ ਹੈ। ਇਸ ਤੋਂ ਬਾਅਦ ਉਨ੍ਹਾਂ ਪੁਤਿਨ ਨੂੰ ਤਾਨਾਸ਼ਾਹ ਦਾ ਸੰਦੇਸ਼ ਵੀ ਦਿੱਤਾ।
ਪੁਤਿਨ ਦਾ ਕਿਮ ਨੂੰ ਇਹ ਤੋਹਫਾ ਸੰਯੁਕਤ ਰਾਸ਼ਟਰ ਦੇ ਨਿਯਮਾਂ ਦੇ ਖਿਲਾਫ ਹੈ। ਇਸ ਦਾ ਕਾਰਨ ਇਹ ਹੈ ਕਿ ਉੱਤਰੀ ਕੋਰੀਆ ਨੂੰ ਕਿਸੇ ਵੀ ਤਰ੍ਹਾਂ ਦੀਆਂ ਲਗਜ਼ਰੀ ਚੀਜ਼ਾਂ ਦੇਣ ‘ਤੇ ਪਾਬੰਦੀ ਹੈ। ਅਜਿਹਾ ਇਸ ‘ਤੇ ਲਗਾਈਆਂ ਗਈਆਂ ਪਾਬੰਦੀਆਂ ਕਾਰਨ ਹੋਇਆ ਹੈ। ਯੂਕਰੇਨ ‘ਤੇ ਹਮਲੇ ਤੋਂ ਬਾਅਦ ਰੂਸ ‘ਤੇ ਕਈ ਪਾਬੰਦੀਆਂ ਹਨ।
ਰਿਪੋਰਟ ਮੁਤਾਬਕ- ਪੁਤਿਨ ਅਤੇ ਕਿਮ ਦੇ ਬਹੁਤ ਚੰਗੇ ਸਬੰਧ ਹਨ। ਜਦੋਂ ਕਿਮ ਨੇ ਸਤੰਬਰ 2023 ਵਿੱਚ ਰੂਸ ਦਾ ਦੌਰਾ ਕੀਤਾ ਸੀ, ਤਾਂ ਉਹ ਪੁਤਿਨ ਦੀ ਸਰਕਾਰੀ ਕਾਰ ਦੀ ਪਿਛਲੀ ਸੀਟ ‘ਤੇ ਬੈਠੇ ਸਨ। ਹੁਣ ਇਹ ਮਾਡਲ ਕਿਮ ਨੂੰ ਗਿਫਟ ਕੀਤਾ ਗਿਆ ਹੈ।
ਰਿਪੋਰਟ ਵਿੱਚ ਸਪੱਸ਼ਟ ਤੌਰ ‘ਤੇ ਇਹ ਨਹੀਂ ਦੱਸਿਆ ਗਿਆ ਹੈ ਕਿ ਇਹ ਕਿਹੜੀ ਕਾਰ ਹੈ ਅਤੇ ਇਸਨੂੰ ਉੱਤਰੀ ਕੋਰੀਆ ਨੂੰ ਕਿਵੇਂ ਡਿਲੀਵਰ ਕੀਤਾ ਗਿਆ ਸੀ। ਪਰ, ਇਸ ਨੂੰ ਸੋਮਵਾਰ ਨੂੰ ਪਿਓਂਗਯਾਂਗ ਪਹੁੰਚਾਇਆ ਗਿਆ। ਕੋਰੀਆਈ ਨਿਊਜ਼ ਏਜੰਸੀ ਨੇ ਇਸ ਦੀ ਪੁਸ਼ਟੀ ਕੀਤੀ ਹੈ।
ਤੋਹਫ਼ਾ ਪ੍ਰਾਪਤ ਕਰਦੇ ਹੋਏ ਕਿਮ ਜੋਂਗ ਉਨ ਦੀ ਭੈਣ ਕਿਮ ਯੋ ਜੋਂਗ ਨੇ ਕਿਹਾ ਕਿ ਦੋਵਾਂ ਦੇਸ਼ਾਂ ਵਿਚਾਲੇ ਕਰੀਬੀ ਸਬੰਧ ਹਨ ਅਤੇ ਇਹ ਤੋਹਫ਼ਾ ਇਸ ਦਾ ਸਬੂਤ ਹੈ। ਪਿਛਲੇ ਸਾਲ ਸਾਡੇ ਨੇਤਾ ਮਾਸਕੋ ਗਏ ਸਨ ਅਤੇ ਰਾਸ਼ਟਰਪਤੀ ਪੁਤਿਨ ਨਾਲ ਇੱਕ ਸੰਮੇਲਨ ਵਿੱਚ ਹਿੱਸਾ ਲਿਆ ਸੀ। ਮੰਨਿਆ ਜਾ ਰਿਹਾ ਹੈ ਕਿ ਪੁਤਿਨ ਨੇ ਕਿਮ ਨੂੰ ਰੂਸ ਦੀ ਬਣੀ ਔਰਸ ਸੇਨੇਟ ਲਿਮੋਜ਼ਿਨ ਕਾਰ ਗਿਫਟ ਕੀਤੀ ਹੈ। ਪੁਤਿਨ ਖੁਦ ਵੀ ਇਸੇ ਕਾਰ ਦੀ ਵਰਤੋਂ ਕਰਦੇ ਹਨ।
ਉਂਝ ਕਿਮ ਕੋਲ ਇਲਯੂਸ਼ਿਨ ਆਈਐਲ-62 ਨਾਂ ਦਾ ਪ੍ਰਾਈਵੇਟ ਜਹਾਜ਼ ਹੈ। ਇਸਨੂੰ ਚਮਾਈ-1 ਦੇ ਨਾਮ ਨਾਲ ਵੀ ਜਾਣਿਆ ਜਾਂਦਾ ਹੈ, ਜੋ ਉੱਤਰੀ ਕੋਰੀਆ ਦੇ ਰਾਸ਼ਟਰੀ ਪੰਛੀ ਗੋਸ਼ਾਕ ਦੇ ਨਾਮ ਤੋਂ ਪ੍ਰੇਰਿਤ ਹੈ। ਕਿਮ ਇਸ ਜਹਾਜ਼ ਦੀ ਵਰਤੋਂ ਹਵਾਈ ਯਾਤਰਾ ਲਈ ਕਰਦੇ ਹਨ। ਇਸ ਏਅਰਕ੍ਰਾਫਟ ਦਾ ਇੰਟੀਰੀਅਰ ਕਾਫੀ ਹੱਦ ਤੱਕ ਅਮਰੀਕਾ ਦੀ ਏਅਰ ਫੋਰਸ 1 ਵਰਗਾ ਡਿਜ਼ਾਈਨ ਕੀਤਾ ਗਿਆ ਹੈ। ਹਾਲਾਂਕਿ ਸੁਰੱਖਿਆ ਦੇ ਮਾਮਲੇ ‘ਚ ਇਹ ਕਮਜ਼ੋਰ ਹੈ। ਜਹਾਜ਼ ਵਿੱਚ ਕਿਮ ਦੇ ਆਰਾਮ ਲਈ ਇੱਕ ਬੈੱਡਰੂਮ ਅਤੇ ਮੀਟਿੰਗਾਂ ਲਈ ਇੱਕ ਕਾਨਫਰੰਸ ਰੂਮ ਬਣਾਇਆ ਗਿਆ ਹੈ। ਮੈਡੀਕਲ ਟੀਮ ਅਤੇ ਸੁਰੱਖਿਆ ਏਜੰਟ ਹਮੇਸ਼ਾ ਮੌਜੂਦ ਹਨ।
