ਮਹਾਸ਼ਿਵਰਾਤਰੀ ਦੇ ਮੌਕੇ ‘ਤੇ ਆਯੁਸ਼ਮਾਨ ਖੁਰਾਨਾ ਨੇ ਸ਼ਿਵ ਕੈਲਾਸ਼ ਭਜਨ ਗਾਇਆ, ਜਿਸ ਨੂੰ ਸੁਣਨ ਲਈ ਉਨ੍ਹਾਂ ਦੇ ਪਿਤਾ ਇੰਤਜ਼ਾਰ ਕਰਦੇ ਸਨ। ਆਯੁਸ਼ਮਾਨ ਨੇ ਆਪਣੇ ਸੋਸ਼ਲ ਮੀਡੀਆ ‘ਤੇ ਇਸ ਖੂਬਸੂਰਤ ਭਜਨ ਨੂੰ ਅਪਲੋਡ ਕੀਤਾ ਹੈ।
ਉਨ੍ਹਾਂ ਨੇ ਕੈਪਸ਼ਨ ਲਿਖਿਆ ਕਿ “ਸਾਡੇ ਘਰ ‘ਚ ਮਹਾਸ਼ਿਵਰਾਤਰੀ ਹਮੇਸ਼ਾ ਖਾਸ ਤਰੀਕੇ ਨਾਲ ਮਨਾਈ ਜਾਂਦੀ ਸੀ। ਪਾਪਾ, ਮੰਮੀ, ਅਪਾਰਸ਼ਕਤੀ ਖੁਰਾਣਾ ਅਤੇ ਮੈਂ ਬਚਪਨ ਵਿੱਚ ਹਰ ਸਾਲ ਸੈਕਟਰ-6 ਪੰਚਕੂਲਾ ਦੇ ਮੰਦਰ ਵਿੱਚ ਜਾਂਦੇ ਸੀ। ਪਿਛਲੇ ਸਾਲ ਜਦੋਂ ਮੇਰੇ ਪਿਤਾ ਜੀ ਨੂੰ ਬਿਮਾਰੀ ਦਾ ਪਤਾ ਲੱਗਾ, ਉਦੋਂ ਵੀ ਉਨ੍ਹਾਂ ਨੇ ਇਕੱਲੇ ਮੰਦਰ ਜਾਣ ਦੀ ਹਿੰਮਤ ਕੀਤੀ ਸੀ। ਉਹ ਭਗਵਾਨ ਸ਼ਿਵ ਦੇ ਬਹੁਤ ਵੱਡੇ ਭਗਤ ਸੀ। ਉਨ੍ਹਾਂ ਤੋਂ ਬਿਨਾਂ ਇਹ ਸਾਡੀ ਪਹਿਲੀ ਸ਼ਿਵਰਾਤਰੀ ਹੈ। ਆਪਣੇ ਅੰਤਲੇ ਦਿਨਾਂ ਦੌਰਾਨ ਵੀ ਉਨ੍ਹਾਂ ਨੇ ਮੈਨੂੰ ਇਹ ਭਜਨ ਗਾਉਣ ਲਈ ਕਿਹਾ ਸੀ। ਜਦੋਂ ਵੀ ਪਿਤਾ ਜੀ ਇਹ ਭਜਨ ਸੁਣਦੇ ਸਨ ਤਾਂ ਉਹ ਕਹਿੰਦੇ ਸਨ ਕਿ ਬੇਟਾ, ਇਹ ਤੁਹਾਡੀ ਆਵਾਜ਼ ਵਿੱਚ ਬਹੁਤ ਵਧੀਆ ਲਗਦਾ ਹੈ।”
ਦੱਸ ਦਈਏ ਕਿ ਲੋਕਾਂ ਨੇ ਆਯੁਸ਼ਮਾਨ ਦੇ ਇਸ ਭਜਨ ਨੂੰ ਵੀ ਕਾਫੀ ਪਸੰਦ ਕੀਤਾ। ਜਿੱਥੇ ਇੱਕ ਯੂਜ਼ਰ ਨੇ ਲਿਖਿਆ- ਤੁਹਾਡੇ ਪਿਤਾ ਨੂੰ ਤੁਹਾਡੇ ‘ਤੇ ਬਹੁਤ ਮਾਣ ਹੋਵੇਗਾ। ਇੱਕ ਹੋਰ ਯੂਜ਼ਰ ਨੇ ਲਿਖਿਆ- ਤੁਹਾਡੀ ਆਵਾਜ਼ ਵਿੱਚ ਇਹ ਭਜਨ ਬਹੁਤ ਵਧੀਆ ਲੱਗ ਰਿਹਾ ਹੈ। ਮੈਨੂੰ ਉਮੀਦ ਹੈ ਕਿ ਤੁਹਾਡੇ ਪਿਤਾ ਜੀ ਜਿੱਥੇ ਵੀ ਹਨ, ਉਹ ਤੁਹਾਨੂੰ ਅਸ਼ੀਰਵਾਦ ਦੇ ਰਹੇ ਹੋਣਗੇ।’