ਇਸਲਾਮਿਕ ਕੱਟੜਪੰਥੀ ਨੇਤਾ ਅੰਜੇਮ ਚੌਧਰੀ ਨੂੰ ਬਰਤਾਨੀਆ ਵਿਚ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਵੂਲਵਿਚ ਕ੍ਰਾਊਨ ਕੋਰਟ ਨੇ ਪਿਛਲੇ ਹਫਤੇ ਅੰਜੇਮ ਚੌਧਰੀ ਨੂੰ ਨਫਰਤ ਭਰੇ ਭਾਸ਼ਣਾਂ ਰਾਹੀਂ ਲੋਕਾਂ ਨੂੰ ਭੜਕਾਉਣ ਅਤੇ ਅੱਤਵਾਦੀ ਸੰਗਠਨ ਅਲ-ਮੁਹਾਜੀਰੂਨ (ਏ.ਐੱਲ.ਐੱਮ.) ਨੂੰ ਚਲਾਉਣ ਦਾ ਦੋਸ਼ੀ ਪਾਇਆ ਸੀ।
ਬ੍ਰਿਟਿਸ਼ ਅਦਾਲਤ ਨੇ ਕਿਹਾ ਕਿ ਅੰਜੇਮ ਚੌਧਰੀ ਇਕ ਅੱਤਵਾਦੀ ਸੰਗਠਨ ਚਲਾਉਂਦਾ ਹੈ, ਜਿਸ ਦਾ ਉਦੇਸ਼ ਹਿੰਸਕ ਤਰੀਕਿਆਂ ਨਾਲ ਦੁਨੀਆ ਭਰ ਵਿਚ ਸ਼ਰੀਆ ਕਾਨੂੰਨ ਫੈਲਾਉਣਾ ਹੈ। ਅਲ-ਮੁਹਾਜੀਰੂਨ ‘ਤੇ ਬ੍ਰਿਟੇਨ ਵਿਚ ਇਕ ਦਹਾਕਾ ਪਹਿਲਾਂ ਪਾਬੰਦੀ ਲਗਾਈ ਗਈ ਸੀ। ਇਸ ਦੇ ਬਾਵਜੂਦ ਉਹ ਵੱਖ-ਵੱਖ ਨਾਵਾਂ ਨਾਲ ਇਸ ਸੰਸਥਾ ਨੂੰ ਚਲਾ ਰਿਹਾ ਸੀ।
ਬੀਬੀਸੀ ਦੀ ਰਿਪੋਰਟ ਮੁਤਾਬਕ ਅੰਜੇਮ ਨੂੰ 85 ਸਾਲ ਦੇ ਹੋਣ ਤੱਕ ਜੇਲ੍ਹ ਵਿੱਚ ਰਹਿਣਾ ਪਵੇਗਾ। ਇਸ ਦਾ ਮਤਲਬ ਹੈ ਕਿ 57 ਸਾਲਾ ਅੰਜੇਮ ਨੂੰ 28 ਸਾਲ ਦੀ ਕੈਦ ਦੀ ਸਜ਼ਾ ਕੱਟਣੀ ਪਵੇਗੀ।
ਅੰਜੇਮ ਚੌਧਰੀ ਆਪਣੇ ਸ਼ੁਰੂਆਤੀ ਦਿਨਾਂ ਤੋਂ ਹੀ ਅਲ-ਮੁਹਾਜੀਰੂਨ ਦੇ ਪ੍ਰਮੁੱਖ ਮੈਂਬਰਾਂ ਵਿੱਚੋਂ ਇੱਕ ਹੈ। ਸੰਗਠਨ ‘ਤੇ ਦਰਜਨਾਂ ਅੱਤਵਾਦੀ ਘਟਨਾਵਾਂ ਨੂੰ ਅੰਜਾਮ ਦੇਣ ਦਾ ਦੋਸ਼ ਹੈ। ਇਸ ਨਾਲ ਜੁੜੇ ਅੱਤਵਾਦੀਆਂ ਨੇ ਬ੍ਰਿਟੇਨ ਤੋਂ ਇਲਾਵਾ ਹੋਰ ਦੇਸ਼ਾਂ ‘ਚ ਵੀ ਅੱਤਵਾਦੀ ਘਟਨਾਵਾਂ ਨੂੰ ਅੰਜਾਮ ਦਿੱਤਾ ਸੀ।
ਅੰਜੇਮ ਚੌਧਰੀ 2014 ਵਿੱਚ ਅਲ-ਮੁਹਾਜਿਰੂਨ ਦਾ ਮੁਖੀ ਬਣਿਆ। ਦਰਅਸਲ ਇਸ ਸੰਗਠਨ ਦੇ ਮੁਖੀ ਉਮਰ ਬਕਰੀ ਮੁਹੰਮਦ ਨੂੰ ਲੇਬਨਾਨ ਦੀ ਜੇਲ ਭੇਜ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਅਦ ਉਸ ਨੇ ਸੰਗਠਨ ਦੀ ਕਮਾਨ ਸੰਭਾਲ ਲਈ ਸੀ।
ਅੰਜੇਮ ਨੂੰ ਸੀਰੀਆ ਵਿੱਚ ਇਸਲਾਮਿਕ ਸਟੇਟ ਦੇ ਲੜਾਕਿਆਂ ਦੀ ਮਦਦ ਕਰਨ ਲਈ 2016 ਵਿੱਚ ਅੱਤਵਾਦ ਦੇ ਦੋਸ਼ ਵਿੱਚ ਸਾਢੇ ਪੰਜ ਸਾਲ ਦੀ ਸਜ਼ਾ ਸੁਣਾਈ ਗਈ ਸੀ, ਪਰ ਅੱਧੀ ਸਜ਼ਾ ਕੱਟਣ ਤੋਂ ਬਾਅਦ 2018 ਵਿੱਚ ਰਿਹਾਅ ਕਰ ਦਿੱਤਾ ਗਿਆ ਸੀ। ਜੇਲ ਤੋਂ ਬਾਹਰ ਆਉਣ ਤੋਂ ਬਾਅਦ ਅੰਜੇਮ ਨੇ ਵਟਸਐਪ ਅਤੇ ਟੈਲੀਗ੍ਰਾਮ ‘ਤੇ ਆਪਣੇ ਫਾਲੋਅਰਸ ਨੂੰ ਸੰਬੋਧਨ ਕਰਨਾ ਸ਼ੁਰੂ ਕਰ ਦਿੱਤਾ।
