ਕੈਨੇਡਾ ਦੇ ਸਰੀ ‘ਚ ਬੇਅਦਬੀ ਦੀ ਘਟਨਾ ਵਾਪਰੀ ਹੈ ਜਿਸ ਮਗਰੋਂ ਸਿੱਖ ਭਾਈਚਾਰੇ ਵਿਚ ਭਾਰੀ ਰੋਸ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਸਰੀ ਸਥਿਤ ਗੁਰਦੁਆਰਾ ਸਿੰਘ ਸਭਾ 132ਵੀਂ ਸਟਰੀਟ ਤੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪਾਵਨ ਸਰੂਪ ਨੂੰ ਟੋਰਾਂਟੋ ਭੇਜਿਆ ਜਾ ਰਿਹਾ ਸੀ ਤੇ ਇਸ ਦੌਰਾਨ ਹੀ ਬੇਅਦਬੀ ਹੋਣ ਇਲਜ਼ਾਮ ਲੱਗੇ ਹਨ।
ਮਰਿਆਦਾ ਅਨੁਸਾਰ ਪਾਲਕੀ ਸਾਹਿਬ ਜਾਂ ਸਤਿਕਾਰਯੋਗ ਢੰਗ ਨਾਲ ਲਿਜਾਣ ਦੀ ਬਜਾਏ ਇਸ ਨੂੰ ਕਾਰ ਦੇ ਟਰੰਕ (ਡਿੱਗੀ) ਵਿਚ ਬੰਦ ਕੀਤਾ ਜਾ ਰਿਹਾ ਸੀ। ਡਿੱਕੀ ‘ਚ ਪਾਵਨ ਸਰੂਪ ਕੋਲ ਚੱਪਲਾਂ ਵੀ ਪਈਆਂ ਸਨ। ਜਦੋਂ ਨਿਹੰਗ ਸਿੰਘਾਂ ਨੂੰ ਘਟਨਾ ਬਾਰੇ ਪਤਾ ਲੱਗਾ ਤਾਂ ਉਹ ਮੌਕੇ ‘ਤੇ ਪਹੁੰਚੇ ਤੇ ਕਾਰ ਦੀ ਤਲਾਸ਼ੀ ਲਈ ਗਈ ਤਾਂ ਉਨ੍ਹਾਂ ਦੇਖਿਆ ਕਿ ਗੱਡੀ ਦੀ ਡਿੱਗੀ ਵਿਚ ਪਵਿੱਤਰ ਸਰੂਪ ਦੇ ਬਿਲਕੁਲ ਕੋਲ ਚੱਪਲਾਂ ਪਈਆਂ ਹੋਈਆਂ ਸਨ ਤੇ ਹੋਰ ਸਾਮਾਨ ਵੀ ਖਿੰਡਿਆ ਪਿਆ ਸੀ। ਇਸ ਤੋਂ ਇਲਾਵਾ ਗੁਰੂ ਸਾਹਿਬ ਦੇ ਸਰੂਪ ਉਪਰ ਨਾ ਤਾਂ ਚੰਦੋਆ ਸਾਹਿਬ ਸਜਾਇਆ ਗਿਆ ਸੀ ਤੇ ਨਾ ਹੀ ਚੌਰ ਸਾਹਿਬ ਦੀ ਸੇਵਾ ਦਾ ਪ੍ਰਬੰਧ ਕੀਤਾ ਗਿਆ ਸੀ।
ਘਟਨਾ ਦੇ ਵਿਰੋਧ ‘ਚ ਸਿੱਖ ਸੰਗਤ ਨੇ ਕੀਤਾ ਰੋਸ ਪ੍ਰਦਰਸ਼ਨ ਤੇ ਪਿਛਲੇ 3 ਦਿਨਾਂ ਤੋਂ ਉਹ ਗੁਰਦੁਆਰਾ ਸਭਾ ਦੇ ਬਾਹਰ ਧਰਨਾ ਦੇ ਰਹੇ ਸਨ। ਸਿੱਖ ਸੰਗਤ ਨੇ SGPC ਨੂੰ ਮਾਮਲੇ ‘ਚ ਸਖ਼ਤ ਕਾਰਵਾਈ ਕਰਨ ਦੀ ਅਪੀਲ ਕੀਤੀ ਹੈ। ਸੰਗਤ ਦਾ ਕਹਿਣਾ ਹੈ ਕਿ ਜੇਕਰ ਪ੍ਰਬੰਧਕਾਂ ਦੇ ਮਨ ਵਿਚ ਥੋੜ੍ਹਾ ਜਿਹਾ ਵੀ ਸਤਿਕਾਰ ਹੁੰਦਾ ਤਾਂ ਗੁਰੂ ਸਾਹਿਬ ਨੂੰ ਪਾਲਕੀ ਸਾਹਿਬ ਵਿਚ ਸਜਾ ਕੇ ਪੰਜ ਪਿਆਰਿਆਂ ਦੀ ਅਗਵਾਈ ਵਿਚ ਰਵਾਨਾ ਕਰਦੇ।
